Sergey Mikhalkov

Marso 13, 2003

Hi Sergey Vladimirovich Mikhalkov (ha Ruso: Сергей Владимирович Михалков) (Marso 13, 1913 - Agosto 27 , 2009) usa nga Ruso nga manunurat hin mga barasahon para hin kabataan ngan mga satiriko nga mga istorya nga nagkaada hin higayon han pagsurat han mga laray han nasodnon nga awit han iya nasod ha tulo ka lain nga okasyon, hin panahon nga mga 60 ka tuig.

Hi Mikhalkov tikang hin noble nga panimalay ngan mayda hiya mga tsarista nga mga admiral, gobernador, ngan mga prinsipe dida han iya mga kaapoy-apoyan. Tikang han mga tuig han dekada han 1930, sugad kasikat hiya kanda Korney Chukovsky ngan Agniya Barto komo usa han mga pinakasikat nga mga maniniday nga nagsisinurat para han mga kabataan nga nayakan hin Ruso. An iya mga siday mahitungod han hataas nga hi "Batâ Styopa" ("Дядя Стёпа") nagkaada hin kasikat.

Komo 29-nga-pangidaron dida han tuig 1942, an mga sinurat ni Mikhalkov inmabot han pagkasabót han namumuno han Unyon Sovyetika nga hi Josef Stalin. Nagkomisyon hi Stalin kan Mikhalkov nga magsurat hin mga laray para hin bag-o nga nasodnon nga awit. Hadto nga panahon, an nasod dida han butnga han Gyera Pankalibotan II ngan hi Stalin karuyag hin Ruso nga tema para han nasodnon nga awit, nga masaliwan han Internationale.

Ginsurat ni Mikhalkov in mga laray nga igpapadis hin musika han kompositor nga hi Alexander Alexandrov (1883–1946) ngan ini amo an nagin Nasodnon nga Awit han Unyon Sovyetika o an "Himno". An bag-o nga nasodnon nga awit ginpresenta kan Stalin dida han verano han 1943 ngan ini ginpakilala nga amo an bag-o nga nasodnon nga awit dida han Enero 1, 1944.

Dida han kamatay ni Stalin han 1953, an mga laray, nga nagmensyonar han ngaran niya, waray gamita dida han proseso han pagdestalinisar ngan ginpadayon paggamit an himno nga waray mga pulong. Nagsurat hi Mikhalkov hin bag-o nga mga laray dida han 1970, kondi waray ini igsumitir ngadto han Presidium han Sovyet Suprema hangtod han Mayo 27, 1977. An bag-o nga mga laray, nga waray na reperensya kan Stalin, gin-aprobahan dida han Septyembre 1 ngan ginhimo nga opisyal dida han pagpatik han bag-o nga Sovyetika nga Konstitusyon dida han Oktubre 1977.

An pag-gamit han himno Sovyetiko ngan nagamit hini nga mga laray ni Mikhalkov nagpadayon tubtob han 1991, nga diin ginretiro ini ni Presidente Boris Yeltsin katapos han pagkabublag han Unyon Sovyetika. Pero dida han pagsaliwan ni Vladimir Putin tikang kan Yeltsin dida han 2000, naghangyo hi Putin han pagbalik han musika ni Alexandrov imbes han pinili nga anthem ni Yeltsin.

Dida hini nga panahon, 87 na ka tuig an edad ni Mikhalkov ngan maiha na hiya nga nagretiro; mas kilalado pa ngani hiya ha moderno nga Rusya (o kon ha exakto - han bag-o nga henerasyon hin mga Ruso) nga amo an amay han sikat nga mga maghirimo hin salida nga hira Nikita Mikhalkov ngan Andrey Konchalovsky – hi Andrey nagbul-iw hin parte han iya ngaran nga "Mikhalkov-Konchalovsky" han paglakat niya tikang ha Rusya. Pero dida han pagkaada hin momentum an paningkamot ni Putin han pagbalik han daan nga anthem, binmalik hi Mikhalkov naliwat hin pagsurat hin bag-o nga mga laray nga ma-igo han musika ni Alexandrov. An resulta amo an Nasodnon nga Awit han Rusya, nga nagin-opisyal dida han tuig 2001.

Gawas han nasodnon nga awit, hi Mikhalkov naghimo hin dadamo nga mga satiriko nga mga drama ngan naghatag hin mga script para hin pipira nga komedya Sovyetika. Iya liwat ginbalik in maiha na nga waray-kagamit nga genre hin satiriko nga fable o istorya. Gin-gala hiya hin tulo nga mga Premyo Stalin (dida han mga tuig 1941, 1942, ngan 1950) ngan iba pa nga mga premyo.

Inmukoy ha Moscow hi Mikhalkov tubtob han iya kamatay. Dida han iya ika-90 nga kaadlawan han tuig 2003, ginbisita hiya ni Putin ha iya balay pagpresenta ha iya han ikaduha nga klase han Orden hin Serbisyo han Amay nga Tuna, tungod han iya mga ámot han kultura han Rusya. Gintagaan liwat hi Mikhalkov hin dekorasyon nga Bayani han Sosyalista nga Buhat ngan han Orden ni Lenin, han pira nga iya nakarawat nga mga premyo, tungod han iya buhat dida han panahon Sovyetika.