René Arnoux
René Arnoux (* 4. Juli 1948 in Pontcharra) is en franzöösch Automobilrennfohrer un ehmalger Formel-1-Pilot.
Karriere
[ännern | Bornkood ännern]Mit 10 Johren hett he all en Kart fohren, dat sien Vader hüm baut harr. He hett en Lehre as Kfz-Mechaniker maakt Nah sien Militärdeenst gung he nah Turin, um dor Motoren to tunen. Nah en Drapen mit Jean-Pierre Beltoise 1972 hett he sück entslooten, en Rennfohrerutbillen to maken. Talent harr he un 1973 kunn he all de franzöösch Formel-Renault-Meesterschap up sien Naam schrieven. 1975 wunn he för dat Elf-Team de Formel-Renault-Europameesterschap. 1976 is he to dat Martini-Formel-2-Team wesselt, mit dat he 1977 de Europameesterschap winnen kunn.
Van 1978 bit 1989 is Arnoux in de Formel 1 antreeden. Sien eerste Saison hett he mit dat nee grünnd Martini-Team antreeden, de sien Autos he tovör in de Formel 2 insett harr. Spood harr he nich, dat Auto weer nich konkurrenzfähig, un dat Team harr kien Erfohrung in de Formel 1. In sien wiederen elf Saisons is he för Renault, Ferrari un Ligier fohren un hett dorbi söben Grand-Prix-Siege haalt. 1983 belegg he as best Ergevnis den darten Platz in de Weltmeesterschap.
In Erinnerung bleev sien Duell mit Gilles Villeneuve bi den Grooten Pries vun Frankriek 1979 in Dijon-Prenois um den tweeten Platz. De beid Fohrer hemm sück in de letzt Runnen mehrmals gegensiedig up spektakulär Aart un Wies överhaalt un sück sogor beröhrt. An’t Enn weer Arnoux knapp ünnerlegen. Sien Teamkolleeg Jean-Pierre Jabouille is mit den Renault RS11 ut de Pole-Position start un wunn sluutend nah en körten Kamp mit Villeneuve düütlich. Dat weer nich blots de eerste Sieg för Renault in de Formel 1, sonnern ok de eerste Triumph van en Wagen mit Turbomotor.
Arnoux is 1977, 1994 un 1995 bi dat 24-Stünn-Rennen vun Le Mans antreeden. 1994 reck he up en Dodge Viper den 12. Platz.
Arnoux leevt hüüd in Garches. He is den Rennsport verbunnen bleeven, to’n Bispeel hett he an de Rennen to de Grand-Prix-Masters-Serie deelnommen un is bit 2002 Rennkart fohren.
Arnoux weer tweemal verheiraadt un hett een Dochter. Ünner sien Naam wurr buterdem en Kartsimulatschoon verdreeven, dat René Arnoux Karting. Veer indoor-Karting-Hallen wurrn ünner sien Naam in Paris (2), in Lyon un Aix-en-Provence ünner dat logo KART'IN bedreeven.
Trivia
[ännern | Bornkood ännern]Anfang 1987 weer Arnoux ok afsiets vun de Rennpiste flink ünnerwegens. In en middelfranzöösch Lüttstadt, wo 60 km/h erloovt weern, is he mit 242 km/h dör en Radarkontrolle rast un muss sien Führerschien afgeeven.[1]
Weblinks
[ännern | Bornkood ännern]
Enkeld Nahwiesen
[ännern | Bornkood ännern]- ↑ Notiz in der Zeitschrift iMS (Berlin), Heft 2 (1987), S. 38