Carla van Leeuwen

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

Carla Adolphine van Leeuwen (☆ 15 di ougùstùs 1955 na Caracas – † 28 di ougùstùs 1980 na Willemstad) tabata un poeta di Kòrsou. Huntu ku e poetanan Oda Blinder i Aletta Beaujon e ta okupá un lugá úniko den poesia di Kòrsou na idioma hulandes.

Biografia

Carla van Leeuwen tabata yu di Dorothy Debrot i di outor Boeli van Leeuwen. E tabatin un ruman hòmber i un dos ruman muhé menor. Na 1959, na edat di kuater aña, e ta muda pa Kòrsou. E tabata alumno di Dr. A. Schweitzerschool i despues PSC. E ta bai Hulanda pa studia idioma spaño, pero su estadia tabata breve. Bek na Kòrsou e ta kontinua su estudio na Akademia Pedagógiko. Aki el a kuminsa skirbi poema i manera mayoria poeta el a kuminsa publiká su obranan den revista, entre otro den Kristòf. Na edat di 24 aña Van Leeuwen ta debutá ku e kolekshon Because. Esaki tabata kontene diessinku poema, shete na hulandes i ocho na ingles. Segun resensia di Enrique Muller e kolekshon, sin ni sikiera usa e palabranan polítika, pobresa, odio, lucha of eksplotashon, tabata representa un krítika implísito riba sosiedat. Otro tema hopi trata den su poesia ta e posishon intermedio entre mucha i adulto; un posishon ku no tabata fasil pa Van Leeuwen. Sinembargo amor lo por yuda kombatí sentimentunan molestoso.

Na 1980 i ku apenas 25 aña, el a pone fin na su bida dor di bula for di Koningin Julianabrug. Motibu pa cual el a keda sin laga hopi obra atras. Na 2019 a deskubri diferente obra sin publiká, entre otro un kolekshon titulá Interval i algun poema los. Kombinando esakinan ku su promé kolekshon a saka un publikashon di 44 poema na 2021 bou di e título Because en andere gedichten.

Na 1979 el a kasa ku Cor de Boer.

Obra

• 1979 - Because, Sticusa
• 2021 - Because en andere gedichten, Uitgeverij In de Knipscheer

Fuente, nota i/òf referensia

Category:Kòrsou