Tantala

Tga tantala tawila n yat tutlayt, ar sis tsawal kra n trabbut n mddn. Mddn nna izdɣn ɣ yan udɣar iml ad drun yat tantala; tad ar as ttinin "tantala tanmnaḍt". Mddn lli mmrwasnin s kra n tɣarast, zun d asmil anamun, ẓḍaṛn ad drun kra n tantala.

Ur illi kra n unuḥyu ifawn gr tantala d tutalyt. S umdya, tantala n Ayt Baɛmṛan d tin Iḥaḥan gant tantalayin n tutlayt taclḥiyt. Ur mmzrint amr s imikk ɣ umawal d ustutli. Mqqar illa imikk n unuḥyu, ar ttiẓḍiṛn imssiwln sisnt ad ttnyalkam, irms ku yan winn yaḍn.

Taɣtst f is iga yan ungraw utlayan tutlayt nɣ tantala kra n tikkal da ittgga asttay asrtan s uwttas n wammaẓ (assimilation) n trubba drusnin (minority) n mddn nɣ af ad gin agzzum zɣ tdlsa tanamurt mqqurn. Yat tikklt inna umsnils Maks Weinrix, s taḍsa, ma s d "Tutlayt tga tantala iṭṭafn tasrdast d tylant".

Imdyatn

Tutlayt Tajapunit d Tukinawant lant assaɣ gratsnt acku gant snat itsnt zɣ twja n tutlayin tijapunikin, maccan ur illi unyarmas gratsnt. Lliɣ yukʷi uwank n Jappun f Ukinawa ɣ uzmz n Miji, ar tettini tnbaḍt n Jjapun is d tantala n Tjappunit ka ad tga Tukinawant. Aya tssmrst afad ad tgdl awal s tukinawant f ayt dars, tsbzziz fllasn Tajappunit.

Takatalant d Tgalisyant kkant tt inn ar ttwsiḍannt zun d tantlayin n Tṣbnyult, macc dɣi ttyakaznt zun d tutlayin. Acnt lli s aẓnt i Tbrṭqqizt d Tuksitant, a s aẓnt i tṣbnyult.

Tinglizt, ass ad, ibayn is tga tutlayt, macc tkka tt inn tga Tanglu-saksunt, yat tantala n Tsaksunt Taqburt.

Imzarayn g tantlayin ẓḍarn ad gin:

• Tiguriwin: Gawr ɣ kra n tqbilin d Skkiws ɣ tiyyaḍ.
• Asusru/astutli: t ɣ kra n tqbilin, ar ittwstutli s. (Amdya: Sasa / Tasa)
• grammar: tanzɣt s (tanilant) ɣ kra tantlayin ur da tsskcam ism tt iḍfarn s addad amaruz, ɣ tantalyin yaḍn ar t tsskcam. (Ddiɣ s agadir / Ddiɣ s ugadir).