Призвиско

Призвиско, або фамилийне имя — имя, додаване до крестного имена, наслѣдоване и обще держане цѣлов родинов.^[1] В розличных културах свѣта суть розличны традиции формованя призвиска.

Призвиско ся региструе в державных и церковных матриках, мать правный статус и е средством официалной идентификации особы. Призвиско тыж е словом, а значить мать вшиткы лингвистичны властности, не мать лем едну: лексичне значѣня, котре вытратило ся, напримѣр Нѣмчук днесь уже не е сыном Нѣмця.^[2]

Етимология призвиск

Зачаточно призвиска привязовали особу до:^[1]^[2]

иншой особы, найчастѣйше отця (патроним) — Джонсон (Джона сын), МакДоналд (сын Доналда), Петефи (Петева сын), Макара (Макара сын);
мѣста бываня — Бортнянскый (з Бортного), Мункачи (з Мукачова), Ердели (з Ерделя-Ардяла), Лучкай (з Лучок);
занятя — Ач (тесарь), Варга (обувник), Галас (рыбарь), Ковач, Кочиш, Купарь (чашник), Сабов;
вонкашности особы — Кешеля, Бѣлей, Свѣтлик, Чернега;
иншых знакох.

История заводжаня призвиск

В Англии призвиска зачали ся появляти около року 1000, найскорше в Европѣ, и процес завершив ся по шѣстьох сторочах.^[1]

На Подкарпатской Руси первы русинскы осады и кенизѣ, котры их залюдньовали, споминають ся по року 1213, коли «Коломанъ, молодшый сынъ Андрѣя ІІ., короля угорьського, стауся русськымъ корольомъ».^[3]

Понеже осадници по 6-12 рокох повинны были платити дань з газдовства, мусѣли быти на евиденции и мати официално зарегистрованы призвиска. Меджи первыма такыма задокументованыма русинскыма призвисками суть: 1215 (Сука, Тегзе), 1226 (Тегза-Болобан), 1336 (Кунак), 1360 (Стан), 1375 (Стоян), 1398 (Стойка).^[4]

Масове осадництво стало ся в роках 1300-1400,^[3] а процес цѣлком ся не завершив ани в 16. сторочу, понеже в полонинах еще все были вандровны пастыре, котры не хотѣли перейти на осѣдле бываня.^[5]

В Украинѣ первы призвиска зачали ся появляти лем в 18. сторочу, до того были лем крестны имена, патронимы и прозывкы.^[2]

Яко послѣдна в Европѣ, в року 1935, завела повинны призвиска Турция.^[1]

В Исландии призвиска не екзистують, особа идентификуе ся крестным имньом и патронимом.

См. тыж

Жерела и одказы

Ач, Золтан: Як ся населяли наші села и вароші. //Утцюзнина. Читанка про недїльні школі. Уданя другоє, росшироеноє. Ужгород: ПоліПрінт, 2002. ISBN 966-7966-12-7.
Годинка, Антоний: Утцюзнина, газдуство и прошлость южно-карпатськыхъ Русинувъ. Написау еденъ сокырницькый сирохманъ. (Будапешт, 1923) Перевыданя факсимиле з позадсловом Иштвана Удвари: Nyíregyháza: Nyíregyházi Főiskola, 2000. ISBN 963 9130 63 X
Чучка П. П.: Прізвища закарпатських українців. Історико-етимологічний словник. Львів: Світ, 2005. — 704+XLVIII с. ISBN 966-603-279-1.
Surname. //Encyclopaedia Britannica.

Референции

↑ ^1,0 ^1,1 ^1,2 ^1,3 Surname. //Encyclopaedia Britannica.
↑ ^2,0 ^2,1 ^2,2 Чучка П. П., сс. V-XXVII.
↑ ^3,0 ^3,1 Годинка А., сс. 32-33.
↑ Чучка П. П., словникова часть.
↑ Ач З., сс. 66-69.

[Britannica-1] 1,0 ^1,1 ^1,2 ^1,3 Surname. //Encyclopaedia Britannica.

[Чучка-2] 2,0 ^2,1 ^2,2 Чучка П. П., сс. V-XXVII.

[Годинка-3] 3,0 ^3,1 Годинка А., сс. 32-33.

[4] Чучка П. П., словникова часть.

[5] Ач З., сс. 66-69.

[1]

[2]

[3]

[4]

[5]