Mortlach

Mortlach is de öllste legale Whisky-Brenneree in Dufftown, Banffshire, Schottland. De Brennereehüüs sünd to’n Deel in de schottischen Denkmollisten in de Kategorie B inordent.

Mortlach
Brenneree Mortlach
Land	Schottland
Region	Speyside
Tyyp	Malt
Status	aktiv
Besitter	Diageo
Grünnt	1823
Grünner	James Findlater, Donald Mackintosh, Alexander Gordon
Waterborn	Borns in de Conval Hills
Washstill(s)	3
Spiritstill(s)	3
Produkschoonsvolumen	2.900.000 l

Historie

Grünnt weer de Brenneree in’t Johr 1823 dör James Findlater, Donald Mackintosh un Alexander Gordon. De Naam Mortlach warrt op verschedene Orden düüt: Blangen de Översetten as „groten grönen Hövel“ oder as „schötelförmig Daal“ warrt de Naam mitünner ok as „Massaker an de willen Göös“ düüt, wobi mit de willen Göös dat däänsche Heer meent is, dat vun’n schöttischen König Malcolm II. in’n Johr 1010 in dat Rebeet üm Dufftown slahn worrn is.

To Anfang harr de Brenneree den Naam Dufftown Distillery. En Tiet lang weer se in Besitt vun John un James Grant vun de Destille Glen Grant, later güng se över in’n Besitt vun George Cowie. Dorna güng se an de Distillers Company Ltd. (DCL) un över de United Distillers (UD) opletzt an Diageo, de ehr ok vundaag noch tohören deit. In disse Destille weer William Grant in de Lehr, de later in’n glieke Oort de Brenneree Glenfiddich grünnt hett.

Produkschoon

Mortlach höört to dat schottische Whiskyrebeet Speyside un betüüt sien Water för de Produkschoon ut Borns in de Conval Hills. In de Brenneree gifft dat en Meeschfatt ut Eddelstahl vun 12 t un söss Gäärfatten to 59.000 l ut Lärkenholt. Brennt warrt de Whisky in dree Wash stills mit tosamen 32.500 l Volumen un dree Spirit stills mit tohopen 26.000 l.

Mortlach vun en unafhangigen Affüller

En Deel vun den Mortlach-Whisky warrt dreefack brennt, wat för schottische Whiskys nich begäng is un anners vör allen ut Irland bekannt is. In dit Verfohren warrt de Spirit still No.1 (The Wee Witchie), de de lüttste vun de Brennblasen in de Brenneree is, as Intermediate still bruukt. Man, dor binnen warrt blots de Naloop (feints) vun de eersten Wash stills destilleert, aver nich de ut de drüdden, de gröttsten Brennblaas.

Afsehn vun en poor sünnere Affüllen, warrt de Whisky vun de Mortlach-Brenneree normalerwies nich direkt affüllt. To kriegen is de Whisky in’n Hannel aver över verschedene unafhangige Affüllers, de deelwies ok teemlich olle Fatten anbeden doot.

Kiek ok

• List vun de schottischen Brennereen

Weblenken

Mortlach. Mehr Biller, Videos oder Audiodateien to’t Thema gifft dat bi Wikimedia Commons.