Igark

Igark
Игарка
Lidnanznam;	Flag;
Valdkund	Venäma
Eläjiden lugu (2021)	3,634 ristitud
Pind	9,8 km²
Pämez'	Svetlana Lebedeva; (viluku 2024—,; velgusentäutai)
Telefonkod	+7−39 172-xx-xxx
Avtokod	24, 84, 88, 124
Aigvö	UTC+7 (MSK+4)

Igark (ven.: Ига́рка) om Venäman lidn, lidnankund da port Jenisei-jogen Igarkan hijaman oiktal randal, Krasnojarskan randan lodehes. Mülüb Turuhanskan rajonha.

Istorii

Venäman merimatkadajad paniba Igarkan tal'vdundsijad kartale ezmäižen kerdan vl 1737. Nügüdläižen eländpunktan aluz om pandud vl 1929 kuti jogiport vedamha ujuden pumaterialoid. Om nimitadud penen jogen mödhe, Jenisein hura ližajogi. Igark sai lidnan statusad vl 1931.

Igark šingotase jogiportal.

Geografijan andmused

Lidn sijadase Pohjoižen nabakehkruden südäimes, igähižen rougun zonas, 20 m ü.m.t. keskmäižel korktusel. Matkad Krasnojarskhasai om 1287 km suvhe orhal vai 1800 km jogedme, Turuhansk-rajonkeskushesai 195 km suvipäivnouzmha orhal, se sijadase Jenisein ülezjogen. Lähembaižed järedad lidnad oma Noril'sk pohjoižhe (220 km orhal) i Uz' Urengoi päivlaskmha (460 km orhal).

Klimat om subarktine vilun venon röunal, terav kontinentaline, luja vilu oleleb tal'vel. Kavag'mec ümbärdab lidnad 10..20 m kortte. Voden keskmäine lämuz om −8,2 C°, kezakun-elokun +8..+15,2 C°, tal'vkun-uhokun −24,2..−27,4 C°. Ekstremumad oma −55,5 C° (tal'vku) i +34 C° (heinku). Kezaaigan minimum om −9 C° (kezaku), tal'vaigan maksimum om +1,2 C° (viluku). Voib panda halad kezaaigan miččel taht kul. Paneb sadegid 494 mm vodes, enamba kezakus-redukus (50..58 mm kus), vähemba vilukus-semendkus (24..29 mm kus).

Tobmuz

Igark om lidnankundan üks'jäižeks eländpunktaks. Lidnankundan pind — 117,52 km².

Lidnankundan tobmuden pämez' om sen Administracijan pämez'. Edeližed lidnan pämehed oma Andrei Gainetdinov (kezaku 2022 — viluku 2024), Vadim Dobromislov (sulaku 2020 — viluku 2022), Jevgenii Nikitin (tal'vku 2017 — sügüz'ku 2019). Lidnan Deputatoiden nevondkundan ezimez' om Jevgenija Lukincova vn 2023 tal'vkuspäi. Edeline nevondkundan ezimez' om Födor Suhinin, radoi vn 2023 tal'vkuhusai.

Eläjad

Vn 2010 Venäman rahvahanlugemižen mödhe^[1] lidnan eläjiden lugu oli 6 183 ristitud. Kaik 4 754 eläjad oli lidnas vl 2017. Kaikiš suremb lidnan ristitišt oli vl 1939 — 23 600 eläjad, lidnankundan vl 1989 — 26 506 eläjad.

Ortodoksižen hristanuskondan ph. Mikulai-čudonsädajan jumalanpert'^[2] om saudud vl 1994.

Igarkan äiprofil'ne tehnikum^[3] om lidnan professionaližen opendusen aluzkundaks. Igähižen rougun muzei om avaitud lidnas.

Transport

Merilaivad tuldas jogiportha, se seižub 673 kilometras Jenisein jogensuspäi.

Tatanmaine civiline Igark-lendimport (IAA / UOII / ИГР) sijadase kahtes kilometras suvipäivnouzmha lidnaspäi, Jenisein Igarkan sarel. Tehtas reisid Novosibirskha, Tümenin agjan ümbrikoihe da Krasnojarskan randadme, sidä kesken čarterid i punolendimil.

Homaičendad

Irdkosketused

Lidnan tobmuden aluzkundoiden oficialine sait (igarkacity.info). (ven.)

Igark Vikiaitas

	Krasnojarskan randan lidnad
	Ačinsk \| Artömovsk \| Bogotol \| Borodino \| Divnogorsk \| Dudink \| Igark \| Ilanskii \| Jeniseisk \| Kansk \| Kodinsk \| Krasnojarsk \| Lesosibirsk \| Minusinsk \| Nazarovo \| Noril'sk \| Sosnovoborsk \| Šaripovo \| Zaozörnii \| Zelenogorsk \| Železnogorsk \| Ujar \| Užur

[1] Vn 2010 Venäman rahvahanlugemižen andmused. — Rosstat (gks.ru). (ven.)

[2] Igarkan pühäpertid sobory.ru-saital. (ven.)

[3] Igarkan äiprofil'žen tehnikuman sait (24imt.ru). (ven.)

[1]

[2]

[3]