Siskaokazia
I Sirkaokazia na Kaokazy Avaratra dia faritra avaratra amin' i Kaokazy, any Eorôpa Atsinanana, eo amin' ny sisin-tany voajanahary eo anelanelan' i Eorôpa sy Azia Andrefana. I Rosia no mifehy azy manontolo azy, voafaritry ny Ranomasin' i Azov sy ny Ranomasina Mainty any andrefana, ny Ranomasina Kaspiana any atsinanana, ary ny Tendrombohitra Kaokazy any atsimo. Io faritra io dia mizara sisin-tany amin' ny firenena ao Kaokazy Atsimo na Transkaokazia toa an' i Jeôrjia sy i Azerbaijàna. I Krasnodar no tanàna lehibe indrindra any Kaokazy Avaratra.
Faritra rosia nanomboka tamin' ny taonjato faha-18 i Kaokazy Avaratra izay mizara ara-pôlitika eo amin' ny repoblika rosiana sy kray maromaro ankehitriny. Any avaratr' i Tandavan-tendrombohitra Kaokaziana no misy azy, izay manasaraka azy amin' i Kaokazy Atsimo. Amin' ny maha ampahan' i Rosia azy, ny io faritra io dia ao anatin' ny Distrika Federalin' i Kaokazy Avaratra sy ny Distrika Federaly Atsimo ary ahitana ny Krain' i Krasnodar, ny Krain' i Stavropol, ary ireo repoblika mandrafitra azy, hatrany andrefana ka hatrany atsinanana: i Adygea, i Karachay-Cherkessia, i Kabardino-Balkaria, i Ôsetian' i Alania Avaratra, i Ingushetia, i Tsetsenia, ary ny Repoblikan' i Dagestàna ary any avaratra: i Kalmykia.
Raha ara-jeôgrafia, ny teny hoe Kaokazy Avaratra dia manondro ny tehezan-tendrombohitra avaratra sy ny farany andrefana amin' ny tandavan-tendrombohitra Kaokazy Lehibe, ary koa ny ampahany amin' ny tehezan-tendrombohitra atsimo mankany andrefana. Ny faritry ny Lemaka Pôntika-Kaspiana dia matetika mahafaoka ny faritr' i Siskaokazia, ka ny sisin-tany avaratra amin' ny Lemak' i Kaokazy Avaratra dia heverina ho ny renirano Manych. Noho ny toetany malefaka kokoa raha oharina amin' ny ampahany be amin' i Rosia, ny faritr' Kaokazia Avaratra dia nofaritana ho "fehikibon' ny masoandro" ho an' i Rosia.