Arkadía

Periferieininga Arkadía Περιφερειακή ενότητα Αρκαδίας
Periferi	Peloponnes
Hovudstad	Trípoli
Folketal	77 592 (2021)
Areal	4 419 km²
Folketettleik	18/km²
Kommunar	5
Postnummer	22x xx
Retningsnummer	275x0, 279x0, 2710
Bilnummer	TP
Heimeside	www.arcadia.gr

Periferieininga Arkadía (gresk Περιφερειακή ενότητα Αρκαδίας, Periferiakí enótita Arkadías) er ei periferieining i Hellas i periferien Peloponnes. Hovudstaden i periferieininga er Trípoli. Arkadía har fått namnet sitt frå den mytologiske kongen Arkas.

Arkadía er det største prefekturet på halvøya Peloponnes. Det dekkjer om lag 18 % av heile halvøya, men var ein gong større. Arkadía grensar til Lakonía i sør, Messinía i sørvest, Ilía i vest, Akhaía i nord, Korinthía i nordaust og Argolída i aust. I tillegg har Arkadía kystlinje mot Egearhavet i søraust.

Ein finn skisenter på fjellet Ménalo, om lag 20 km nordvest for Trípoli. Andre fjell er Párnonas i søraust, Artemísio, Olíjyrtos, Lýkeo og Trakhý.

Administrativ inndeling

Tidlegare var Arkadía eit prefektur. Frå 2011 er periferieininga delt inn i fem kommunar.

Periferieining	Kommune	Tidlegare kommune	Postnummer
Arkadía	Gortynía	Dimitsána	220 07
		Vytína	220 10
		Iréa	220 28
		Klítoras	220 28
		Kontovázena	220 15
		Langádia	220 03
		Trikóloni	220 24
		Trópea	220 08
	Megalópoli	Megalópoli	222 00
		Górtyna	220 22
		Falesía	220 21
	Trípoli	Trípoli	221 00
		Valtétsi	220 27
		Korýthio	221 00
		Levídi	220 02
		Mandínia	220 05
		Skirítida	220 16
		Tejéa	220 12
		Fálanthos	221 00
	Nord-Kynouría	Nord-Kynouría	220 01
	Sør-Kynouría	Leonídio	223 00
		Kosmás	230 58
		Tyrós	220 29

Klima

Klimaet i prefekturet består av varme somrar og milde vintrar i aust, sør og lågtliggande område sentralt. Området får hovudsakleg regn om hausten og om vinteren. Snø er vanleg i fjellområda, særleg i vest og i nord.

Historie

Les Bergers d’Arcadie av Nicolas Poussin.

På grunn av det kuperte terrenget og alle fjella har Arkadía alltid vore ein klassisk tilfluktsad. Under den doriske invasjonen, då mykenske grekarar vart erstatta av doriske grekarar langs kysten av Peloponnes, overlevde dei i Arkadía og utvikla den arkadokypriotiske dialekten i antikken.

Ein av mogelege fødestadar for Zevs er fjellet Lycaeum i Arkadía. Lyakon, ein kannibalistisk pelasgisk konge, vart omvandla til ein varulv av Zevs. Fjellet skal òg ha vore fødestaden til Zevs sin son, Hermes.

Arkadía vart ein del av Romarriket og seinare Austromarriket. Tidleg på 1000-talet vart det ein del av Frankarriket. På midten av 1400-talet vart området erobra av Det osmanske riket. I denne perioden vart det grunnlagd mange byar og landsbyar.

Etter 400 år med osmansk okkupasjon vart Arkadía midtpunktet i den greske sjølvstendekrigen. Etter siger i krigen vart Arkadía ein del av den nye greske staten. Arkadía fekk så økonomisk vekst, men noko emigrasjon. Emigrasjonen auka kraftig på 1900-talet og mange drog til Amerika. Mange arkadiske landsbyar mista halvparten av innbyggjarane.

Byar og tettstader

Dei største byane og tettstadene i periferieininga er:

Tettstad	Kommune	Folketal 2011	Folketal 2021
Trípoli	Trípoli	30 866	30 383
Megalópoli	Megalópoli	5 748	5 325
Leonídio	Sør-Kynouría	3 761	3 737
Ástros	Nord-Kynouría	2 285	2 326
Parálio Ástros	Nord-Kynouría	1 043	1 059
Levídi	Trípoli	1 025	920
Paralía Tyroú	Sør-Kynouría	925	784

Kjelder

• Denne artikkelen bygger på «Arcadia» frå Wikipedia på engelsk, den 6. september 2007.

Bakgrunnsstoff

• http://www.arcadians.gr
• http://www.arcadianet.gr/Επιμελητήριο/tabid/36/language/en-US/Default.aspx Arkivert 2012-12-30 ved Wayback Machine.