Unidade 731

Articulu in nugoresu

Sa Unidade 731 est su lumen de un'unidade de s'esercitu giapponesu chi fit in atividade dae su 1936 a su 1945 in Manciuria (Cina de su Nord-Est), pro la narrer menzus in su campu de Ping Fang postu a nord-est de sa tzitade cinesa de Harbin, chi fachiat parte de su guvernu fantutzu de Manchukuo.

Ponende mente a sos cumandos de su generale Shiro Ishii (espertu bateriologu, fundadore e mere de s'Unidade 731), s'unidade (chi de fatzada fit operativa pro che mondare s'abba) depiat istudiare e isperimentare armas chimicas e biologicas, violande su protocollu de Ginevra chi su Giappone b'aiat postu sa firma in su 1925 ma lu at ratificau petzi in su 1970.

Tra su 1942 e su 1945 a miza e miza de presoneris chi fin mascamente cinesos (feminas e pitzinnos non fachian ecetzione), ma puru mongolos, coreanos, russos e fintzas carchi inglesu e americanu impresonau, los aian impreaos a manera de cavias in paritzos isperimentos de natura estrema.

Sos iscopos de custos fin duos: isperimentare siat armas bateriologicas de usare contr'a s'inimicu pro bincher sa gherra, siat tecnicas terapeuticas novas in sa pedde de sos presoneris chi los fachian ammalaidare a bella posta pro iscoperrer comente si podian sanare a lestru sos sordaos giapponesos a su bisonzu.

S'unidade at tentu sa curpa de aer fattu sos crimines de gherra prus graves e sambenosos de tottus sos militares giapponesos.

In pachitzedos an pacau pro sas fattìas malas issoro: in su 1949 unu tribunale sovieticu b'aiat resèssiu a nde facher processare petzi una dechina. Sos Istados Unidos, chi aian incumintzau su programma de armas chimicas e batteriologicas petzi in su 1943, aian recuperau su tempus perdiu coperinde e fintzas ingaggiande sos de s'Unidade. Sos ateros aian potiu, de custa manera, torrare chietos chietos a sa vida tzivile, a s'ispissu traballande in intro de siendas farmaceuticas o de ateros istaos.

Duas peliculas an zirau in ammentu de su chi an fattu sos butzinos e de su chi an suffertu sas vitimas issoro, Men behind the Sun e Philosophy of a Knife.