ნევილ ჩემბერლენი
| ნევილ ჩემბერლენი Neville Chamberlain | ||
 ნევილ ჩემბერლენი 1923 წანას | ||
| გოართოიანაფილი ომაფეშ პრემიერ-მინისტრი | ||
|---|---|---|
| პოსტის გერინაშ ბორჯი | ||
| 28 მესი, 1937 – 10 მესი, 1940 | ||
| მონარქი | ჯორჯ VI | |
| წიმოხონი | სტენლი ბოლდუინი | |
| მონძე | უინსტონ ჩერჩილი | |
| პოსტის გერინაშ ბორჯი | ||
| 27 მესი, 1937 – 9 გჷმათუთა, 1940 | ||
| დუდმახვენჯი | დუგლას ჰეკინგი | |
| წიმოხონი | სტენლი ბოლდუინი | |
| მონძე | უინსტონ ჩერჩილი | |
| დუნაბადი | 18 მელახი, 1869 ბირმინგემი, ინგლისი | |
| ნაღურა | 9 გერგობათუთა, 1940 (71 წანერი) ჰეკფილდი, ინგლისი | |
| ერუანობა | ინგლისარი | |
| პოლიტიკური პარტია | კონსერვატიული პარტია | |
| მუმა | ჯოზეფ ჩემბერლენი | |
| ნანა | ფლორენს კენრიკი | |
| ალმასქუ | ენ ჩემბერლენი | |
| სქუალეფი | დოროთი ჩემბერლენი ფრენსის ჩემბერლენი | |
| გონათაფა | რაგბიშ სკოლა მეისონიშ კოლეჯი | |
| საქვარუა | ბიზნესმენი, პოლიტიკოსი | |
| ჯილდოეფი | ომაფე ჯარალუაშ მაკათური (1938) | |
| ხეშმოჭარუა |  | |
ართურ ნევილ ჩემბერლენი (ინგლ. Arthur Neville Chamberlain; დ. 18 მელახი, 1869 — ღ. 9 გერგობათუთა, 1940) — ინგლისარი პოლიტიკოსი, გოართოიანაფილი ომაფეშ პრემიერ-მინისტრი დო კონსერვატიული პარტიაშ ლიდერი 1937-1940 წანეფს. უმოსო შინელი რე დარჩქალებაშ (Appeasement) პოლიტიკათ, ნამუსჷთ თინა აწარმენდჷ ნაცისტური გერმანიაშ მეხჷ.
რდჷ ბრიტანალი სახენწჷფო მოღალეშ ჯოზეფ ჩემბერლენიშ სქუა. გურაფულენდჷ რაგბიშ სკოლას. უკულ გურაფა გაგინძორჷ მეისონიშ კოლეჯის (ასეიანი ბირმინგემიშ უნივერსიტეტი). ახალნორდობაშე ნევილი მუში მუმაშ ბიზნესის ხემანჯღვერენდჷ დიო ბაჰამაშ კოკეფს დო უკულ ბირმინგემს. 1915 წანას ნევილ ჩემბერლენქ გინირთჷ ბირმინგემიშ მერო. 1916 წანას დარსხუ მუნიციპალური ბანკი. 1916 წანაშ გერგობათუთას ქაკათჷ დევიდ ლოიდ ჯორჯიშ კოალიციური თარობას. დუდშე უკინებუდჷ ერუანული ნინალაშ გენერალური დირექტორიშ პოსტი, მარა ართი წანაშ უკულ, 1917 წანაშ მარაშინათუთას გეგნოდირთჷ.
ნევილ ჩემბერლენს პოლიტიკური კარიერაშ გოძვენას უკინებუდჷ შხვადოშხვა პოსტეფი. შხვადოშხვა ბორჯის რდჷ ჭყანთხილუაშ მინისტრი (1923, 1924-29, 1931) დო ხაზინაშ კანცლერი (1923-24, 1931-37). 1937 წანაშ 28 მესის გინირთჷ პრემიერ-მინისტრო.
ჩემბერლენიშ პრემიერ-მინისტრობაშ ბორჯის, ბრიტანეთიქ 1938 წანაშ 16 პირელს, ქიჩინჷ იტალიაშ ხეშუულება ეთიოპიას. ჩემბერლენიშ ინიციატივათ ბრიტანეთი ვამონაწილენდჷ ესპანეთიშ ომენოღალე ლჷმას (1936-1939). ჩემბერლენიშ გინოჭყვიდუათ, ბრიტანეთიქ დოკილუ ოზუღე ბაზეფი ირლანდიას. ჸათე გინოჭყვიდირი ბრელქ მირჩქინჷ ბრიტანეთიშ დოდაღარაფაშ შანო. 1938 წანაშ ეკენიას ჩემბერლენი აწარმენდჷ მორაგადის ადოლფ ჰიტლერიწკჷმა. ჰიტლერი ჩეხოსლოვაკიაშე თხულენდჷ სუდეტიშ ოლქის. 30 ეკენიაშ მიუნხენიშ ხეკულუათ, ჩემბერლენქ დო საფრანგეთიშ პრემიერ-მინისტრიქ ედუარდ დალადიექ დეყაბულეს ჰიტლერიშ დახე არძო მოთხუალას დო ჩეხოსლოვაკია ხვალე ქიდიტეს. ჩემბერლენქ ბრიტანეთიშა დირთჷ მუჭოთ პოპულარული გერგეზიქ, ნამუქჷთ თინჩალას მიოჭირინუ. მუჟამსჷთ ჰიტლერქ ჩეხოსლოვაკია რსულას ქიდეკინჷ (1939 წანაშ 10-16 მელახი), ჩემბერლენქ გეგნივარჷ დარჩქალებაშ პოლიტიკა დო საფრანგეთიწკჷმა ართო, პოლონეთის, რუმინეთის დო საბერძნეთის ოურდუმე ალარინაშ პიჯალა ქიმეჩჷ.
1939 წანაშ 23 მარაშინათუთას, სსრრ-ქ დო გერმანიაქ ხე ქუმაჭარეს უგუნთხაფალაშ პაქტის. 24 მარაშინათუთას ბრიტანეთიქ პოლონეთიწკჷმა ქუდოდვუ ანგლო-პოლონური პაქტი. მუჟამსჷთ, 1939 წანაშ 1 ეკენიას გერმანიაქ პოლონეთის ქიგიანთხუნჷ ჩემბერლენქ ლჷმა გეგმუცხადჷ გერმანიას 1939 წანაშ 3 ეკენიას. მარა დუდშე, დოხოლაფირო ამშვი თუთაშ გოძვენას მოხურგეეფს, ბრიტანეთის დო საფრანგეთის გერმანიაშ მეხჷ მუთუნნერი ოურდუმე კამპანია ვამწუჭყაფუნა. მაჟირა მოსოფელიშ ლჷმაშ ჸათე პერიოდის უნელი ლჷმას უძახჷნა. ტერმინი ჟურნალისტეფქ მიშეღეს. 1940 წანაშ პირელს ბრიტანეთიქ მორსხუეეფიწკჷმა ართო ქიდიჭყჷ ოურდუმე ექსპედიცია ნორვეგიას, ნამუქჷთ ფიასკოთ გეთუ. ჸათე მოლინაშ უკულ, ჩემბერლენიშ პოზიციეფქ კონსერვატიული პარტიაშ დინახალე ძალამს დედაღარჷ. ჩემბერლენქ 1940 წანაშ 10 მესის პრემიერ-მინისტრობაშე გეგნოდირთჷ. ბრიტანეთიშ ახალი პრემიერ-მინისტრო გინირთჷ უინსტონ ჩერჩილქ. ჩემბერლენქ ღურუ 1940 წანაშ 9 გერგობათუთას, 71 წანერქ.