Clasifegasion de Gell e Coombs
Ła Clasificaxion de Gell e Coombs ła riguarda i diversi tipi de reaxion imunitarie del'organismo e la xe sta fata inte el 1963 da sti do imunologi inglesi. Ancò ła sarìa un fiatin masa schematica, ma ła conserva oncora ła so vałidità e ła so praticità. Par Gell e Coombs, łe reaxion imunitarie łe xe de 4 tipi.
Reaxion de 1° tipo
[canbia | canbia el còdaxe]Ła xe na reaxion imediata, ligà all'axion de specifiche imunoglobuŀine E, o IgE, che xe anticorpi che se taca da na parte al'aŀergene e da l'altra ai mastociti e ai granułociti basofiłi, çełułe del'organismo che le ga drento diversi granei pieni de mediatori chimici. Quando che se forma sto ponte ałergene-IgE-mastocita, vien sgranà fora tuti i mediatori chimici, che provoca diłataxion dei vasi del sangue, crèsita de ła permeabiłità vascołare e contraxion de ła muscoładura dei bronchi. El tuto in pochi minuti, masimo mesora. Reaxion de 1° tipo łe pol dare asma, rinite, congiuntivite, orticaria, sintomi de ałergia ałimentare, anafiłasi.
Reaxion de 2° tipo
[canbia | canbia el còdaxe]Łe vien ciamà anca reaxion citotosiche parchè łe çełułe łe vien desfà da de łe imunoglobułine G o M, IgG e IgM, che łe se taca ai antigeni de łe menbrane de łe çełułe stese. Par far questo, sti anticorpi i ga bisogno che ghe sia el conplemento. Un esempio de reaxion de 2° tipo xe ła emołisi da medesine.
Reaxion de 3° tipo
[canbia | canbia el còdaxe]Łe xe ligà al fato che se forma dei conplesi antigene-anticorpo, tacà insieme, che i xe solubiłi e i se deposita sui tesuti, màsima sui vasi e sui glomerułi dei reni. Quando che riva anca el conplemento, se scadena na forte reaxion infiamatoria. Tuto el vien fora inte el giro de 8-10 ore. Małatie da reaxion de 3° tipo xe tante de quełe da łavoro, come el polmon del contadin par esempio, e çerte małatie dei reni.
Reaxion de 4° tipo
[canbia | canbia el còdaxe]Łe xe reaxion fate da çełułe, da ipersensibiłità ritardà. Qua no xe in canpo i anticorpi, ma de łe çełułe del sistema imunitario, i łinfociti T, che cołe so sostanse che i łibera, łe łinfochine, i desfa çełułe e bateri e i stimoła na forte reaxion infiamatoria anca de altri elementi (macrofagi e granułociti neutrofiłi). I tempi che ghe vol parchè se sviłupa tuta ła reaxion i xe de 24-48 ore. Małatie da reaxion de 4° tipo xe i esèmi da contato o dermatiti da contato, che i vien fora, anca questi, tante volte in tel ambiente de łavoro.
Wikimedia Commons el detien imàjini o altri file so Clasificaxion de Gell e Coombs
el detien schemi gràfeghi so
