მაიკლ დებეიკი
| მაიკლ დებეიკი | |
| ინგლ. Michael DeBakey | |
 | |
| დაბადებაშ თარიღი: | |
|---|---|
| დაბადებაშ აბანი: | |
| ღურაშ თარიღი: |
კვირკვე 11, 2008 (99 წანერი) |
| ღურაშ აბანი: | |
| მენოღალობა: | |
| ომენცარე სფერო: | |
| სამუშაშ აბანი : | |
| ალმა-მატერი: |
ტულეინიშ უნივერსიტეტი |
| ჯილდოეფი დო პრემიეფი: |
დუდიშალაშ ოპრეზიდენტე მენდალი (1969) |
მაიკლ ელის დებეიკი (ინგლ. Michael Ellis DeBakey; დ. 7 ეკენია, 1908, ლეიკ-ჩარლზი, ლუიზიანა, ააშ — ღ. 11 კვირკვე, 2008, ჰიუსტონი, ტეხასი, ააშ) — ამერიკალი კარდიოქირურგი დო მენცარი. დებადჷ ლიბანარი ემიგრანტეფიშ ფანიას. დებეიკიქ მედიცინათ ორდოიანი წანეფიშე დეინტერესჷ. გურაფულენდჷ ტულეინიშ უნივერსიტეტის.
ტულეინიშ უნივერსიტეტის მაიკლ დებეიკიქ გიმიგონჷ პერისტალტიკური ტუმბო, ნამუსჷთ დიო ჰემოტრანსფუზიაშო ირინუანდჷ. უკულიან პერიოდეფს დებეიკიშ გჷმიგონებაქ ზისხირიშ ხელუანური ცირკულაციაშ მანქანაშ თარ კომპონენტო გინირთჷ. დებეიკიქ აკიმუშუ აორტული ანევრიზმაშ ქირურგიული კურნალობაშ მეთოდი. თაშნეშე, დებეიკიქ მიშეღჷ დიდი თია პარკუჭიშ მოხვარე მონწყილობეფიშ (VAD) გოვითარაფაშა.
მაიკლ დებეიკი მაჟირა მოსოფელიშ ლჷმაშ ბორჯის მსახურენდჷ ამერიკაშ არმიას, ოურდუმე ექიმო. ლჷმაშ თებაშ უკული მუშენდჷ ბეილორიშ მედიცინაშ კოლეჯის, ქირურგიული დეპარტამენტიშ მადუდეთ. 1969-1979 წანეფს რდჷ კოლეჯიშ პრეზიდენტი დო 1979-1996 კანცლერი. ლინდონ ჯონსონიშ ადმინისტრაციას, დებეიკის უკინებუდჷ გურიშ, კიბოშ დო ინსულტიშ ოპრეზიდენტე კომისიაშ მადუდეშ პოსტი.
მაიკლ დებეიკი რდჷ შხვადოშხვა პრემიეფიშ დო ჯილდოეფიშ ლაურეატი. 1959 წანას მიპალუ რენე ლერიშიშ პრემია, 1963 წანას ალბერტ ლასკერიშ პრემია, 1969 წანას დუდიშალაშ ოპრეზიდენტე მენდალი, 1987 წანას მენცარობაშ ერუანული მენდალი, 1988 წანას თომას ედისონიშ ფონდიშ პრემია, 2003 წანას ლომონოსოვიშ ორქოშ მენდალი. 2008 წანას ჯორჯ უოლკერ ბუშიქ, ნენსი პელოსიქ დო ჰარი რიდიქ დებეიკის გინოჩეს პრესტიჟული ჯილდო კონგრესიშ ორქოშ მენდალი.
მაიკლ დებეიკიშ ჯოხონობაშ რე საირქიანო ქირურგიული ჯარალუა, ნამუთ დებეიკიშ სტუდენტეფქ დარსხუეს 1976 წანას, თაშნეშე ლასკერი-დებეიკიშ პრემია კლინიკური მედიცინაშ რკვიებეფიშ დარგის, დებეიკიშ სამედიცინო ფონდი დო შხვა ომენცარე ორგანიზაციეფი.
დებეიკი რდჷ დოხოლაფირო 1300 მენცარული სტატიაშ, პუბლიკაციაშ დო წინგიშ ავტორი. თიში ნაჭარეფი ორხველუდჷ მედიცინაშ, ქირურგიაშ, გონათაფაშ საკითხეფს დო სოციო-ეკონომიკურ დო ფილოსოფიურ ასპექტეფს.
რესურსეფი ინტერნეტის
[რედაქტირაფა | წყუშ რედაქტირაფა]- მაიკლ დებეიკი ენციკლოპედია ბრიტანიკას
- DeBakey Department of Surgery at Baylor College of Medicine
- Michael E. DeBakey International Surgical Society Archived 2022-07-06 ვებ-ხასჷლას Wayback Machine.
- DeBakey Institute for Comparative Cardiovascular Science and Biomedical Devices at Texas A&M University
- DeBakey Cell Lab at The Health Museum
- Lasker Luminary Dr. Michael DeBakey
- The Michael E. DeBakey Papers – Profiles in Science, National Library of Medicine