Cokelat

Artikel iko manganai cokelat sabagai bahan makanan. Untuak panggunoan lain silakan mancaliak cokelat (disambiguasi).

Cokelat batangan
Media: Cokelat

Cokelat adolah sabutan untuak hasil olahan makanan atau minuman dari biji kakao (Theobroma cacao). Cokelat patamo kali dikonsumsi dek panduduak Mesoamerika kuno sabbagai minuman, walaupun dipacayo jikok dahulu cokelat hanyo dapek dikonsumsi dek para bangsawan.

Cokelat umumnyo dibarikan sabagai hadiah atau bingkisan di hari rayo. Dangan bantuak, corak, dan raso nan unik, cokelat acok digunokan sabagai ungkapan tarimo kasih, simpati, atau parhatian bahkan sabagai panyatoan cinto. Cokelat juo alah manjadi salah satu raso nan paliang populer di dunia. Salain dikonsumsi paliang umum dalam bantuak cokelat batangan, cokelat juo manjadi bahan minuman hangek dan dingin.

Sajarah cokelat

Sagaleh cokelat angek. Manuruik sajarahnyo Cokelat pado awalnyo diminum dan bukannyo dimakan.

Cokelat dihasilkan dari kakao (Theobroma cacao) nan dipakirokan mulo-mulo tumbuah di daerah Amazon utara sampai ka Amerika Tangah. Mungkin sampai ka Chiapas, bagian paliang selatan Meksiko. Urang-urang Olmec mamanfaatkan batang dan, mungkin juo, mambuek “cokelat” di sapanjang pantai taluak di selatan Meksiko. Dokumentasi paliang awal tantang cokelat ditamukan pado panggunaannyo di sabuah situs pangolahan cokelat di Puerto Escondido, Honduras sakitar 1100 -1400 taun SM . Residu nan diparoleh dari tangki-tangki pangolahan iko mangindikasikan bahwa awalnyo panggunaan kakao indak diparuntukkan untuak mambuek minuman sajo, namun lampisan putiah nan tadapek pado biji kakaao labiah condoang digunokan sabagai sumber gulo untuak minuman baalkohol.

Residu cokelat nan ditamukan pado tambika nan digunokan dek suku Maya kuno di Río Azul, Guatemala Utara, manunjuakkan bahwa Suku Maya maminum cokelat di sakitar taun 400 SM. Paradaban patamo nan mandiami daerah Meso-Amerika itu mangenal batang “kakawa” nan buahnyo dikonsumsi sabagai minuman xocolātl nan bararti minuman paik. Manuruik mareka, minuman iko paralu dikonsumsi satiok hari, antah untuak alasan apo. Namun, tampaknyo cokelat juo manjadi simbol kamakmuran.

Caro manyajikannyo pun tak sambarangan. Dangan mamacik wadah cairan iko satinggi dado dan manuangkan ka wadah lain di tanah, panyaji nan ahli dapek mambuek busa taba, bagian nan mambuek minuman iko bagitu banilai. Busa iko sabananyo dihasilkan dek lemak kakao (cocoa butter) namun kadang-kadang ditambahkan juo busa tambahan. Urang Meso-Amerika tampaknyo mamiliki kabiasoan pantiang minum jo makan bubua nan manganduang cokelat.

Biji dari batang kakao iko surang sangek paik dan harus difermentasi supayo rasonyo dapek diparoleh. Satalah dipanggang dan dibubuakkan hasilnyo adolah cokelat atau kakao. Dipakirokan kabiasoan minum cokelat suku Maya dimulai sakitar taun 450 SM - 500 SM. Konon, konsumsi cokelat dianggap sabagai simbol status pantiang pado maso itu. Suku Maya mangonsumsi cokelat dalam bantuak cairan babuih ditaburi lada sirah , vanila, atau rempah-rempah lain. Minuman Xocoatl juo dipacayo sabagai pancegah latiah, sabuah kaparcoyaan nan mungkin disabokkan dari kanduangan theobromin di dalamnyo.

Katiko paradaban Maya klasik runtuh (sekitar taun 900) dan digantikan dek bangso Toltec, biji kokoa manjadi komoditas utamo Meso-Amerika. Pado masao Karajaan Aztec bakuasa (sampai sakitar taun 1500 SM) daerah nan maliputi Kota Meksiko kini dikenal sabagai daerah Meso-Amerika nan paliang kayo akan biji kakao. Bagi suku Aztec biji kakao marupokan “makanan para dewa” (theobroma, dari bahaso Yunani). Biasonyo biji kakao digunoan dalam upacara-upacara kaagamaan dan sabagai hadiah.

Cokelat juo manjadi barang mewah pado maso Kolombia-Meso Amerika, dalam kabudayaan mareka iyolah suku Maya, Toltec, jo Aztec biji kakao (cacao bean) acok digunokan sabagai mato uang . Sabagai contoh suku Indian Aztec manggunokan sistem pahituangan dimano ciek ayam turki saharago saratuih biji kakao dan ciek buah alpukat saharaga tigo biji kokoa

Samantaro taun 1544 M, delegasi Maya Kekchi dari Guatemala nan mangunjuangi istano Spanyol mambaok hadiah, di antaronyo minuman cokelat.

Cokelat caia.

Di awal abaik ka-17, cokelat manjadi minuman panyagar nan disukoi di istano Spanyol. Sapanjang abaik itu, cokelat ado diantaro kaum elit Eropa, kamudian lewat proses nan demokratis haragonyo manjadi cukuik murah, dan pado akhia abaik itu manjadi minuman nan dinikmati dek kelas pedagang. Kiro-kiro 100 taun sasudah kadatangannya di Eropa, bagitu takanalnya cokelat di London, sampai didirian “rumah cokelat” untuak manyimpan pasadioan cokelat, dimulai di rumah-rumah kopi. Rumah cokelat patamo dibuka pado 1657. Dan resep es coklat patamo dikatahui barasal dari Inggirih pado taun 1668.

Pado taun 1689 saurang dokter dan kolektor banamo Hans Sloane, mangambangkan sajanih minuman susu cokelat di Jamaika dan awalnyo diminum dek suku apothekari, namun minuman iko kamudian dijua dek Cadbury basaudaro .

Sadonyo cokelat Eropa awalnyo dikonsumsi sabagai minuman. Baru pado 1847 ditamukan cokelat padek. Urang Eropa mambuang hampia sadonyo rampah-rampah nan ditambahkan dek urang Meso-Amerika, tatapi acok mampartahankan vanila. Juo mangganti banyak bumbu sahinggo sasuai jo salero mareka surang mulai dari resep khusus nan mamaralukan ambergris, zat warna kaunguan balilin nan diambil dari dalam usus ikan paus, hinggo bahan labiah umum takah kayu manih atau cangkeh. Namun, nan paliang acok ditambahkan adolah gulo. Sabaliaknyo cokelat Meso-Amerika tampaknyo indak dibuek manih.

Cokelat Eropa awalnyo diramu jo caro nan samo jo nan digunokan suku Maya dan Aztec. Bahkan sampai kini, caro Meso-Amerika kuno masih dipatahankan, tatapi di dalam masin industri. Biji kakao masih saketek difermentasikan, dikariangkan, dipanggang, dan digiliang. Namun, sarangkaian teknik labiah rumik pun dimainkan. Bubuak cokelat diemulsikan jo karbonasi kalium atau natrium bia labiah mudah bacampua jo aia (dutched, metode emulsifikasi nan ditamukan urang Balando), lemaknyo dikurangi jo mambuang banyak lemak kakao (defatted), digiliang sabagai cairan dalam gentong khusus (conched), atau dicampua jo susu sahinggo manjadi cokelat susu (milk chocolate).

Raso cokelat

Raso cokelat masih sulik didefinisikan. Dalam bukunyo Kaisar Cokelat (Emperors of Chocolate), Joel Glenn Brenner manggambarkan riset takini tantang rasonyo. Manuruiknyo raso cokelat tacipta dari campuran 1.200 macam zat, tanpa ciek raso nan jaleh-jaleh dominan. Sabagian dari zat itu rasonyo sangaik indak lamak kalau tagak surang. Dek nyo, sampai kini alun ado raso cokelat tiruan.

Efek psikologis nan tajadi katiko manikmati cokelat dek titiak leleh lemak kakao iko talatak saketek di bawah suhu normal tubuah manusia. Sabagai ilustrasi, bilo sanak mamakan sapotoang cokelat, lemak dari cokelat tasebuik akan lumer di dalam muluik. Lumernyo lemak kakao manimbulkan raso lunak nan khas dimuluik, riset tarakhir dari BBC mangindikasikan jikok lelehnyo cokelat di dalam muluik maningkekkan aktivitas otak jo  debaran jantuang nan labiah kuek daripado aktivitas nan dihasilkan dari ciuman muluik ka muluik, dan juo akan taraso ampek kali labiah lamo bahkan sasudah aktivitas iko baranti .

Pamalsuan raso

Pamalsuan raso cokelat acok tajadi dek kakao adolah bahan nan relatif maha dibandiangkan jo gulo atau minyak nabati. Kaduo bahan iko acok digunokan untuak manggantikan kakao.

Lemak kakao acok digantikan minyak nan labiah murah, takah lesitin dari kedelai atau minyak palem. Salain soal harago, jo kaduo bahan iko palapisan cokelat manjadi labiah mudah. Pabandiangan kakao padek (komponen nonlemak pado biji nan digiliang) juo candaruang randah. Dalam cokelat batangan, misalnyo, sakitar 20% gulo-gulo itu diisi cokelat.

Cokelat premium, di sisi lain, biasonyo manganduang sakitar 50 - 70% cokelat padek. Kareno manganduang labiah saketek gulo dan mungkin juo saketek minyak nabati, cokelat pakek iko manganduang labiah saketek kalori dari produk cokelat pado umumnyo. Pantaslah bila para pancinto cokelat acok “protes” gara-gara cokelat disalahkan untuak masalah nan sabananyo disabokkan dek konsumsi gulo balabiahan.

Kanduangan cokelat

Cokelat manganduang alkaloid-alkaloid takah teobromin, fenetilamina, dan anandamida, nan mamiliki efek fisiologis untuak tubuh. Kandungan-kandungan iko banyak dihubungkan jo tingkek serotonin dalam utak. Manuruik ilmuwan, cokelat nan dimakan dalam jumlah normal sacaro taratur dapek manurunkan takanan darah . Cokelat hitam akhia-akhia iko banyak mandapekkan promosi kareno manguntuangkan kasehatan bilo dikonsumsi dalam jumlah sadang, tamasuak kandungan anti oksidannyo nan dapek mangurangi pambantuakan radikal bebas dalam tubuh.

Racun bagi hewan tatentu

Adonyo kanduangan teobromin dalam cokelat dapek manjadi racun untuak sabagian hewan bilo dikonsumsi. Hewan-hewan nan bareaksi keracunan pado kanduangan teobromin di antaronyo adolah kudo, anjiang, buruang kakak tua, tikus-tikus jenis ketek jo kuciang (khususnyo anak kuciang), iko dikaranokan metabolisme tubuah mareka indak  dapek mancerna kanduangan kimia iko sacaro efektif. Bilo mareka diagiah makan cokelat mako kanduangan teobromin akan tatap barado dalam aliran darah mareka hinggo 20 jam, akibaiknyo hewan-hewan iko mungkin mangalami sawan jo kajang-kajang, sarangan jantuang, pandarahan internal, dan pado akhianyo manyebabkan kamatian. Pananggulangannyo adolah jo marangsang hewan-hewan iko bia mamuntahkan cokelat dan sacapek mungkin mambaok mareka ka dokter hewan.