ხუან-ფერნანდესიშ კოკეფი
ხუან-ფერნანდესიშ კოკეფი (ესპ. Archipiélago Juan Fernández) — ბერქეთ დოხორელი კოკეფიშ ბუნა რჩქალ ოკიანეშ ობჟათე ნორთის, ჩილეშ წყარპიჯიშე დოშორაფილი რე 667 კილომეტრით. ჩილეშ დორხველობას რე. არქიპელაგი შიკათუანს მუსხირენ ვულკანურ კოკის. თენეფი რე:
- რობინზონ-კრუზო, ნამუთ არქიპელაგშე არძაშე ხოლოსი რე კონტინენტურ ობჟათე ამერიკაწკჷა დო თიშ გოხოლუას მადვალუ კოკეფი:
- ხუანანგა
- სანტა-კლარა (იდვალუაფუ რობინზონ-კრუზოშე 1 კმ-ით ობჟათე-ბჟადალშე)
- ალეხანდრო სელკირკიშ კოკი (რობინზონ კრუზოშე 181 კმ-ით ბჟადალშე)
თე კოკეფი ედომუშამ მოსოფელს ჩინებული რე შოტლანდიარი მეზუღეშ, ალეხანდრო სელკირკისშ ჭყოლოფუათ, ნამუთ თე ურინუ არქიპელაგიშ ართ-ართ კოკეფს დახუნეს, სოდე თიქ ოთხ წანას დოდირთჷ, დო ნამუქჷთ უკული დანიელ დეფოს დუდს ინუხუნუ ჩინებულ ნოველაშ — „რობინზონ კრუზოშ“ ჭარუა.
არქიპელაგიშ საართო ფართობი 181 კვ. კმ. რე, სოჸურეშეთ კოკი რობინზონ კრუზოს უკებჷ 93 კვ.კმ, ალეხანდრო სელკირკიშ კოკის — 33 კვ.კმ. ედომუშამი მახორობა აკმადგინანდჷ 633 ადამიერს (თინეფშე არძა რობინზონ-კრუზოს მილარე, დო მუშჸურე თინეფშე 598 კოკიშ ნანანოღა სან-ხუან-ბაუტისტას. 2002)
ადმინისტრაციულო, არქიპელაგი ორხველჷ ჩილეშ ვალპარაისოშ რეგიონს (თანაფაშ კოკწკჷმა ართო).
2010 წანაშ 27 ფურთუთას, ცუნამიშ შედეგო ჩილეს მოხვალამირი 8,8 ბალიანი დიხაშნწალუაქ შეხუ ხუან-ფერნანდესიშ არქიპელაგის ხოლო, ნამუქჷთ თაქ 8 ადამიერიშ თელარა ქეკიდინუ.
