Donskoi (lidn)

Donskoi
Донской

Lidnanznam	Flag
Valdkund	Venäma
Eläjiden lugu (2021)	63,837 ristitud
Pind	47,58 km²
Pämez'	Jelena Aleksandrova (reduku 2019—)
Telefonkod	+7−48 746-xx-xxx
Avtokod	71
Aigvö	UTC+3 (MSK+0)

Donskoi (ven.: Донско́й) om Venäman lidn da lidnümbrik Tulan agjan päivnouzmas. Se om agjan koumanz' lidn eläjiden lugun mödhe, röunatab agjan kahtendenke Novomoskovsk-lidnanke lodehes.

Istorii

Eländpunktan aluz om pandud vozil 1773−1776 kuti Jekaterina II-imperatornaižen illegitimižen Aleksei Bobrinskii-poigan usadib (jumalanpert', kaumuz i puišt oma kaičenus). Vl 1881 löutihe burad hil't usadiban ümbrištos, i vspäi 1883 saudihe kaivuzid samha hil't. Kätihe kaivajiden žilod A.I. Rikovan kaivudenno Donskoi-radnikžiloks vl 1929. Se oli Donskoin rajonan administrativižeks keskuseks vll 1932−1963. Anttihe radnikžilole lidnan statusad vn 1939 19. päiväl sügüz'kud. Buran hilen varad tuliba lophu 1960-nzil vozil.

Mülütihe lidnha mikrorajonikš nenid eländpunktoid vl 2005: Severo-Zadonsk-lidn, radnikžilod Podlesnii, Rudnev, Novougol'nii, Komsomol'skii, Kaivajiden (ven.: Шахтёрский), Donantaguine (ven. Задонье). Lidnan ristitišt ližadui kahthe kerdha.

Donskoi šingotase kaivuzmašiništon tegimel, elektromašinansauvomižen tegimel (täudumižblokad, likutimed, andimed, joksmusen toižetimed), radiopaloiden pästandal (mikroshemiden korpusad), kahtel mebel'fabrikal, nahkprodukcijan i kengiden fabrikoil.

Geografijan andmused

Lidn sijadase Bobrik-jogen randal (ven.: Бобрик kümne kilometrad pitte, Donan üläjoksmusen oiged ližajogi), 210 m ü.m.t. keskmäižel korktusel. Toine pen' jogi om Ol'hovec. Bobrik lahkteb Donha Bobrik-mägi-lidnrajonan lodehes. Donantaguine i Severo-Zadonsk oma Donan hural randpolel.

Matkad Tulhasai om 52 km päivlaskmha-lodeheze orhal, 61 km avtotel vai 70 km raudtel. Lähembaižed lidnad oma Uzlovai viž kilometrad päivlaskmha orhal vai raudtedme, seičeme kilometrad avtotedme, Novomoskovsk ani lodeheze, Kimovsk 10..15 km päivnouzmha orhal i teidme. «Väz'm — Sizran'»-raudtekeskust läbitab lidnad, Bobrik-Donskoi-raudtestancii radab lidnan päivlaskmas.

Tobmuz

Donskoi om lidnümbrikon üks'jäižeks eländpunktaks. Lidnümbrikon pind — 47,58 km².

Lidnümbrikon tobmuden pämez' om sen Deputatoiden suiman ezimez'. Edeližed suiman ezimehed oma Natal'ja Moskvina (uhoku-reduku 2019), Bogdan Pavlenko (radoi vn 2019 uhokuhusai). Lidnan Administracijan pämez' om Sergei Kulik, radab vn 2023 redukuspäi. Edeližed Administracijan pämehed oma Ruslan Butov (kül'mku 2015 — sügüz'ku 2023), Natalija Kostomarova (radoi vn 2015 kül'mkuhusai).

Eläjad

Vl 1939 lidnan ristitišt oli 13 385 eläjad, vl 1959 — 30 310 eläjad. Vn 2010 Venäman rahvahanlugemižen mödhe lidnan eläjiden lugu oli 64 552 ristitud. Kaik 63 842 eläjad oli lidnas vl 2017. Kaikiš suremb lidnan ristitišt oli 66 700 eläjad vl 2005, edel eländpunktoiden ühtištust — 36 158 ristitud vl 1989.

Rahvahad (2010): venälaižed — 95,6 %, totarlaižed — 1,4 %, toižed rahvahad — 3,0 %.

Ortodoksižen hristanuskondan seičeme pühäpertid oma kaičenus i saudud lidnas: nell' jumalanpertid da koume časounäd.

Donskoin politehnine kolledž om lidnan professionaližen opendusen aluzkundaks.

Galerei

• 
  Bobriki-usadiban sauvused (2021)
• 
  Spasan Toižetamižen jumalanpert', vn 2012 nägu
• 
  Asfal'tbetontegim vl 2018
• 
  «Plazma»-puišt-adivpert' (Plazm, 2021)
• 
  «AkvaDon»-lebuzon vl 2022

Irdkosketused

• Lidnümbrikon tobmuden aluzkundoiden sait (donskoy.tularegion.ru). (ven.)