کاجو

کاجو
پچھان
دیس:	بوٹے
برادری:	پھلوالے بوٹے
ٹبر:	امب ٹبر
سائینسی ناں:	Anacardium occidentale

کاجو امب ٹبر دا اک رکھ تے اوہدے فروٹ دی گری دا ناں اے۔ ایہ ٹراپیکی تھانواں وچ اگدا اے۔ ایہدا بی کھادا جاندا اے تے ایہدے بی نوں پی کے اوہدا شربت تے شراب وی بنائی جاندی اے۔ ایہدے چھلڑ نال رنگ تے ہور شیواں بندیاں نیں۔

کاجو دا اصل دیس برازیل سی پر ہن ایہ ویت نام، ہندستان تے نائیجیریا ورگے ٹراپیکی تھانواں تے وی اگایا جاندا اے۔

ناں

کاجو ناں پنجابی وچ پرتگالی وچوں آیا اے پرتگالیاں ایہنوں پہلی واری برازیل وچ ویکھیا سی تے اوہناں ایہدا ناں برازیل دے پرانے ٹوپی لوکاں دی ٹوپی بولی توں لیا سی۔

وکھالہ

کاجو دا رکھ سدا بہار 10-12 میٹر (~32 فٹ) تک لما ہوندا اے جیدا تنا نکا تے انپدھرا ہوندا اے۔ پتے چمڑے ورگے 4 توں 22 سینٹی میٹر لمے تے 2 توں 15 سینٹی میٹر چوڑے ہوندے نیں تے کنڈے نرم پدھرے ہوندے نیں۔ پھل گچھے وچ تے 26 سینٹی میٹر تک لما ہوسکدا اے۔ ہر پھل شروع‏ وچ نکا تے ہلکا ہرا ہوندا اے فیر ایہ رتے رنگ دا ہوکے پنج نکیاں 7 توں 15 ملی میٹر دیاں پتیاں وج ونڈدا اے۔

دنیا دا سب توں وڈا کاجو رکھ برازیل دے شہر نٹال، ریو گرانڈے ڈی نورٹے وچ 7,500 مربع میٹر تے پھیلیا ہویا اے۔ کاجو دا پھل مٹھا تے رسیلا ہوندا اے۔ پھل دے تھلے کاجو دی گری ٹنگی ہوندی اے جیہڑی کہ اک چھلڑ وچ لپیٹی ہوندی اے۔ ایہ گری کاجو رکھ دا بی وی ہے۔

کاجو گری

کاجو دی گری اک عام، پسند کیتی جانوالی تے مینگی گری اے۔ دوجیاں تیل والیاں گریاں دے آڈے نال ایہدے وچ نشاستہ 10٪ ہوندا اے جیھدے باہجوں کھانیاں وچ ایہنوں اسانی نال ورتیا جاندا اے۔ ایہ مٹھے کھانیاں دے سنگھار لئی ورتیا جاندا اے۔ نائیجیریا ایہدے اگانوالا سب توں وڈا دیس اے۔ کاجو دی گری دا چھلڑ زریلا ہوندا اے ایس لئی ویچن توں پہلے اتار لیا جاندا اے۔

ہوند

2010 وچ دس وڈے کاجو اگانوالے دیس
دیس	ہوند MT (میٹرک ٹن)	ہوند (میٹرک ٹن/ہیکٹر)
نائیجیریا	650,000	1.97
ہندستان	613,000	0.66
آئیوری کوسٹ	380,000	0.44
ویت نام	289,842	0.85
انڈونیشیا	145,082	0.25
فلپائن	134,681	4.79
برازیل	104,342	0.14
گنی بساؤ	91,100	0.38
تنزانیہ	80,000	1.0
بنین	69,700	0.29
کل دنیا	2,757,598	0.58
Source: Food & Agriculture Organization

بارلے جوڑ

اتہ پتہ