Tour de France 2009

Tour de France 2009

'n Tour de France 2009, mêestol verkort toet 'n Tour van 2009, is 'n 96stn Tour uut de geschiedenisse.

Vantevôorn is er surtout aandacht egoan no 't werekêern van Lance Armstrong achter dat 'n êentige joarn uuteschid wos en no 'n soap round Tom Boonen, die mo 'n dag vôor 'n start beschid krêeg over of dat 'n nu muchte meidoen of nie achter dat 'n estekt wos voun cocaïne.

Uutendelik wos 't Contador die zounder ol te vele moeite won, me mêer of 4 minuutn vôorn up Andy Schleck. Armstrong stoeg oek up 't podium.

'n Groenn boai wos voun Hushovd, olhoewel dat 'n mor 1 rit won, tegenover 6 voun Cavendish.

Gegeevns

• 21 rittn tusschn 4 en 26 juli
• 3445 km
• 20 ploegn
• 180 coureurs

Ploegn

't Doen 20 ploegn mei, woavan 17 Pro Tourploegn (ollêne Fuji-Servetto muchte nie meidoen deur de dopiengzoakn van 't joar dervôorn (Ricco en Piepoli)) en 3 continentoale ploegn (Skill-Shimano, Cervélo en Agritubel).

De 20 ploegn zyn:

AG2R-La Mondiale (FRA) Agritubel (FRA) Astana (KAZ) Bbox Bouyges Telecom (FRA) Caisse d'Epargne (SPA)

Cervélo TestTeam (ZWI) Cofidis (FRA) Euskaltel-Euskadi (SPA) Française des Jeux (FRA) Garmin-Slipstream (USA)

Katjoesja (RUS) Lampre-N.G.C. (ITA) Liquigas (ITA) Milram (DUI) Quick-Step (BEL)

Rabobank (NED) Saxo Bank (DEN) Silence-Lotto (BEL) Skil-Shimano (NED) Team Columbia-HTC (USA)

Coureurs

Favorietn

• Alberto Contador (winnoare in 2007)
• Carlos Sastre (winnoare in 2008)
• Cadel Evans (twiddn in 2007 en 2008)
• Denis Mensjov (winnoare van 'n Giro in 2009)
• Lance Armstrong (7x winnoare)

West-Vloamiengn

• Jurgen Van de Walle (upegeevn achter rit 2 - sleutelbêenbreuke en geperforeerde lounge)
• Stijn Devolder

Oud en jounk

• Oudstn coureur: Iñigo Cuesta (Cervélo, SPA, 40 joar (2 juni 1969))
• Joungstn coureus: Rigobert Uran (Caisse d'Epargne, COL, 22 joar (26 januoari 1987))

Overzicht rittn

Rit 1 - 4 juli - Fabian Cancellara

• Monaco (15 km - tydrit)

Fabian Cancellara wint met 19 secondn vôorn up Contador (die an 't tusschnpunt up e klem van vierde categorie nog 'n rapstn wos) en 20 up Wiggins. Grôotn verliezer is Mensjov, die ol rechtet mêer of minute verlôor up Contador. Armstrong at 'n tienstn tyd.

Rit 2 - 5 juli - Mark Cavendish

• Monaco > Brignoles (182 km)

4 vluchters (Augé, Clement, Dessel en Veikkanen) zyn epakt up 10 km van de mete deur Ignatiev, die zelve 5 km vodder estekt is. In 'n sprint wint Cavendish simpel.

Rit 3 - 6 juli - Mark Cavendish

• Marseille > La Grande-Motte (196 km)

4 vluchters (Bouet, De Kort, Dumoulin en Perez) houdn 't uut toet up 30 km van de mete deur en êeste peletong. Deur de stravn wiend van upzyds is er in woaiers ereedn en is 't peletong in twêen escheurd. Olle favorietn buutn Armstrong en 'n gilvn boai Cancellara zittn in 't twidde peletong. Cavendish is wel mei en wint were.

Rit 4 - 7 juli - Astana

• Montpellier (38 km - ploegntydrit)

Astana wint vôorn Garmin en Saxo. Armstrong pakt 40 secondn up Cancellara en komt 0,22 secondn te kort voun 't gilf te pakkn. Grôte verliezers zyn Cervélo (Sastre), Silence-Lotto (Evans) en Rabobank (Mensjov).

Rit 5 - 8 juli - Thomas Voeckler

• Le Cap d'Agde > Perpignan (197 km)

6 coureurs (Geslin, Goetarovitsj, Ignatiev, Sapa, Timmer en Voeckler) ryen e goeie 200 km up kop. 't Peletong mispakt nem en grakt er nie mi by. Ignatiev spriengt twi kirs up 6 km van de mete, mor is weerepakt. Voeckler goat up 5 km en houdt et. Ignatiev is nog juuste 'n twiddn vôorn 't peletong, woavan da Cavendish 'n sprint wint.

Rit 6 - 9 juli - Thor Hushovd

• Girona > Barcelona (175 km)

Van de vier vluchters Augé, Chavanel, Millar en Txurruka bleef ter up 't ende ollêne Millar over. 't Peletong kwam ter nog over en in 'n sprint bergup wos Hushovd 'n rapstn, vôorn Oscar Freire.

Rit 7 - 10 juli - Brice Feillu

• Barcelona > Andorra-Arcalis (224 km)

Riblon, Martinez, Gutierrez, Fröhlinger, Feillu, Kern, Pineau, Nocentini en Koesjinski goan in twi kirs weg en up 't ende spriengt Brice Feillu up 'n klem nor Arcalis. En houdt het en wint. Byn de favorietn spriengt Contador weg en niemand ku mei. Rinaldo Nocentini pak het gilf met zes secondn up Contador en achte up Armstrong, Cancellara verliest êentige minuutn.

Rit 8 - 11 juli - Luis Leon Sanchez

• Andorra la Vella > Saint-Girons (176 km)

Van e vlucht met 10 coureurs bluuvn der achter 'n Col d'Agnês nog viere over (Astarloza, Casar, Efimkin en Sanchez). Up 't ende sproung Efimkin weg (die hêel 'n dan nietnt edoan hadde omdat 'n e ploegmoat is van Nocentini), mor de reste rochte der nog juuste by en in 'n sprint wint Sanchez vôorn Casar.

Rit 9 - 12 juli - Pierrick Fédrigo

• Saint-Gaudens > Tarbes (160 km)

Achter dat Armstrong de koers lam eleid hadde, kus 'n de vier vluchters Duqué, Fédrigo, Pellizotti en Voigt êentige minuutn pakkn. Achter 'n Aspin en 'n Tourmalet blêevn Fédrigo en Pellizotti over. Ze kus 'n 't houdn, in 'n latstn droai beguste Pellizotti te sprintn, mo Fédrigo kus 't er up 't ende nog juuste over. Derde Fransche ritzege en twidde voun Bbox.

Rit 10 - 14 juli - Mark Cavendish

• Limoges > Issoudun (193 km)

In 'n rit up de Franschn Nationoaln Fêestdag mucht de ploegn gin ortjes gebruukn, woadeure dat er verre nie ekoerst wos, uut protest. 't Rêedn wel 4 coureurs weg (Dumoulin, Ignatiev, Hupond en Vaugrenard), mo dedie begustn oek mor echt te koersn up 30 kilomeiters van de mete. 't Peletong kust ze egliek nog stekkn en in de sprint wos 't Cavendish die won.

Rit 11 - 15 juli - Mark Cavendish

• Vatan > Saint-Fargeau (192 km)

'n Traditioneeln langn vlucht stoeg up noame van Vansummeren en Sapa. Up 5 kilomeiter van de mete wos 't edoan voun nunder en Cavendish won were, zyn vierdn rit.

Rit 12 - 16 juli - Nicki Sørensen

• Tonnerre > Vittel (200 km)

In 'n twoofsn rit wos de winste wel voun etwien van e groep vluchters. Lefèvre sproung êest, toune kwaamn Martinez, Pellizotti, Calzati, Fothen en Pauriol derby en 10 kilomeiter vodder oeke Sørensen. Up 22 kilomeiter van de mete gienk Sørensen weg, me Calzati in zyn wiel. Up de grôte 5 kilomeiters rêed 'n Deen oek Calzati derof en wont 'n zyn êestn Touretappe.

Rit 13 - 17 juli - Heinrich Haussler

• Vittel > Colmar (200 km)

In en bergachtige etappe wos er ol vroeg (achter 3 km) en demarrage van Moreau, die Garate, Voigt, Uran, Haussler, Chavanel en Perez meikrêeg. 't Wos uuteindelik Haussler die 'n bestn wos en won met mêer of 4 minuutn vôorn up 'n twiddn Txurruka (die nog tope me Brice Feillu wos wegesproungn uut 't peletong).

Freire en Dean zyn beistn 'n rit beschootn met e luchtkarabine.

Rit 14 - 18 juli - Sergei Ivanov

• Colmar > Besançon (199 km)

In e plattn rit wos 't Martijn Maaskant die zorgde voun 't begun van e grôotn groep van 12 die wegblêef van 't peletong. 't Wos 'n Rus Ivanov die won.

E motto rydt teegn êentige fans en êen dervan, e vrouwe, overleeft het nie.

Rit 15 - 19 juli - Alberto Contador

• Pontarlier > Verbier (207 km)

't Gebeurde vanolles in d'etappe, mo 't wos uuteindelik Contador die toogde wien dat 'n bestn klemmer is. Up 'n klem no Verbier in Zwitserland rêed 'n weg van de reste up 6 kilomeiters van 'n arrivee en pakte 43 secondn up Andy Schleck en mêer of e minute up de reste. E pakte oek 'n gilvn boai.

Rit 16 - 21 juli - Mikel Astarloza

• Martigny > Bourg-Saint-Maurice (160 km)

In verschillige golvn wos 't er e kopgroep evormd woavan dat 'n Bask Astarloza won. Voun 't klassement gebeurde der nie vele, buutn Evans die tyd verlôor.

Rit 17 - 22 juli - Fränk Schleck

• Bourg-Saint-Maurice > La Grand-Bornand (169 km)

Achter e zwoarn bergrit, blêevn de broers Schleck en Contador over en 't wos Fränk die won. De reste van de groep kwaamn ollemoale up mêer of 2 minuutn an.

Rit 18 - 23 juli - Alberto Contador

• Annecy (40 km - tydrit)

Contador won met 't vierde van niet vôorn Cancellara, die surtout in 't latste stik indeliks vele tyd werepakte.

Rit 19 - 24 juli - Mark Cavendish

• Bourgoin-Jallieu > Aubenas (195 km)

'n Êen achter 'n aarn groep probeerde weg te groakn, mor uuteindelik wos 't were e massasprint met e logischn winnoare: Mark Cavendish.

Rit 20 - 25 juli - Juan Manuel Garate

• Montélimar > Mont Ventoux (167 km)

Van e grôotn groep blêevn an 'n arrivee up de Ventoux Garate en Martin over en 't wos 'n Spanjoard die won. Van de favorietn woarn Andy Schleck en Contador de beste.

Rit 21 - 26 juli - Mark Cavendish

• Monterreau-Fault-Yvonne > Parys (160 km)

Traditioneel wos 't up de Champs Elysées e massasprint, die deur Cavendish ewonn is, zyn zesde winste.

Overzicht klassementn

Rit	Winnoare	Stand Gilvn boai	Puntn Groenn boai	Bergkeunienk Bolletjes	Joungernklassement Wittn boai	Ploegnklassement Gilf nummer	Strydlust Rôod nummer
1	Fabian Cancellara	Fabian Cancellara	Fabian Cancellara	Alberto Contador	Roman Kreuziger	Astana	Gin prys
2	Mark Cavendish		Mark Cavendish	Jussi Veikkanen			Stef Clement
3	Mark Cavendish				Tony Martin		Samuel Dumoulin
4	Astana						Gin prys
5	Thomas Voeckler						Mikhail Ignatiev
6	Thor Hushovd			Stéphane Augé			David Millar
7	Brice Feillu	Rinaldo Nocentini		Brice Feillu			Christophe Riblon
8	Luis León Sánchez		Thor Hushovd	Christophe Kern		AG2r	Sandy Casar
9	Pierrick Fédrigo			Egoi Martínez			Franco Pellizotti
10	Mark Cavendish						Thierry Hupond
11	Mark Cavendish		Mark Cavendish				Johan Van Summeren
12	Nicki Sørensen					Team Saxo	Nicki Sørensen
13	Heinrich Haussler		Thor Hushovd	Franco Pellizotti			Heinrich Haussler
14	Sergei Ivanov					AG2r	Martijn Maaskant
15	Alberto Contador	Alberto Contador			Andy Schleck	Astana	Simon Špilak
16	Mikel Astarloza						Franco Pellizotti
17	Fränk Schleck						Thor Hushovd
18	Alberto Contador						Gin prys
19	Mark Cavendish						Leonardo Duque
20	Juan Manuel Gárate						Tony Martin
21	Mark Cavendish						Fumiyuki Beppu
Uutslag		Alberto Contador	Thor Hushovd	Franco Pellizotti	Andy Schleck	Astana	Franco Pellizotti

Eindklassementn

Gilvn boai

	Coureur	Ploeg	Tyd
1	Alberto Contador (SPA)	Astana
2	Andy Schleck (LUX)	Team Saxo Bank	+ 4'11
3	Lance Armstrong (VS)	Astana	+ 5'24
4	Bradley Wiggins (GB)	Garmin-Slipstream	+ 6'01
5	Fränk Schleck (LUX)	Team Saxo Bank	+ 6'04
6	Andreas Klöden (DUU)	Astana	+ 6'42
7	Vincenzo Nibali (ITA)	Liquigas	+ 7'35
8	Christian Vande Velde (VS)	Garmin-Slipstream	+ 12'04
9	Roman Kreuziger (TSJ)	Liquigas	+ 14'16
10	Christophe Le Mével (FRA)	Française des Jeux	+ 14'25

Groenn boai

	Coureur	Ploeg	Puntn
1	Thor Hushovd (NOO)	Cervélo-TestTeam	280
2	Mark Cavendish (GB)	Team Columbia-HTC	270
3	Gerald Ciolek (DUU)	Team Milram	148

Bolletjes

	Coureur	Ploeg	Puntn
1	Niemand (dopard Pellizotti)
2	Egoi Martinez (SPA)	Euskaltel-Euskadi	135
3	Alberto Contador (SPA)	Astana	126

Wittn boai

	Coureur	Ploeg	Tyd
1	Andy Schleck (LUX)	Team Saxo Bank
2	Vincenzo Nibali (ITA)	Liquigas	+ 3'24
3	Roman Kreuziger (TSJ)	Liquigas	+ 10'05

Ploegnklassement

	Ploeg	Tyd
1	Astana
2	Garmin-Slipstream	+ 22'35
3	Team Saxo Bank	+ 28'34

Upgevers

• Rit 2

• Jurgen Van de Walle (Quick-Step, BEL): sleutelbêen ebrookn en geperforeerde lounge

• Rit 4

• Piet Rooijakkers (Skil-Shimano, NED): evolln in 'n ploegntydrit en zyn arme ebrookn

• Rit 5

• Robert Gesink (Rabobank, NED): pols ebrookn

• Rit 7

• Sébastien Joly (Française des Jeux, FRA): ziek, tende

• Rit 8

• Koldo Fernandez (Euskaltel, SPA): te loate binn
• Eduardo Gonzalo (Agritubel, SPA): ziek, tende
• David Le Lay (Agritubel, FRA): upegeevn
• Oscar Pereiro Sio (Caisse d'Epargne, SPA): vroeg elost en upegeevn

• Rit 9

• Danilo Napolitano (Katjoesja, ITA): te loate binn

Ofbeeldiengn die ier by passn ku je vien in de categorie Tour de France 2009 van Wikimedia Commons.