狼人殺
狼人殺係款喺華人區好多人玩嘅檯上遊戲，本身係根據俄羅斯嘅殺手遊戲同埋法國人設計嘅米勒山谷狼人咭遊戲而設計嘅，一般係畀6到12個人玩。狼人殺檯上遊戲係由北京大魔王桌遊俱樂部喺2010年出版，依家就係由狼人殺（海南）文化傳媒有限公司出版[1]。狼人殺喺中國大陸、香港同台灣越嚟越多人識同玩嘅原因係三地嘅電視台同直播台拍狼人殺嘅節目同單元，比較出名嘅有台灣八大綜合台《娛樂百分百》嘅「凹嗚狼人殺」、香港無綫電視《娛樂大家》入面嘅「狼人宮廷版」部分同埋大陸嘅《Panda Kill》同埋《GodLie》節目。
基本玩法
[編輯]狼人殺開局要6到12個人玩同埋一個MC（通常叫做上帝或者法官）。遊戲入面輪流做「夜晚」同「日頭」兩部分。嗰MC就要負責派身份、記低同宣佈玩家嘅技能同埋階段嘅輪轉。
MC要喺開始之前向每個玩家派一個身份。遊戲身份主要分做兩個對立嘅陣營：「好人」隊同「狼人」隊。好人隊入面會有幾個冇功能嘅村民同埋有特別技能嘅神職，好人隊係唔會知道彼此嘅身份，要利用神職嘅技能同玩家講嘅嘢同埋佢哋啲表情嚟判斷佢哋係好人定係狼人。好人隊要日頭投票趕走或者神用技能殺死所有狼人先至贏。狼人隊就比較少人，日頭要匿喺好人入面呃過啲好人，夜晚就可以見面，每晚殺一個人。所有村民或者所有神其中一邊全部淘汰（「屠邊」）就為之狼人贏。[2]（視乎規則而定，有啲局需要狼人殺曬所有好人先至贏，呢個規則叫做「屠城」）有啲局入面仲會有「第三方」陣營出現，呢啲玩家就要達到一啲特定嘅條件先贏到。
遊戲由夜晚階段開始，狼人同神會輪流開眼用佢哋嘅功能，然之後就到日頭階段，所有未死嘅玩家就會輪流講嘢，所有人講完之後就會投票流放一個人，遊戲未完嘅就繼續入夜晚階段。每日夜晚完結後，進入日頭階段，所有存活玩家輪流發言，並喺所有人發言完畢後投票放逐一名玩家。
遊戲身份
[編輯]狼人殺嘅身份主要由米勒山谷狼人遊戲身份發展出嚟。隨住狼人殺嘅發展，加入咗越來越多嘅遊戲身份，令遊戲更有趣。[3]
常見身份
[編輯]| 身份 | 描述同技能 |
|---|---|
| 警長 | 警長身份會喺第一晚宣佈死訊之前選舉，參選嘅玩家會輪流講嘢，再由冇參選嘅玩家投票揀警長。警長可以喺之後嘅日頭安排邊個先講嘢（警左/右：由警長左/右嘅第一個玩家順/逆時針趕嘢；死左/右：由嗰晚死咗嘅玩家嘅左/右第一個玩家順/逆時針開始講嘢），並且可以喺全部人講完嘢之後歸票（呼籲其他玩家投畀咩人）。放逐投票嘅時候，警長嘅投票會計做1.5票（有啲版本計做2票）。[4]警長無論點死都可以揀一個人成為新警長，或者唔揀令到再冇警長都得。 |
| 好人陣營 | |
| 村民 | 冇特別技能，夜晚全程唔會開眼，只可以透過日頭嘅資訊去投票淘汰佢哋覺得似狼嘅玩家。[5]因為冇特別技能，所以亦都會被叫做「廢村」。 |
| 預言家 | 神職身份。每晚可以查驗一個在生嘅玩家係唔係狼人。[6] |
| 女巫 | 神職身份。有一支解藥同一支毒藥。未用解藥嘅時候可以知道狼人嗰晚攻擊邊個玩家，再決定救唔救呢個人，但係救唔到自己。女巫亦都可以根據自己所得嘅資訊，喺任何一晚選擇毒殺一個玩家，但係解藥同毒藥唔可以同一晚用。[7] |
| 獵人 | 神職身份。除咗殉情或者被毒殺之外，以任何其他方法被淘汰嘅時候可以開牌公佈自己係獵人，再開槍殺死另一個玩家，亦可以選擇唔開槍。[8] |
| 白痴 | 神職身份（有啲板會計入村民組）。白痴如果日頭被投票放逐，可以開牌免疫嗰次放逐，但係之後就冇得再投票，狼隊亦都唔需要再殺多次白痴嚟達到屠邊或者屠城。[9] |
| 守衛 | 神職身份。每晚可以保護一個玩家唔會被狼人殺死，亦都可以選擇保護自己或者唔保護人，但係唔可以連續兩晚保護同一個人。如果狼人殺死嘅人同時畀守衛保護同女巫用解藥救起（同守同救），嗰個玩家依然會死（「奶穿」）。守衛的盾擋唔到女巫嘅毒藥。[10] |
| 騎士 | 神職身份。日頭討論時間可以隨時開牌公佈身份，並且揀一個人決鬥（撞一個人）。撞到狼人就會殺死狼人，如果嗰隻狼係狼王或者狼美人都會封咗技能；嗰日嘅討論同投票階段即時完結並且入夜。撞到好人嘅話騎士就會自殺，日頭嘅討論同投票環節繼續進行。[11][12] |
| 狼人陣營 | |
| 狼人 | 每晚可以喺自己時段開眼同隊友見面，討論玩法同揀當晚殺嘅人。狼人可以選擇唔殺人（空刀）或自殺（自刀）。日頭嘅時候就利用發言時間混淆好人。狼人可以喺日頭任何時間開牌自爆，強制跳過之後嘅發言同投票直入天黑。自爆嘅狼可以揀喺夜晚同狼隊溝通完之後先走或者即刻走。[13] |
| 狼王 | 又叫做「狼槍」、「毒狼」，喺被投票出局或者獵人槍殺嘅時候可以咬死多一個人。玩狼王嘅時候，獵人同狼王出局都唔應該揭牌。[14]喺《吖嗚狼人殺》入面嘅一啲板，狼王自爆同被騎士殺死亦都可以帶人走。[15] |
| 白狼王 | 又稱「狼騎」。日頭任何時候都可以自爆咬死一個人。 |
| 狼美人 | 每晚同狼隊友一齊殺人之後，可以再單獨開眼揀一個玩家嚟姣，畀狼美人姣嘅玩家係唔會知道自己畀人。除咗被騎士殺死之外，狼美人死嘅時候，上一晚姣嘅人會殉情而死。喺大部分嘅玩法入面，狼美人唔可以自刀或者自爆，或者自爆咗都唔會姣死人。被狼美人姣死嘅玩家會計做比狼美人死先。[16][17][18] |
| 隱狼 | 唔會同狼隊友見面殺人，畀預言家查嘅時候唔會顯示係狼人。 |
| 惡靈騎士 | 每晚可以同其他狼隊友一齊殺人。惡靈騎士另外有兩個被動技能：佢唔會喺夜晚殺死，即係女巫毒藥、夜晚被殺死嘅獵人開槍都殺唔死佢。另外仲有一次反彈技能，可以喺預言家查佢或者女巫毒佢嘅時候反彈殺死對方，不過只可以反彈一次，夜晚死嘅獵人開槍打佢都係會計做用咗反彈功能。 |
常見遊戲配置
[編輯]狼人殺嘅遊戲配置一般叫做「板」，係指遊戲身份嘅搭配。狼人殺可以畀最少六個，最多十八個甚至更多嘅玩家同時玩。玩遊戲嘅人數唔同嘅時候，身份類型嘅搭配亦都會有所唔同。常見嘅遊戲規則係屠邊規則，所以遊戲人數一般都會係三嘅倍數，平均返狼人、神職同平民身份嘅人數。喺各項坊間舉辦嘅狼人殺比賽入面，一般都會用十二人嘅板。十人以上嘅板通常會選警長。
| 人數 | 好人陣營 | 狼人陣營 | |
|---|---|---|---|
| 神職身份 | 平民身份 | 狼人身份 | |
| 6 | 2 | 2 | 2 |
| 7 | 2 | 3 | 2 |
| 8 | 3 | 3 | 2 |
| 9 | 3 | 3 | 3 |
| 10 | 3 | 4 | 3 |
| 11 | 4 | 4 | 3 |
| 12 | 4 | 4 | 4 |
| 13 | 4 | 5 | 4 |
| 14 | 5 | 5 | 4 |
| 15 | 5 | 5 | 5 |
| 16 | 5 | 6 | 5 |
| 17 | 6 | 6 | 5 |
| 18 | 6 | 6 | 6 |
下面會列出一啲常見嘅板，更多板嘅資訊可以睇下狼人殺百科嘅相關文章（中文）。
| 人數 | 好人陣營 | 狼人陣營 | |||
|---|---|---|---|---|---|
| 神職身份 | 平民身份 | 狼人身份 | |||
| 6 | 預言家+獵人 | 2平民 | 2狼人 | ||
| 預言家+守衛 | |||||
| 9 | 預言家+女巫+獵人 | 3平民 | 3狼人 | ||
| 10 | 4平民 | ||||
| 預言家+女巫+獵人 | 白痴 | 3平民 | |||
| 預言家+女巫+獵人+騎士 | 3平民 | 狼人+雪狼+狼王 | |||
| 12 | 預言家+女巫+獵人+白痴 | 4平民 | 4狼人 | ||
| 預言家+女巫+獵人+守衛 | 3狼人+狼王 | ||||
| 預言家+女巫+騎士+守衛 | 3狼人+白狼王 | ||||
| 3狼人+狼美人 | |||||
| 3平民+老流氓 | |||||
遊戲流程
[編輯]主持人會喺開始遊戲之前向每一個玩家派一個身份。玩家確認身份之後，遊戲就會開始。
夜晚階段
[編輯]- MC宣布「天黑，所有人闔埋眼。」
- MC宣佈「狼人請開眼」叫醒狼人，狼人可以溝通同揀殺死邊個。
- 狼人闔埋眼之後，MC逐個神職身份叫醒用夜晚嘅技能。（有啲身份係會早過狼人開眼，例如守衛、魔術師呢啲可以影響其他人技能嘅身份）
- 警長競選（只會喺第一晚之後進行）
- MC宣佈「依家會選警長，想選警長嘅人舉手。」
- 想選警長嘅玩家舉嗮手之後，MC再宣佈「天光，所有玩家可以醒啦。」
- MC隨機揀一個候選人開始發言。狼人可以喺選緊警長嘅時候隨時自爆，但係騎士就唔可以撞人。
- 所有想選警長嘅人講嗮嘢之後，就會去到退選（退水）環節，退選嘅玩家需要向MC示意。
- 原先就冇競選警長嘅玩家可以投票選出警長，警長獲得警徽。若出現平票就要PK發言，再度平票或所有人棄票嘅話嗰局就會冇警長。
- 註：如果所有玩家都想選警長，警上發言及退選環節後，仲有多過一個人繼續競選，又或者冇人想選警長嘅話，嗰局就會冇警長，發言嘅次序就會由MC決定。
- 日頭階段
- MC宣布「天光，所有玩家可以醒啦。」並且宣佈上一晚死咗嘅人定或係平安夜。除第一晚死嘅人之外，其他夜晚死嘅人都唔會有遺言。死者有特殊功能嘅話可以選擇去用；警長死咗就可以自己揀另一個人做新警長，或者唔揀都得。
- 有警長嘅話，由警長揀佢左邊或者右邊嘅人，又或者喺淨係得一個人死嘅時候揀死者嘅左邊或者右邊第一個人先講嘢。冇警長嘅就由MC隨機揀人開始講嘢。
- 所有人講完嘢之後，警長可以歸票。
- 進行放逐公投，所有存活玩家（除咗已經揭咗牌嘅白痴或者替死鬼死嘅時候冇畀投票權嘅人之外）可以投票。如果出現平票就進行PK發言，再平票或者所有人棄票就冇人會被放逐。PK發言期間，狼人唔可以自爆，騎士亦都唔可以撞人。
- 被放逐嘅玩家可以講完遺言之後離場，之後再入夜直到分出勝負。
其他規則
[編輯]狼刀在先
[編輯]如果場上最後一隻狼晚上殺死最後一名神職人物或平民，而女巫同守衛冇保護呢個人；而女巫再對最後一隻狼用毒，或者獵人死咗之後想帶走最後一隻狼，都係無效同埋計做狼人獲勝，因為夜晚狼人比可以將其他殺死其他玩家嘅神職人物（例如女巫、獵人）更早行動，狼人殺死最後一個人嘅時候已經贏咗。[19]
狼人自爆
[編輯]狼人自爆有以下呢啲規則[20]：
- 狼人可以喺日頭階段發言期間自爆（有啲規則狼人只可以喺自己發言時自爆），講緊嘢嘅人需要即刻停止講嘢，白狼王可以帶走一個人，之後強制入夜；
- 狼人唔可以喺PK發言嘅時候自爆；
- 狼人喺選警長嘅時候自爆有兩款規則：
- 單爆吞警徽：狼人自爆後，警長競選即刻完，MC宣佈死訊，死者講完遺言（如有）之後直接入夜，嗰局再冇警長。
- 雙爆吞警徽：狼人喺第一日選警長嘅時候自爆之後，警長競選會暫停，MC宣佈死訊，死者發表遺言（如有）之後直接入夜。警長競選會喺第二日宣布死訊之前繼續，如果再有狼人自爆，主持人宣布死訊，死者冇遺言，然後再入夜，嗰局再冇警長。
註
[編輯]
參考
[編輯]- ↑ 狼人杀官方获得千万融资 下一步会走向何方 互聯網檔案館嘅歸檔，歸檔日期2020年6月12號，. 游戏 腾讯网
- ↑ 狼人杀规则说明书 最新游戏规则大全详解 87G手遊網, 2017-10-12.
- ↑ 狼人杀角色大全 所有身份职业牌详细技能介绍 87G手遊網, 2017-09-11.
- ↑ 狼人杀警长有什么用 警长怎么玩 87G手遊網, 2017-09-20.
- ↑ 狼人杀村民怎么玩 村民怎么发言 87G手遊網, 2017-09-12.
- ↑ 狼人杀预言家怎么玩 预言家怎么发言 87G手遊網, 2017-09-14.
- ↑ 狼人杀女巫怎么玩 女巫用药规则 87G手遊網, 2017-09-14.
- ↑ 狼人杀猎人怎么玩 猎人发言技巧 87G手遊網, 2017-09-14.
- ↑ 狼人杀白痴怎么玩 白痴技能规则 87G手遊網, 2017-09-15.
- ↑ 狼人杀守卫怎么玩 守卫发言技巧规则 87G手遊網, 2017-09-15.
- ↑ 【娛樂百分百】2018.11.14《凹嗚狼人殺》小豬、愷樂│Wish、陳零九、楊晨熙、嘻小瓜、荳荳、李洛洋、愷愷、梓梓 YouTube, 2018-11-14.
- ↑ 狼人杀骑士怎么玩 骑士技能怎么用 87G手遊網, 2017-09-14.
- ↑ 狼人杀狼人怎么玩 狼人怎么发言 87G手遊網, 2017-09-13.
- ↑ 狼人杀毒狼技能怎么用 毒狼第六代角色怎么玩 87G手遊網, 2017-09-26.
- ↑ 【娛樂百分百】2018.12.03《凹嗚狼人殺》小豬、愷樂│焦凡凡、斯亞、大根、鮪魚、梁以辰、大飛、KIM、黃少谷 YouTube, 2018-12-03.
- ↑ 狼人杀狼美人怎么玩 狼美人技能是什么 87G手遊網, 2017-09-26.
- ↑ 狼人杀雪狼怎么玩 雪狼功能规则 87G手遊網, 2017-09-26.
- ↑ 【娛樂百分百】2019.11.05《凹嗚狼人殺》小豬、愷樂│陳零九、邱鋒澤、偉晉、凱希、風田、李洛洋、阿虎、阿電 YouTube, 2019-11-05.
- ↑ 狼人杀狼刀在前规则 狼刀在先女巫是什么 87G手遊網, 2017-10-20.
- ↑ 狼人杀自爆规则 狼人自爆条件一览 87G手遊網, 2017-10-20.