Back to the Future
Back to the Future el ze un film de'l 1985 direto da Robert Zemeckis e intarpretà da Michael J. Fox e Christopher Lloyd.
Primo epizodio de ła triłozìa omònema, el ze considarà n'icona de'l sinema dei ani otanta e el ga otenjùo un enorme suceso a łeveło intarnasionałe.[1][2][3] El film el ga resevùo el premio Oscar a'l mejo montagio sonoro.
Inte'l 2007 el ze stà sernìo par èsar consarvà inte'l National Film Registry de ła Biblioteca del Congresso dei Stati Unìi.[4]
In ocazion de'l só 25º aniversario, el 27 otobre 2010 el film el ze stà reproponesto par un soło zorno inte łe sałe sinematogràfeghe itałiane, statunitensi e britàneghe;[5] ła mèdema cosa ła se ga ripetùa el 21 otobre 2015, in corespondensa de ła data de viazo verso el futuro dei protagonisti inte'l segondo capìtoło de ła serie.[6]
Trama
[canbia | canbia el còdaxe]Hill Valley, California, 25 otobre 1985. Marty McFly el ze un dizisetene studente de łiceo, pegro e speso retardatario ma corajozo, zentiłe e de bon cuor, fidansà co Jennifer Parker, só coetanea e conpanja de scoła. Marty el sonja de deventar na rockstar e el sona ła ghitara inte un grupo rock amatoriałe, pur sensa tanta fortuna: el grupo el vien infati bocià a'l provin par sonar a'l bało de ła scoła, parché i docenti i retien Marty e i só conpanji "masa bacanozi".
El tozo, da senpre, el dezidara na vita mejo e pì còmoda (l'automobiłe dei só sonji ła ze un łusuozo fuoristrada 4x4 che no'l pol parmétarse) e no'l se dà paze par ła piata ezistensa sua e dei só famejari: só pare George, fin dai tenpi de ła scoła, el ze totalmente sucube de'l buło Biff Tannen, deso só caoufici, che'l ghe ga sfasà ła màchina co ła cuała Marty el gaveva promeso de portar Jennifer in canpegio; só mare Lorraine ła ze na dona alcołizada, zlòtara e scontenta da ła non serto ezaltante vita co George; i só do fradełi majori i dezvolze łaori poco apaganti e oncora i vive a caza co i zenidori.
Marty el juta speso el só mejo amigo, un vecio siensià de nome Emmett Brown, dito "Doc", considarà fin masa stranbo da parte de ła comunità de Hill Valley. 'St'ùltemo el ghe dimanda a'l tozo de razónzerlo cheła istesa note inte'l parchegio de'l Twin Pines Mall, un gran sentro comersiałe, par filmar un misteriozo esparimento.
Na volta rivà so'l posto, Marty el descoverze che'l siensià el ga costruìo na màchina de'l tenpo modifegando na DeLorean DMC-12, e l'esparimento da filmar el consiste inte l'inviar inte'l futuro (un menuto vanti) el cane de Doc, Einstein. El viazo inte'l tenpo el avien tramite el "fluso canałizador", dispozitivo costituìo da tre tubi ełetròneghi disposti a Y, che'l se ativa automategamente cuando ch'A se porta ła vetura a ła vełosità de 88 meje orarie.
L'esparimento el riese, co ła màchina de'l tenpo che ła desparise par po' reconparir daspò un menuto ma sùito dopo sorazonze un commando teroristego da ła Łibia (a'l tenpo un stato canaja dei Stati Unìi) a ła cuała Doc el ghe gaveva cavà via de'l plutonio, nesesario par inescar na reasion nuclear che ła ghe fornise enerzìa a'l "fluso canałizador". Doc el vien copà dai teroristi co na descarga de mitra; Marty, fuzindo co ła DeLorean, el razonze ła vełosità de 88 meje orarie, sensa saver de aver inavertitamente ativà el fluso canałizador el se cata cusì catapultà a'l 5 novenbre 1955, data che Doc el gaveva dizità so'l display par spiegarghe a Marty el funsionamento de ła màchina, in corespondensa a ła cuała el gaveva avùo par ła prima volta na vizion de'l fluso canałizador. Daspò el viazo, ła DeLorean no ła pol repartir par tornar inte'l futuro, in cuanto onji carga de plutonio ła ghe consente un singoło viazo e Marty, inpenjà a scanpar via dai łibici, no'l ga portà co sé na segonda carga, cuindi el resta blocò inte'l 1955.
Notasion
[canbia | canbia el còdaxe]- ↑ (EN) Georgios Kotsolios, Back to the Future of Marketing, Trafford Publishing, 2014, p. 9, ISBN 978-1-4907-0418-0.
- ↑ Alessandro Bandinelli e Valentina Zaggia, Comunicare con il Video, Bruno Editore, 2011, p. 26, ISBN 978-88-6174-321-2.
- ↑ Giampiero Francesca, Simone Isola e Luca Lardieri, Steven Spielberg: cineland express, Sovera Edizioni, 2008, p. 136, ISBN 978-88-8124-778-3.
- ↑ (EN) Librarian of Congress Announces National Film Registry Selections for 2007loc.gov, 27 dicembre 2007. entrada il 2 gennaio 2012.
- ↑ Ritorno al Futuro torna al cinema per un giorno: il 27 ottobre 2010 tutti al cinemacineblog.it, 14 ottobre 2010.
- ↑ Ritorno al Futuro DAYnexodigital.it (archivià dal URL orizenałe il 15 ottobre 2015).
Bibliografia
[canbia | canbia el còdaxe]- (EN) Michael Klastornin e Sally Hibbin, Back to the Future: The Official Book to the Complete Movie Trilogy, Londra, Hamlyn, 1990, ISBN 0-600-57104-1.
Altri projeti
[canbia | canbia el còdaxe]
Wikimedia Commons el detien imàjini o altri file so Back to the Future
el detien schemi gràfeghi so
Linganbi foresti
[canbia | canbia el còdaxe]- (inglezo, spanjoło, IT) Sito ufisałebacktothefuture.com. Sconosesta: inglezo e spanjoło (juto)
- (EN) Back to the FutureEnçiclopedia Britannica, Encyclopædia Britannica, Inc.
- (EN) Back to the FutureThe Encyclopedia of Science Fiction.
- Back to the FutureCineDataBase, Rivista del cinematografo.
- Back to the FutureMYmovies.it, Mo-Net Srl.
- Back to the FutureMovieplayer.it.
- Back to the FutureFilmTv.it, Arnoldo Mondadori Editore.
- Back to the FutureIl mondo dei doppiatori, AntonioGenna.net.
- (EN) Back to the FutureInternet Movie Database, IMDb.com.
- (EN) Back to the FutureAllMovie, All Media Network.
- (EN) Back to the FutureRotten Tomatoes, Flixster Inc.
- (EN, ES) Back to the FutureFilmAffinity.
- (EN) Back to the FutureMetacritic, CBS Interactive Inc.
- (EN) Back to the FutureBox Office Mojo.
- (EN) Back to the FutureTV.com, CBS Interactive Inc.
- (EN) Back to the FutureAFI Catalog of Feature Films, American Film Institute.
- (EN) Back to the FutureBFI Film & TV Database, British Film Institute.
