Leonardo Fibonacci

Leonardo Pisano ó Leonardo de Pisa (1170 — 1250) - tamien coincido cumo Fibonacci passado la sue muorte - fui un matemático eitaliano, dezido cumo l purmeiro grande matemático ouropeu depuis de la decadéncia heilénica. Ye cunsidrado por alguns cumo l mais talentoso matemático de la Eidade Média. Quedou coincido pula çcubierta de la sequéncia de Fibonacci i pul sou papel na antroduçon de ls algarismos árabes na Ouropa.

Biografie

L apelhido de família de sou pai era "Bonacci" (home de buona natureza) i l'apelido del própio, Fibonacci, deminutibo de fillius Bonacci, que probabelmente serie filho de Bonacci. L sou pai derigie un scritório comercial ne l norte de la África i l moço Leonardo muitas bezes biajou cul; alhá, de ls árabes, el conheciu l sistema de numaraçon hindu.

Fibonacci cumbenceu-se de la superioridade de ls algarismos árabes an cumparaçon culs algarismos romanos, que éran outelizados puls ouropeus a la época. Para cumprender essa superioridade, basta tentar fazer la debison de 4068 por 12, ó la multeplicaçon desses mesmos númaros cula numeraçon romana.

Biajou atrabeç de ls países mediterráneos para studar cun coincidos matemáticos árabes de sou tiempo. An 1202, cun 32 anhos d'eidade, publicou Lhiber Abaci, Lhibro de l Ábaco, que ne ls chegou grácias la sue segunda eidiçon de 1228. Esse lhibro cuntén ua grande cantidade d'assuntos relacionados cula Aritmética i la Álgebra de la época, i rializou un papel amportante ne l zambolbimiento matemático na Ouropa ne ls seclos seguintes, pus, por esse lhibro, ls ouropeus benírun a coincer ls algarismos hindus, tamien chamados arábicos. La teorie cuntida an Lhiber Abaci ye eilustrada cun muitos porblemas que reperséntan ua grande parte de l lhibro.

Sclareciu l sistema de posiçon árabe de ls númaros, ancluindo l númaro zero. Esse lhibro mostrou l'ouportunidade prática de l nuobo sistema numeral, aplicando-lo an cuntabelidade comercial, cumberson de pesos i medidas, calclo de percentaiges i cámbio. L lhibro fui aceito cun antusiasmo pula Ouropa eiducada, i tubo perfundo eifeito ne l pensamiento ouropeu. Esse eilegante sistema de sinales numéricos, an brebe, sustituirie l nun mais ouportuno sistema d'algarismos romanos.

Sequéncia de Fibonacci

La Sequéncia de Fibonaci cunsiste nua sucesson de númaros, que, defenindo ls dous purmeiros númaros de la sequéncia cumo 0 i 1, ls númaros seguintes seran oubtenidos por meio de la soma de ls sous dous anteriores. Antoce, ls númaros son: 0,1,1,2,3,5,8,13,21,34,55,89,144,233,...

Dessa sequéncia, strai-se l númaro trascedental coincido cumo númaro d'ouro.

Para saber la Sequéncia de Fibonacci, puode-se outelizar la fórmula: