Democrito

In bûsto ch'o rafigûa o Demòcrito

ZE-P	Sta paggina chie a l'è scrita in zeneize, co' ina grafia tipo quella do Prian do 1745

Demòcrito (gr. Δημόκριτος, lat. Democrĭtus) de Abdea. - Filòsofo grego (Abdea, Traxa, n. tra o 470 e o 457 a. C. - m. fòscia tra o 360 e o 350 a. C.). Discepolo de Leüçippo, o l'ha elaborao una conceçion materialistega da realtæ, a quæ a l'è vista comme mateia in movimento (permisso da-o vœuo).

Vitta

Di dæti meno inçerti da tradiçion ch'a-o risguarda vœuan ch'o viagesse soventi in Egitto e pe tutto o mondo mediterrañio. Tornao a Abdea (o ghe saiæ morto a 109 anni), o se dedicò a l'attivitæ de meistro e de studioso. Di numeroxi scriti, de etica, matematica, lettiatua e muxica, n'è pervegnuo solo che circa trexento frammenti.

Pensceo

O l'ha sviluppao rigorosamente a conceçion atomistega de Leüçippo, abbandonando però o grossolan empirismo fixico do meistro e asmiando a una spiegaçion metafixica da realtæ. Coscì o momento "eleatico" o riappâ inta so gnoseologia rinsadao pe a distinçion rigorosa fra conoscença senscibile e conoscença intellettuâ, e solo a quest'urtima l'è riconosciúo o carattere de çerteçça: e qualitæ senscibile son convençionæ (νόμῳ), a conoscença de veitæ attraverso o travaggio scientifico da raxon a se poñe invece comme a ciu âta exigença do βίος ϑεωρητικός, co-o quæ una savia e equilibrâ morâ a doviæ fâ coincidde ascì a vitta pratica.
Amiâ sotta questo profî, a conceçion atomistega de Democrito a no pœu êse consciderâ soltanto una meccanica conciliaçion do monismo eleatico co-o pluralismo, ma a va vista comme un superamento da metafixica parmenidea in força de una nœuva metafixica ch'a fa do no-êse o tesciúo de l'êse.

L'è diffiçile dî, sorvetutto pe a scarscitæ de documenti, se l'atomismo de Democrito o foise deterministego ò caxualistego: a propenscion di studioxi a l'è verso quest'urtima interpretaçion.
Da-o punto de vista fixico a l'è particolarmente interessante a conceçion atomistega, saiv'a dî discontinua, da mateia; l'atomo de Democrio o l'è consciderao comme l'unitæ elementâ de l'êse, fixicamente indivixibile, oltre che immutabile e eterno. A formaçion di corpi, e in primmo lœugo quella di coscì díti elementi (fœugo, aia, ægoa, tæra), a vegne spiegâ da Democrito in senso reddenamente meccaneghistego comme una consegoença de l'incessante e eterno movimento vorticoso di atomi ch'o determina, pe de qualitæ geometriche, o raggruppamento di elementi scimili.

In contrasto co-a filosofia dominante into Medioevo, e dotriñe democritee e epicuree commençon a tornâ in ónô a-o prinçippio de l'etæ moderna, e, pe œuvia specce de Bacone e de Galileo, contribuin a-o sviluppo da nœuva filosofia naturâ.

Colegaménti esterni

Altri progetti

• Wikimedia Commons

• Wikimedia Commons a contêgne di files in sce Democrito