Alberto Moravia

Alberto Moravia (Romë, 28 nëntor 1907 - 27 shtator 1990), i lindur Alberto Pincherle, Moravia ishte mbiemri i gjyshes nga i ati, ka qenë një shkrimtar dhe publicist italian, njëri prej përfaqësuesve më të njohur të letërsisë ekzistenciale evropiane.

Lindi në një familjeje borgjeze në gjendje të mirë ekonomike. I ati, Carlo Pincherle, arkitekt dhe piktor, vinte nga një familje hebreje me origjinë veneciane, ndërsa e ëma, Gina de Marsanich, ishte katolike nga Ancona. Alberto, i treti nga katër fëmijë, kaloi një fëmijëri normale por të vetmuar. Në moshën nëntë vjeçare, ai u prek nga tuberkulozi i kockave, sëmundje me dhimbje të tmerrshme që e gozhdoi në shtrat për pesë vjet rresht.

Studimet i vazhdoi në mënyrë të çrregullt, por prapë nuk arriti të kryejë më shumë se gjimnazin. Lexoi shumë e shumë libra, mes të cilëve Dostojevskij, Joyce, Goldoni, Shakespeare, Molière, Mallarmé, Leopardi e mjaft të tjerë; shkruante vargje në frëngjisht e në italisht, por studioi edhe gjermanisht.

Libri i tij i parë, romani "Indiferentët" (1929) i shkruar në moshën 18-vjeçare, e bëri menjëherë të njohur.

Shumë nga romanet e tregimet e Moravias janë bërë edhe filma nga regjisorë të rëndësishëm të pas-Luftës së Dytë si Bernardo Bertolucci ("Konformisti"), Jean-Luc Godard ("Përçmimi"), apo Vittorio de Sica ("Çoçarja"). Alberto Moravia vdiq më 29 shtator 1990, në banesën e tij në Romë.

Lidhje të jashtme

• Letërsia zemra shqiptare Arkivuar 5 mars 2016 tek Wayback Machine