Novealla
Novealla lea oalle oanehis teaksta, sáhttá leat moadde siiddu, muhto sáhttá gal leat guhkitge. Dat sáhttá leat movttegis, surgadis dahje ilgadis dáhpáhusa birra, dahje sáhttá govvidit servodaga dahje birrasa. Novealla gáibádus lea, ahte dat lea oanehis áiggi dahje dihto dáhpáhusa birra. Romána fas sáhttá leat guhkes áiggi ja ollu dáhpáhusaid birra. Novealla lea dan láhkai eambbo ráddjejuvvon.
Novealla ii leat dušše iežas vásáhusaid birra, das lea maid hutkojuvvon ávnnas, fikšuvdna. Noveallaid olbmot leat dávjá hutkojuvvon, dahje diktejuvvon. Biras ja olbmot eai leat nu vuđolaččat čilgejuvvon, go románas. Buorre noveallas lea buorre juotna, dahje das leat čielga vuostálasvuođat olbmuid dahje birrasiid gaskka. Buorre novealla lea miellagiddevaš, ja olmmoš lohká dan dávjá álggus gitta lohppii seammás, ja hálida diehtit mii das dáhpáhuvvá.
Novealla dovdomearkkat
- oalle oanehaš
- sáhttá álgit gasku dáhpáhusa, iige mihkkege čilgejuvvo ovddalgihtii, lohkki de dađistaga fuomáša juona
- dáhpáhusat dáhpáhuvvet oanehis áigodagas
- novealla dáhpáhusain leat unnán olbmot
- govvida erenoamáš dili
- loahppa lea dávjá imašlaš, vuorddemeahttun