Indeks di Big Mac

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

Un Big Mac di McDonald's

Kuantu hamburger bo por kumpra ku USD $50? (yanüari 2012)

Indeks di Big Mac ta un método informal di kalkulashon di paridat di forsa di kompra basá riba e preis di un Big Mac (un hambùrger di e kadena mundial di restorant McDonald's) den kualke pais.

E indeks akí ta un kreashon di e semanal británico The Economist na 1986, i ta hasi posibel kompará diferente moneda ku dòler merikano. Ora kompará poder di kompra di dòler merikano ku un otro moneda, bo por mira kuantu dòler e moneda ei ta bal 'realmente' i si e preis di interkambio ta demasiado haltu òf muchu abou.

Den e kaso akí ta hasi e komparashon na un manera hopi simpel, unda ta analisá e preis di un Big Mac, ku nan ta produsí i bende rònt mundu, i asina ta evaluá balor aktual di e moneda.

Indeks di Big Mac, novèmber 2022

Por ehèmpel, na yüni 2005, un Big Mac tabata kosta un averahe di USD $3,06 den kuater siudat merikano, mientras den paisnan di euro e tabata kosta un averahe di € 2,91. Pues por a kumpra e mes un kos pa USD $ 3.06 i alabes € 2.91. Segun e kalkulashon akí e balor "real" di un euro lo tabata 3.06 / 2.91 = 1.05 dòler. Esei ta nifiká ku e preis di interkambio na e momentu ei (USD $ 1,23 pa 1 euro) tabata 17% muchu haltu. Segun e mesun lógika, rubel ruso tabata 52% infrabalorá i korona di Noruega 98% sobrevaluá.

E motivashon pa uso di e indeks akí ta ku un Big Mac ta un sorto di "makutu" di produkto (karni, pan, kròpslá, pero tambe un komponente di labor i elektrisidat), p'esei e ta un averahe rasonabel di e nivel di preis den un ekonomia. Komo ku tin restorant di McDonald's kasi tur kaminda i ku nan ta kumpra nan produktonan lokalmente, e komparashon ta unu interesante. E revista mes ta yam'é "a more fun way to understand exchange rates than textbooks."

Sifra

Tòp 6 mas karu (yüli 2023) E stadistika aki ta mustra e luganan mas karu pa kumpra un Big Mac.

1.  Suisa – $7.73 (€6.99)
2.  Noruega – $6.92 (€6.26)
3.  Uruguay– $6.86 (€6.2)
4.  Argentina–$5.99 (€5.42)
5.  Union Oropeo – $5.82 (€5.26)
6.  Suesia– $5.47 (€4.95)

Tòp 6 mas barata (yüli 2023) E stadistika aki ta mustra e luganan mas barata pa kumpra un Big Mac.

1.  Taiwan – $2.39 (€2.16)
2.  Indonesia – $2.52 (€2.28)
3.  India – $2.54 (€2.3)
4.  Egipto – $2.62 (€2.37)
5.  Sur Afrika – $2.81 (€2.54)
6.  Filipinas – $2.82 (€2.55)

Tòp 6 ganashi mas lihé (yüli 2015) E stadistika aki ta mustra un promedio tempo rekeri pa kumpra un Big Mac den sierto siudatnan rond di mundu na 2015.

1.  Hong Kong - 8.6 min
2.  Luxemburg - 10.3 min
3.  Hapon, Tokio - 10.4 min
4.  Suisa, Zürich - 10.6 min
5.  Estadonan Uni di Amérika, Miami - 10.7 min
6.  Suisa, Genève - 10.8 min

Tòp 6 ganashi mas pokopoko (yüli 2015) E stadistika aki ta mustra un promedio tempo rekeri pa kumpra un Big Mac den sierto siudatnan rond di mundu na 2015.

1.  Kenia, Nairobi - 172.6 min
2. Filipinas, Manilla - 87.5 min
3.  Mexico, Mexico City - 78.4 min
4.  Indonesia, Jakarta - 66.7 min
5.  Egipto, Cairo - 62.5 min
6.  Ukrania, Kiev - 54.7 min