Hans Holbein (die Jungere)

Hans Holbein die Jungere (bädden^[1] in 1497 af 1498 in Augsbuurich; stuurwen ap dän 29. November 1543 in London), die Suun fon Hans Holbein dän Allere, waas aan Moaler, Teekner un Grafiker fon ju Renaissance.

Lieuwend

Uutbielded wude hie fon sin Foar, die uk al aan Moaler waas.

In 1515 touhoope mäd sin Bruur Ambrosius Holbein een Loopboan as Illustrator in ju flöörige Boukpränt-Stääd Basel beginnend, illustrierde hie Wierke fon bekoande Skrieuwere, t.B. fon Desiderius Erasmus un Thomas Morus, mäd do hie leeter noch bekoand wäide skuul.

In 1519, dät Jier, as weerskienelk uk sin Bruur stoorf, die mäd him ju Wierksteede hiede, hilkede hie dät fjauer Jiere allere Wiedewieuw fon aan Baseler Leeder-Beräider. So kuude hie in 1520 Burger fon ju Stääd un Lid fon ju Baseler Moaler-Gilde wäide.

Twisketruch (in 1523/24 in Frankriek, ätters fon 1526 bit 1528 in Änglound, lieuwde noch bit 1532 in Basel. Man do roate dät ätter aan protestantisken Bieldenstoarm, un dät moaljen fon religiöse Bielden waas ferbeeden. Also hiede die Moaler minner tou dwoon, un hie geen wier ätter Änglound wai. Deer moakede hie truch ju Fermiddelenge fon Desiderius Erasmus ju Bekoandskup fon Thomas Morus, die him tou ferskeedene Apdraage ferholp un him uk dän Keening Hinnerk VIII. foarstoalde, foar dän sien Weerskup mäd Anne Boleyn hie ju Dekoratsjoon äntwoorp.

Die Keening heelt gjucht ful fon Holbein: Insen, as aan Lord koom, un sik besweerde, dät hie fon dän Moaler beleediged wuden waas, kwad die Keening: "Jie skällen wiete, dät iek fon soogen Buuren in een Minute soogen Lords moakje kon, man fon soogen Lords fon Jou Sleek kon iek nit insen aan Holbein moakje."

Hinnerk VIII. (bekoand deerfoar, dät hie 6 Wieuwmoansken ätter eenuur hiede) soande, as hie insen wier hilkje wüül, Hans Holbein in 1539 ap dät Fäästlound, uum Christina fon Deenemäärk un in Kleve do bee Dochtere fon dän Heertoach Johann III. tou moaljen. Uumdät hie ju Bielde fon Anna fon Kleve gjucht froai foont, wüül hie hier hilkje. As ju dan in äächt foar him stuude, foont hie hier minner froai as ap ju Bielde. In ju Foulge doarste Holbein, indäid noch Hoafmoaler, nooit moor een Lid fon dän Keening sien Foamielje moalje.

In 1543 wude hie tou een Offer fon ju Päst.