Istria

Istria
	; in roso i confini pi' streti e slargai
Sorte	Penìzola
Liogo
Rejon aministrativa	Rejon istriana (Croàsia)
Bagnà da	mar Adriàtego
Dati e sifre
Traversa	Itàłia, Croàsia e Slovènia

L'Istria o Ístria (in croato e in sloveno Istra) ła xe ła più granda penìzoła del Mar Adriatico (superfice: suparzó 3 500 km²).

La màgior parte de l'Istria ła fa parte atualmente de ła rejon istriana e de ła rejon łitoraneo-montana de ła Croazia, . Un tocheto, che ciapa drento łe sità costiere de Ìxoła d'Istria (Izola), Portoroxe (Portoros), Piràn (Piran) e Capodistria (Koper), el fa parte invese del teritorio de ła Slovenia. Un tòco ncora piesè picenin de ła penìzoła (limità suparzó a ła zona dei comuni de Muja e de San Dorligo della Valle/Dolina) el xe in teritorio itałian.

Ła costa ocidentałe de l'Istria ła xe longa 242,5 km (co łe ìzołe 327,5 km) e queła orientałe ła xe 202,6 km (contando i isołoti ła riva a 212,4 km). Tuta quanta ła costa ła xe longa 445,1 km.

Sità

Łe sità inportanti de l'Istria łe xe:

Abazia (tał. Abbazia; cro. Opatija) (Aministrativamente ła fa parte del Quarnaro)
Albona (cro. Labin)
Buje (tał. Buie; cro. Buje)
Capodistria (slo. Koper; cro. Kopar)
Dignan (tał. Dignano; cro. Vodnjan)
Piemonte d'Istria (cro. Zavrsje)
Montona (cro. Motovun)
Muja (slo. Milje)
Parenso (tał. Parenzo; cro. Poreč)
Pinguente (cro. Buzet)
Piràn (tał. Pirano; slo. Piran)
Pisìn (tał. Pisino; cro. Pazin)
Poła (tał. Pola; cro. Pula)
Rovigno (cro. Rovinj)
Umago (cro. Umag)

Oltre a ste chì, xe inportanti anca łe picołe sità de Colmo (Hum) e Rozzo (Roč).

Storia

L'Istria preromana e romana

El nome el deriva da ła tribù illirica dei Histri, ricordai da Strabone come abitanti de sta rejion. I Romani i łi descriveva come na tribù feroce de pirati de l'Illiria, proteta da ła dificoltà de navigasion de łe so coste rocioxe. Ai Romani ghe ga vołest do campagne miłitari par sotometarli inte el 177 a.C..

El Medioevo

Dopo ła fin de l'Impero Romano d'Occidente, l'Istria ła xe stada sachegiada dai invasion di Awari e Slavi i xe venuti drio i Longobardi. Son restai i longobardi in Istria inseme cola popołasion romana. Dopo una parte ła xe pasada soto el controło de Bisanzio (538). Inte sto periodo storico se ga sviłupà un diałeto ladin parlà dai abitanti romani de l'Istria setentrional (inte l'Istria meridional se ga sviłupà l'Istrioto. Ła xona istriana ła xe stada anessa al Regno Longobardo (588) di Friuli e Venesia e dopo al Regno Franco da Pipino III (789), re dei Franchi e Longobardi, e ła xe deventada na Marca, par dopo esar controłada dai duchi de Merano, dal duca de Baviera, dai duchi de Carinzia e dal patriarca de Aquileia. Inte el 933, co ła pace di Rialto, Venezia ła ga otegnù un primo riconosimento del dirito de navigar e de far comerci sułe coste istriane: inte sto periodo storico dei popołi itałici i se ga spostà suła costa de ła xona e ghe xe stadi de insediamenti de popołi slavi inte ła parte interna istriana.

Periodo venesian

L'Istria ła xe deventada squasi tuta teritorio de ła Repubblica di Venezia piassé dal 1420 finché Napoleon no ła ga fata finire inte el 1797.

Inte el periodo venesian l'Istria ła xe stada periodicamente devastada da guere e pestiłense; par sto motivo ła Repubblica di Venezia ła ga ripopołà l'interno de ła rejion co cołoni de diverse razze slave (oltre che de greci e albanesi), trasferìi dai chełaltri so posedimenti. In Istria, cusì, se ga formà ła tipica composision etnica, co ła costa e i çentri urbani de lengua italiana e łe campagne abitae pi che sia da slavi.

Periodo napoleonico

Dopo el trattato de Campoformio l'Istria insieme a tut el teritorio de ła Republica de Venesia ła xe stada data ai Asburgo de Austria. Dal 1805 al 1813 ła xe stada dominada diretamente da Napoleon. Dal 1805 al 1808 ła ga fat parte del Regno d'Italia napoleonico, e dopo de łe Province illiriche diretamente anese a l'Impero francese.

Dominasion asburgica

Inte el 1814 l'Istria ła xe tornada soto ła dominasion dei Asburgo. Inte el 1825 l'Impero austriaco el ga fondà ła provincia istriana, che inte el 1861 ła xe deventada autonoma co na so dieta a Capodistria (Marchesado d'Istria).

Inte el periodo de ła dominasion asburgica l'Istria ła jera abitada da italiani, croati, sloveni e grupi pi ridoti de vałachi/istro-rumeni e serbi.

Secondo el censimento austriaco del 1910, el total de 404 309 abitanti de l'Istria łi se divideva in sto modo:

168 116 (41.6%) i parlava croato o serbo
147 416 (36.5%) i parlava italian
55 365 (13.7%) i parlava sloveno
13 279 (3.3%) i parlava tedesco
882 (0.2%) i parlava rumen
2 116 (0.5%) i parlava altre lengue
17 135 (4.2%) i jera çitadini stranieri che no ghe xe stat domandà ła so lengua madre (tanti de questi i jera çitadini italiani).

Inte el XIX secoło se ga sviłupà i movimenti nasionałi italian, croato e sloveno. Co ła nasita de sti movimenti ga scumisià łe prime barufe intrà i italiani da na parte e ii slavi da chełaltra, parché ognun dei grupi el gavarìa vołest l'anesion de ła rejion a ła so madrepatria.

Esendo una de łe tere reclamae da l'iredentismo italian, el governo austro-ungarico el ga fat in modo che ghe inte ła rejion se trasferese altri slavi par contrastar el nasionałismo dei italiani.

Un pas importante el xe stat el trasferimento da Venesia a Poła de ła base pi granda de ła Marina austriaca. Sta deçixion ła xe stada fata in seguito a l'insuresion de Venesia inte el 1848-49. In pochi ani Poła ła ga fat na cresita grandisima, pasando da pochi çentener de abitanti ai 30-40 000 de fin '800.

Grandi i xe stati i benefiçi su l'economia de ła penìzoła, che inte i ultimi ani del dominio asburgico ła ga prosperà, anca grasie al turismo balnear da tutte łe rejion de l'Impero.

Ła prima e ła seconda guera mondial

In seguito a ła vitoria 'taliana inte ła prima guera mondial col tratato de Versailles (1919) e'l tratato de Rapallo (1920) l'Istria ła xe deventada parte de l'Italia. Co l'arivo del fasismo xe scumisiada na pułìtega de italianixasion forsada. Inte ła seconda guera mondial, par colpa de l'ocupasion de ła Jugoslavia da parte de łe potense de l'Asse łe rełasion intrà italiani e slavi łe se ga guastà uncora de pi.

L'8 de setembre del 1943 el Regno d'Italia el xe stat sconfito e l'esercito italian el se ga desfà. Ła rejion ła xe stada ocupada par poco tempo dai partigiani titini, e dopo dai tedeschi che i ła ga anesa al Terso Reich a l'interno del cosideto Adriatisches Kustenland. Tra l'april e'l majio del 1945 l'Istria ła xe stada ocupada da novo dai partigiani titini.

El dopoguera

A la fìn de ła seconda guera mondiał l'Istria, salvo Muja e Pola, la vien ocupada del esercito jugoslavo. Cola Conferenza de Paxe e col tratàdo de Parigi (1947), vien deciso che squasi duta l'Istria, Pola inclusa, ła passi a ła Jugoslavia. La parte istriana nordocidentał (500 km²) de Ancaràn a Citanova, ła gavarìa dovesto far parte del Territorio Libero de Trieste come zona B, co capologo Capodistria, insieme co la zona de Trieste cità e dintorni, dita la zona A (200 km²) Ma anca sta zona B la ga continuà a restar soto ocupaziòn militar Jugoslava, intanto che a Trieste cità xe restai i Angloamericani. Pò, visto che pasava i ani e mai no se rivava a meter in pìe sto TLT, i aleati ga lassà che italiani e jugoslavi se spartissi provisoriamente el Teritorio Libero de Trieste, cussì Italia e Jugoslavia le ga firmà iinte el 1954 el memorandum de Londra , e anca la zona B la xe stada incorporada definitivamente a la federativa Jugoslava. Sta spartiziòn del TLT qualchi ano dopo la xe stà de novo confermada, cò Italia e Jugoslavia le ga firmà intrà de lore el trattato de Osimo (1975). De facto solo Mùia, che jera el unico paexe istrìan inserido in zona angloamericana, dentro la Zona A, xe desso teritorio aministrativo taliàn. Intant un gran numaro de 'taliani jera stai copadi inte el masacro dele foibe, sia inte el Istria che inte el Carso triestìn. El teròr par sti masacri, seguìo dela represion e dele vesazioni operade sui italiani dele 'utorità Jugoslave, l'a portà a scampar de l'Istria squasi tuti i abitanti 'taliani, tanti subito tel 1945-46 e tanti che ga provà a restar ma dopo ani no i ga podù pì resister. Inte el 1954-56, xe stà la ultima ondada del’esodo , cò i abitanti de la zona B ga visto sparir le ultime speranze che vegnissi fato el TLT : in totàl l’Istria la ga perdù metà dela so popołasion e de ła so identità sociał e culturał. El drama dei taliani de l’Istria se ga vìsto sora detuto col esodo de Poła concentrà tra el disembre del 1946 e el marso del 1947, in sti pochi mesi ła sità la xe stada bandonada de oltra 28 000 dei so 32 000 abitanti. I polesani fino inalora jera i unici istriani che no gaveva oncora dovesto scampar visto che Pola cità jera soto ocupaziòn angloamericana: i jugoslavi i jera tuto intorno ma no a Pola. Cò se ga savù che el tratado de paxe de Parigi firmado el 10 febraro 1947, el asegnàva Pola a la Jugoslavia, in un impeto de disperasion, tuti a Pola ga deciso de scampar, xe stà organizà navi, e i polesani ga zercà de portar via tuto quel che se podeva e parfin desoterà del zimisterio Nazario Sauro, portandose via la salma. Stò esodo de Pola, l'unico esodo che ga podù eser organizà uficialmente de l'Istria, el ga vu granda difusion dela stampa internasional. Tel 1991 la Jugoslavia se ga disolto e l'Istria desso risulta spartida intrà Slovenia e Croazia. Dopo de sto esodo dei italiani, tanti paesi e campagne xe restàe despopolàe e ghè ndà a starghe croati, sloveni e tanti jugoslavi de zone anca ssai lontane.

La comunità italiana in Istria

Inte el dramàtego contesto storico de la fin de la II guera mondiale, inte la rejon triestina, istriana, fiumana e dalmata 4 000-17 000 persone le xe stà copà (ma sul nùmaro efetivo de le vìtime se discute aspramente oncora desso). A causa del terór provocà dai massacri e de le vessazioni del governo jugoslavo, circa el 90% de la popołasion 'taliana el ga lasà la so tera. Le stime dei profughi le varian da le 200 000 a le 350 000 persone (comprese Fiume e la Dalmazia). Par comemorar sti dramàteghi avegnimenti, dal 2005 i ga istituìo in Italia un Dì del ricordo el 10 febraro (aniversario de la ratifica del tratado de pace).

Fra i esuli istriani devegnesti famosi se ricorda:

Alida Valli (Alida Maria Laura Altenburger baronessa von Marckenstein und Frauenberg), atora.
Laura Antonelli (Laura Antonaz), atora.
Nino Benvenuti, pugile.
Fulvio Tomizza, scritor.
Sergio Endrigo, cantante.
Agostino Straulino e Nicolò Rode, velisti.
Mario Andretti, pilota automobilistego.
Antonio Marceglia, incursor de la marina, medaja d'oro al V.M.

Inte el 1954-56 i taliani lassa anca la zona B e l'esodo xe quasi sconcluso. La Jugoslavia ga otignù tuta l'istra, i taliani li ga fati scampar squasi duti e le persecusion pol calar anche quele. Ai istriani italiani, che iera restai, perlopiù i comunisti o i veci che no podeva moverse, la repùblega socialista jugoslava ghe lassa qualche blanda tutela. In tante cità de l'Istria i italiani praticamente no xe più ma la bandiera dela comunità italiana (el tricolor co in mezo la stela rossa) la podeva esser picà sui edifici publici e durante le cerimonie. Ano drìo ano sempre pì scole diventa scole slovene o croate, resta sempre manco le scole dove se insegna in italian. Le tabele, un primo periodo fino al 1949 soto l'italian vien zontà el serbocroato, ma in breve diventa scrito tuto in serbocroato e dopo soto in italian. Par i italiani vien stampade un par de publicasion periodiche propie ( de ideołozia comunista ) e a Capodistria una stazion radio in italian, ssai utilizzada anca par difonder verso l'Italia la propaganda jugoslava. Tel 1953 quando diventa ciaro che Trieste no diventerà jugoslava, a Pola, Fiume e tanti altri loghi vien organizade manifestazioni antitialiane, vien dispicade le tabele in italian, eliminà el bilinguismo. Tuto diventa monolingue serbocroato e el ministro del'istruzion jugoslavo decreta serade le scole in italian.

Dopo del sfacelo dela Jugoslavia, el novo Stato Sloveno ga bastanza confermà le tutele, anca se no xe praticamente italiani xe bilinguismo sule tabele. Inveze in Croasia, par via del nasionalismo del partio nasionalista HDZ de Franjo Tuđman, che iera stado tra l'altro el principale artefice dela indipendensa, ghe iera stai 'ssai tentativi par limitarghe i diriti ai italiani e par no riconoser la particolarità de l'Istria. I istriani de ogni raza alora i fondava la Dieta Democràtega Istriana, un partio senza una forte conostasion de etnia, che lotava par otegnir l'autonomia de l'Istria a l'interno dela repùblega croata. Quando che el HDZ xe stado sconfito, ai italiani in Istria i ghe ga riconosudo le tutele che i gaveva prima soto la Jugoslavia.

Dialeti

I taliani d'Istria i parla do difarenti dialeti autoctoni: l'istrovèneto e l'istrioto, entranbi presenti da prima de la dominasion venexiana (anca se tanti pensa el contrario).

Fra i croati istriani xe prevalentemente doparà el dialeto ciaciavo e in minor misura el stokavo.

Istrorumeni

In tel'Istria interna sopravive na picenina comunità de Istrorumeni, i Ciribiri inte la piana de l'Arsa e i Cicci a Seiane/Sejane (Cicceria), disendenti dei rumen-valachi, un tenpo tanto più numerosi, vegnùi a star in sti teritori inte el tardo Medioevo. Al dì d'ancuò, purtropo, la so lengua e cultura e la so stessa identità nassional le xe a serissimo ris-cio d'estinsion a causa del secolare processo de assimilasion a l'etnia croata e slovena (processo de slavixassion, par lo più naturale), ma anca a causa del scarso intaresse e de la mancansa de tutela da parte de le istitussion.

Varda anca

Colegamenti par fora

Wikimedia Commons el detien imàjini o altri file so Istria
Scholia el detien schemi gràfeghi so Istria
Sito multilengue su l'Istria
L'Istria, la regione che amerete!
Region Istriana - Sito ufisiale
http://www.unionestriani.it/ (ligo ronpesto dispunìbiłe in Internet Archive; védarse el istòrego, la prima version e ła ùltema).

Unión dei Istriani - Lìbara Provincia de l'Istria in esilio

http://www.irci.it/ Istituto Rejonal par la Cultura Istriano-fiumano-dalmata
Relasion de la comision mista sui raporti italo-sloveni (ligo ronpesto dispunìbiłe in Internet Archive; védarse el istòrego, la prima version e ła ùltema).

Controło de autorità	LCCN (EN) sh85068764 · GND (DE) 4027824-4