Kip-sò͘

Tī sò͘-ha̍k tiong, chi̍t ê iú-kiông ia̍h-sī bû-kiông ê sò͘-lia̍t $u_{0},u_{1},u_{2}\cdots$ ê goân-sò͘ ê chóng-ha̍p $S$ chiū hō-chò kip-sò͘ (級數; series). Sò͘-lia̍t $u_{0},u_{1},u_{2}\cdots$ ê múi-chi̍t ê goân-sò͘ hō-chò thong-hāng (通項). Kip-sò͘ ê thong-hāng ē-ēng sī si̍t-sò͘, hâng-lia̍t ia̍h-sī hiòng-liōng téng-téng siông-liōng, iā ē-ēng sī koan-î kî-thaⁿ piàn-liōng ê hâm-sò͘, pēng bô it-tēng sī chi̍t ê sò͘-ba̍k. Tī sò͘-ha̍k tiong, nā-sī kip-sò͘ ê thong-hāng sī siông-liōng, chiū hō-chò siông-sò͘-hāng kip-sò͘ (常數項級數); ah nā-sī kip-sò͘ ê thong-hāng sī hâm-sò͘, chiū hō-chò hâm-sò͘-hāng kip-sò͘ (函數項級數). Chia̍p-khoàⁿ ê iú-kiông sò͘-lia̍t ê kip-sò͘ ū téng-chha sò͘-lia̍t kap téng-pí sò͘-lia̍t ê kip-sò͘.

Iú-kiông sò͘-lia̍t ê kip-sò͘ ē-ēng thàu-kòe it-poaⁿ chho͘-téng tāi-sò͘ ê hong-hoat lâi kiû-tit. Put-kò nā-chún sī chi̍t ê bû-kiông sò͘-lia̍t, i-ê chóng-ha̍p chiū hō-chò bû-kiông kip-sò͘ (無窮級數). Bû-kiông kip-sò͘ ū hoat-sàn kap siu-liám ê khu-pia̍t. Phoàⁿ-toàn bû-kiông kip-sò͘ sī hoat-sàn ia̍h-sī siu-liám sī gián-kiù bû-kiông kip-sò͘ ê chú-iàu kang-chok.

Bû-kiông kip-sò͘ ē-ēng piáu-sī chò: $a_{1}+a_{2}+a_{3}+\cdots =\sum _{n=1}^{\infty }a_{n}$.