Hans Zimmer (Komponist)

Hans Zimmer (2006)

Hans Florian Zimmer (* 12. September 1957 in Frankfort an’n Main) is en düütschen Komponist, de sik sünners dör sien Filmmusiken in groten Naam maakt hett.

Levensloop

Zimmer hett as Kind in’t Öllernhuus dat Klaveerspelen lehrt, wobi he aver blots för en korte Tiet en Schoolmeester dorto harr, wieldat he sik in Henblick op de Grundregeln för Klaveerspelers nich mit de Disziplin anfrünnen kunn, de de Schoolmeester infordert hett. In dat egelsche Internat Hurtwood House hett he sien Abitur maakt. Blangenbi hett he in Musikgruppen as Krisma un Ultravox an’n Synthesizer seten, man en akademische musikaalsche Utbilln hett he nich dörlopen.

Johren in England

Enn vun de 1970er Johren hett Zimmer Musikjingles för Warf komponeert un hett bi den Videoclip Video Killed the Radio Star vun The Buggles an’n Modular-Synthesizer mitarbeit. Warf- un Radio-Jingles hett he in London in dat Studio Air Edel komponeert. Dor hett he den bekannten engelschen Filmmusik-Komponisten Stanley Myers drapen un is 1980 sien Assistent worrn. Vun em hett Hans Zimmer veel över dat Komponeeren för Orchester lehrt. Und dör jemehr Tosamenarbeit hett immer ok eerste lüttere Opdrääg för egen Filmmusiken kregen. In de 1980er Johren hett he gau Acht op sik togen dör de Musiken to Filmen as Driving Miss Daisy.

Spood in Hollywood

De Ehfru vun den Speelbaas Barry Levinson hett de Filmmusik to den Film A World Apart köfft. Dorophen hett se ehrn Mann anraat, mit Zimmer tosamentoarbeiten bi sien kamen Film Rain Man. För de Musik to den Film hett Zimmer 1989 sien eerste Oscarnomineeren kregen.

Anfang vun de 1990er Johren weer Zimmer vör allen vun wegen sien ne’e Kombinatschoon vun Orchester- un Synthesizermusik bekannt. Mit Ridley Scott sien Black Rain un Ron Howard sien Backdraft hett he en ganz ne’en, egenen Stil entwickelt, Actionfilmen to vertonen. Sünners Backdraft gellt as en Mielensteen in de Filmmusikhistorie: Zimmer harr sik överleggt, den Film mit en so nöömten „Wall-to-Wall Score“ to vertonen, dat bedüüt, den gröttsten Deel vun’n Film mit Musik to ünnerleggen. Dormit hett he den Prototyyp för vele latere Actionfilmmusiken in Hollywood sett.

De Stilitik, de groff op en mächtig Hööftthema, rhythmische Actionmotiven un langsome Afsnitten för de beiden Hööftfiguren baseert, is later in tallriek annere Filmen wedder opgrepen worrn.

Mit A World Apart un The Power of One harr Zimmer al Musik schreven, de afrikaanschen Influss harr. Dat weer ok en Grund, worüm Zimmer anstellt weer, de Musik to den Walt-Disney-Tekentrickfilm The Lion King to komponeeren. Dör de Tosamenarbeit mit Lebo M is dor en veel achte Musik bi rutkamen, de afrikaansche Kläng mit traditschonell Orchestermusik kombineert. De Filmmusik to den Film gellt as een vun de meistverköfften bit hüüt. 1995 hett Zimmer dorför den Oscar för de Beste Filmmusik kregen.

Tohopen mit sien Partner Jay Rifkin hett Zimmer Mitt vun de 1980er Johren dat Filmmusikstudio Media Ventures grünnt. He hett 2003 na en Rechtsstriet mit Rifkin das Geschäft mit sien Ünenrnehmen Remote Control Productions övernahmen. Dat is en Oort Talentsmeed, woneem ok enige annere Filmmusik-Komponisten arbeiten doot, as to’n Bispeel Steve Jablonsky, James Dooley, Heitor Pereira oder Geoff Zanelli. To de bekanntesten ehmoligen Komponisten bi Remote Control Productions tellt Klaus Badelt, John Powell, Nick Glennie-Smith, Mark Mancina und Harry Gregson-Williams.

Vundaag leevt un arbeit Zimmer in Los Angeles un höört to de Filmkopmonisten mit den gröttsten Spood un Influss vun de Hollywood-Historie. Na’n Afluss vun de Arbeit to den Film The Dark Knight plaant Zimmer en poor Konzerten to geven.

Tokamen Projekten

Wat bi Zimmer tokamen ansteiht is eerstmol The Dark Knight, womit de Film Batman Begins wietergeiht. Bito staht de Animatschoonsfilm Kung Fu Panda un Frost/Nixon, de Verfilmen vun’t Theaterstück mit den glieken Naam an.

Stil

En Kennteken för Hans Zimmer is de Bruuk vun ethnischen Musikinstrumenten as to’n Bispeel dat Duduk in Gladiator speelt vun den armenschen Dudukspeler Dschiwan Gasparjan, Flöten in Beyond Rangoon oder Taikos in The Last Samurai. Dorto höört ok Kompositschonen mit afrikaanschen Influss as in A World Apart, The Power of One, The Lion King oder Black Hawk Down, aver ok Musik to Kummedien as As Good as it Gets oder Tricks. He arbeit regelmatig mit de Speelbasen Ridley Scott, James L. Brooks, Gore Verbinski un Penny Marshall tosamen. As een vun sien besten Warken tellt de Musik to den Film The Thin Red Line. Zimmer sülvst betekent Ennio Morricone as sien gröttst Vörbild.

Zimmer arbeit faken mit de glieken Musikers tosamen. In vele Musiken warrt to’n Bispeel een Gitarr vun Heitor Pereira speelt oder een Cello vun Martin Tillmann.

Zimmer komponeert faken al lang vör’t Anfangen vun Film Suiten, de all wichtigen Bestanddelen vun de latere Filmmusik bargt. Gegen Enn vun de Produkschon deent disse Suiten as Grundlaag för de Musik, de direkt to dat Bild schreven warrt. Man ok de Suiten sülvst warrt tomeist as Deel vun de Filmmusik bruukt, as to’n Bispeel de Titel 9 bit 13 vun de Musik to The Da Vinci Code, de de vun Zimmer schreven Suite dorstellt. In en Interview verklort Zimmer sülvst sien Vörgahnswies: Mit de modern Reeknertechnik kann en Film ok in letzte Minuut noch bannig ännert warrn, dat he keen groten Sinn mehr dorachter sütt, to töven bitdat de Produkschoon un de Snitt vun Film fardig sünd nu denn eerst mit dat Komponeeren antofangen. Beter is dat ut sien Sicht, as de Makers op disse Wies en Grundlaag to’n Arbeiten hebbt un de Musik villicht sogor mehr Influss op den Stil vun’n Film hett.

Faken helpt sünners to’n Enn vun en Filmprodukschoon hen annere Komponisten Zimmer bi sien Musik, dordör dat se för em Delen op de Grundlaag vun sien Suiten un musikaalsch Ideen för’t Orchester ümsetten doot, arrangeert oder ok komponeert. Disse Tosamenarbeit is bi enige Filmmusik-Anhangers ümstreden, in Hollywood aver nich roor.

Rupert Gregson-Williams hett dorto in en Interview vertellt, dat faken de Ansicht herrscht, dat Zimmer för de Musik ehrt warrt, ofschoonst banig veel Lüüd an de Musik arbeit hebbt. He sülvst harr an verscheden Szenen to The Prince of Egypt arbeit, un all de Themen weern vun Zimmer schreven worrn. He harr de Opgaav hat, dat Thema to nehmen un inhaltlich in de Szeen intoarbeiten, man de drieven Kraft weer jümmer Zimmer wesen.

Hans Zimmer komponeert aver nich blots, he övernimmt bi Filmen ok dat Utföhren as verantwoortlich Musikproduzent.

Filmografie (Utwahl)

Johr	Originaltitel	dt. Titel	tosamen mit
1988	Rain Man	Rain Man	—
1988	A World Apart	Zwei Welten	—
1988	Taffin	Ein Mann wie Taffin	Stanley Myers
1989	Black Rain	Black Rain	—
1989	Driving Miss Daisy	Miss Daisy und ihr Chauffeur	—
1990	Green Card	Green Card – Schein-Ehe mit Hindernissen	—
1990	Tage des Donners	Days of Thunder	—
1990	Bird on a Wire	Ein Vogel auf dem Drahtseil	—
1991	Thelma & Louise	Thelma & Louise	—
1991	Regarding Henry	In Sachen Henry	—
1991	Backdraft	Backdraft – Männer, die durchs Feuer gehen	—
1992	A League of Their Own	Eine Klasse für sich	—
1992	The Power of One	Im Glanz der Sonne	—
1993	The House of Spirits	Das Geisterhaus	—
1993	Point of No Return	Codename: Nina	—
1993	Cool Runnings	Cool Runnings – Dabei sein ist alles	Nick Glennie-Smith
1994	The Lion King	Der König der Löwen	—
1995	Beyond Rangoon	Rangoon – Im Herzen des Sturms	—
1995	Crimson Tide	Crimson Tide – In tiefster Gefahr	—
1996	The Rock	The Rock – Fels der Entscheidung	Nick Glennie-Smith Harry Gregson-Williams
1996	Broken Arrow	Operation – Broken Arrow	—
1997	As Good as it Gets	Besser geht’s nicht	—
1998	The Thin Red Line	Der schmale Grat	—
1998	The Prince of Egypt	Der Prinz von Ägypten	—
1999	The Chill Factor	Der Chill-Faktor	John Powell
2000	Mission: Impossible II	Mission: Impossible II	—
2000	Gladiator	Gladiator	Lisa Gerrard
2001	Black Hawk Down	Black Hawk Down	—
2001	Pearl Harbor	Pearl Harbor	—
2001	Hannibal	Hannibal	—
2002	Spirit: Stallion of the Cimarron	Spirit – Der wilde Mustang	—
2003	The Last Samurai	Last Samurai	—
2003	Matchstick Men	Tricks	—
2003	Tears of the Sun	Tränen der Sonne	—
2003	Pirates of the Caribbean: The Curse of the Black Pearl	Fluch der Karibik	Klaus Badelt
2004	Spanglish	Spanglish	—
2004	Shark Tale	Große Haie – Kleine Fische	—
2005	Der kleine Eisbär 2 – Die geheimnisvolle Insel	Der kleine Eisbär 2 – Die geheimnisvolle Insel	Nick Glennie-Smith
2005	Batman Begins	Batman Begins	James Newton Howard
2006	The Da Vinci Code	The Da Vinci Code – Sakrileg	—
2006	Pirates of the Caribbean: Dead Man’s Chest	Pirates of the Caribbean – Fluch der Karibik 2	—
2007	The Simpsons Movie	Die Simpsons – Der Film	—
2007	Pirates of the Caribbean: At World’s End	Pirates of the Caribbean – Am Ende der Welt	—
2008	The Dark Knight	The Dark Knight	—
2008	Frost/Nixon	Frost/Nixon	—
2009	Angels & Demons	Illuminati	—
2009	Sherlock Holmes	Sherlok Holmes	—
2010	Inception	Inception	—
2011	Pirates of the Caribbean: On Stranger Tides	Pirates of the Caribbean – Fremde Gezeiten	—
2011	Sherlock Holmes: A Game of Shadows	Sherlock Holmes – Spiel im Schatten	—

Utteken un Priesen

De Filmmusikwarken vun Hans Zimmer harrn veel Spood, wat sik ok in de velen Filmpriesen un Utteken wiesen deit, de Zimmer wunnen hett. Bit vundaag (April 2012) is Hans Zimmer mit mehr as föfftig Priesen ehrt worrn. Dorto kamt wietere üm un bi söventig Nomineeren, dorünner ok mehrmols för den Oscar.
Uttekent worrn is he mit (Utwahl):

• 1989: den BMI Film Music Award för Rain Man.
• 1992: den BMI Film Music Award för Backdraft.
• 1993: den Echo in de Kategorie Best internatschonal Filmmusik för The House of Spirits.
• 1995: den Oscar in de Kategorie Beste Filmmusik för The Lion King.
• 1995: den Golden Globe in de Kategorie Beste Filmmusik för The Lion King.
• 1996: den Grammy in de Kategorie Best Kompositschoon för Film oder Feernsehn för Crimson Tide
• 1996: den Richard Kirk Career Achievement Award vun de BMI Film & TV Awards
• 1999: den Golden Satellite Award in de Kategorie Best Original Filmmusik för The Thin Red Line.
• 2000: den Joseph-Plateau-Filmprijs (Ehrenpries).
• 2001: den Golden Satellite Award in de Kategorie Best Original Filmmusik (tosamen mit Lisa Gerrard) för Gladiator.
• 2001: den Golden Globe in de Kategorie Beste Filmmusik (tosamen mit Lisa Gerrard) för Gladiator
• 2001: den Hollywood Film Award in de Kategorie Rutragen Leistung in de Filmmusik.
• 2003: den Ehrenpries för’t Levenswark vun’t National Board of Review för utermatig Leistung in Filmmusik.
• 2004: den Golden Satellite Award in de Kategorie Best Original Filmmusik för The Last Samurai.
• 2006: den Düütschen Filmkritikerpries in de Kategorie Beste Filmmusik (tosamen mit Nick Glennie-Smith) för Der Kleine Eisbär 2 – Die geheimnisvolle Insel.
• 2009: den Grammy in de Kategorie Best Kompositschoon för Film oder Feernsehn för The Dark Knight

Weblenken

• Hans Zimmer in de Internet Movie Database (engelsch)
• Offizielle Websteed (eng.)
• Diskografie vun Hans Zimmer bi Soundtrack Collector (eng.)
• Hans Zimmer - Komponist in Hollywood (ZDF)
• Hans Zimmer un sien Karibik-Piraten (ZDF)