獅子
![](http://upload.wikimedia.org/wikipedia/commons/thumb/5/5f/Disambig_gray.svg/25px-Disambig_gray.svg.png)
![]() | ||||||||||||||||
---|---|---|---|---|---|---|---|---|---|---|---|---|---|---|---|---|
![]() 獅子公一隻
![]() 獅子乸一隻
| ||||||||||||||||
物種分類 | ||||||||||||||||
| ||||||||||||||||
Panthera leo (Linnaeus,1758年) | ||||||||||||||||
![]() 獅子響非洲嘅分佈圖
| ||||||||||||||||
![]() 印度 Gujarat 州嘅吉爾森林(Gir Forest)係 300 隻野生亞洲獅最後嘅生境地。而家有計劃將亞洲獅再引入另一個地方:隔籬 Madhya Pradesh 州嘅 Palpur-Kuno 野生保護區
| ||||||||||||||||
Linnaeus,1758年 |
獅子(粵拼:si1 zi2),或叫獅,學名Panthera leo,係種住響非洲同亞洲嘅大型貓科動物,獅公嘅特徵係鬃毛。獅子係大型貓科動物中最成功嘅,以前佢分布幾大洲,今日佢嘅生存環境已經好細。
特徵
[編輯]獅子係繼虎之後第二大嘅貓科動物,佢重係非洲最大型嘅「獵人」。獅子公身長到 1.8 米,肩高度約 1.2 米,條尾長 1 米,平均重 215 公斤。獅子乸身長到 1.6 米,肩高度約 1 米,條尾長 0.85 米,平均重 150 公斤。非洲南部嘅獅子最大,亞洲嘅最細。
獅子毛短,呈黃色,獅子公有好長嘅鬃毛,一般深啡色、淡啡色或紅啡色。啲鬃毛由塊面一直生到膊頭同心口,有鬃毛嘅獅子喺鬣狗同其它食肉目對手眼中睇起嚟大隻啲。另一理論話長鬃毛更吸引獅子乸。野外觀察似乎證明特別深色同長嘅鬃毛的確對獅子乸更吸引。亞洲獅嘅鬃毛比非洲獅短啲。獅子仔冇鬃毛。一般獅子仔需要五年時間先出齊啲鬃毛。
此外獅子尾嘅篤篤有一簇黑色嘅長毛。幼獸身上有深色嘅斑點,喺大多數情況下呢啲斑點第一年會冇晒。喺極少數情況下呢啲斑點可以喺成年獅子嘅身上睇到,但唔清楚,往往要好近先至認得出。
耐唔耐會有白獅子,但白獅子唔係患咗白化病,因為對眼唔係紅色嘅。白獅子係遺傳造成,由於佢哋比較顯眼,一般好難響野外生存。至今雖然有關黑獅子嘅報導,但係冇任何證據。
生活環境
[編輯]以前響歐洲南部、西亞、印度、非洲都有獅子。冰河時期有一個亞種響中歐同北美洲生存過,冰河時期之後佢哋就消失咗。按嗰時學者嘅報導,古希臘時期嘅巴爾幹半島重有獅子生存。一般認為歐洲嘅獅子喺公元一世紀由於人類嘅活動絕晒種。
今日絕大多數獅子住響非洲撒哈拉沙漠以南,撒哈拉沙漠以北嘅獅子喺1940年代冇晒。20世紀時喺亞洲嘅獅子幾乎全部絕晒種,只係響印度嘅一個自然公園重淨番一啲響度。以前除咗森林之外,所有嘅生態環境都有獅子,今時今日佢哋嘅生存環境大大縮細。獅子比較鍾意草原,亦會響旱林同半沙漠中出現,就唔會響沙漠同埋雨林住。
中國冇產獅子,喺西漢時期(公元前138年)張騫出使西域時,開闢咗溝通中亞、西亞地區嘅絲綢之路,由於嗰帶有好多獅子,所以將佢帶返中國做貢品[2]。
生活方式
[編輯]社會結構
[編輯]同其他大型貓類唔同,獅子係一班獅子住埋一齊嘅, 一個獅子群主要由有血緣關係嘅獅子乸組成,地形同埋獵物嘅多少決定一個獅子群嘅大細,一個群有 3 至 30 隻獅子。獅子公只會留響一群獅子裏面留一段時間,之後佢就會離開,去另一群獅子度。雖然係咁,獅子公嘅地位高過獅子乸嘅地位,一般一個獅子群只有一隻成年嘅獅子公,獅子仔只會留響一群獅子裏面留三年,之後就會被趕走,而獅子乸會留低。後生嘅獅子公會唔穩定咁「一班人」走埋一齊,過住遊遊蕩蕩嘅生活,直到佢哋自己變成一個獅子群嘅阿頭,一般要到六歲或更老先可以做倒。
一般嚟講,當隻獅子公老咗或變得虛弱嗰時,就會有後生嘅獅子公向佢挑戰,輸咗嘅獅子唔係死就係走路,假如新來嘅獅子打贏,佢就會殺晒以前生落嘅獅子仔,咁呢就比較容易同啲獅子乸交配。
一班獅子嘅地盤面積從 20 到 400 平方千米,大細由班獅子嘅數目同地盤裏面嘅獵物數目決定。班獅子會用屎、尿、好遠都聽倒嘅叫聲嚟霸地盤。冇地盤嘅一班獅子會四圍遊遊蕩蕩。
繁殖
[編輯]雖然獅子公響一班獅子有好高地位,但係只係得隻獅子乸同意先可以同佢交配。如果獅子乸願意嘅話,佢就會趴響地,畀隻獅子公騎住。只要睇下獅子乸點對隻獅子公,就知隻獅子公地位有幾高。同埋,知道佢會唔會下次打唔過而被趕走。
獅子乸佗獅子仔四個月到,只會生兩到四隻。獅子仔重1.5千克。獅子仔唔單止可以啜阿媽奶,重可以啜其他乸嘅奶,皆因養獅子仔係成羣獅子嘅責任。獅子仔出世四個月之後會戒奶,之後重會跟阿媽兩年。獅子乸要三年先大,公就要五年。
獅子有廿年命,不過通常係乸先有咁長命。公通常未到呢個年紀,唔係俾後生殺死,就係俾後生嘅趕走。趕走之後就唔會再入到另一班獅子,跟住隻公就會餓死。所以,獅子公好少會過十二歲[未記出處或冇根據]。不過響動物園,有啲獅子可以有成三十四年命[未記出處或冇根據]。
食
[編輯]一般係由獅子乸打獵,獅子公只係響佢哋後生、鬃毛未出齊嗰陣先學打獵。啲深色嘅鬃毛好容易俾佢嘅獵物發現,唔容易捉到獵物。一般佢哋先匿埋,接近啲獵物,然後撲向獵物,撳佢落地,細嘅獵物一般被咬甩頭,大嘅獵物咬斷頸或被壓到窒息而死。
由於成功捉倒獵物只有一至兩成,通常打獵會響夜晚或清晨涼爽嗰時候進行。
獵物包括羚羊、小羚羊、牛羚、斑馬、兔仔、雀仔、非洲水牛、幼黑犀牛、豹、幼河馬、非洲獵犬、幼白犀牛,有時會係魚。食捉倒嘅獵物係要論資排輩嘅(跟喺斑獅子嘅地位高低而定):獅子公先,然後係地位最高嘅雌性獅子,獅子仔最後。同一班獅子往往會為咗地位呢樣嘢爭餐死嘅,大打出手,往往會整嚫、整傷。
獅子亦會食腐爛嘅肉,被踢出嚟嘅獅子公一般只食屍體,或者去搶其他食肉動物好似豹或獵豹嘅獵物,亦會喺鬣狗口中搶嘢食。
威脅
[編輯]![](http://upload.wikimedia.org/wikipedia/commons/thumb/0/00/Lions_lying.jpg/220px-Lions_lying.jpg)
如同非洲其他大型動物,對獅子嚟講最大危險係人類捕獵。過去幾年,全部有獅子出現嘅地區,獵殺嘅情況已經減少,回復到可以容忍嘅地步。
病係另一個最大嘅威脅。1995年響南非嘅克魯格國家公園,首次發現會攞獅子命嘅肺結核。響公園嘅南面,90% 嘅獅子已經染咗呢隻肺結核,重向北部擴展緊。隻病係由佢哋嘅主要獵物之一——野牛——身上感染返嚟嘅,而野牛係同家牛接觸後先至被感染嘅,野牛嘅感染率達 70%。呢種病響獅子身上主要影響消化系統,染病後會變得衰弱同瘦,一般幾年後就會死。
除咗結核病外重有 FIV 呢種病威脅獅子嘅生存,FIV(Feline Immunodeficiency Virus,貓科免疫缺陷病毒)可以響 60% 到 70% 嘅獅子身上搵到,FIV 同人類免疫缺陷病毒相近,損害獅子嘅免疫能力,到而家為止無對付呢兩種病嘅疫苗。
亞種
[編輯]已知嘅 13 個亞種中有 2 種已經滅絕:北非獅(P. l. leo)住響北非。佢哋啲鬃毛尤其發達。1922年呢個亞種嘅最後一隻野生嘅動物喺阿特拉斯山脈被殺。歐洲嘅獅子係唔係屬於呢個亞種而家已經冇得再考證喇。
一啲私人嘅動物園試圖通過人工培養嘅方式重新培養呢個亞種出嚟。重做緊基因研究分析,想搵出佢哋究景係呢個亞種定係另一個亞種。
南非嘅好望角獅子(P. l. melanochaitus)亦已經冇晒。呢個最大嘅獅子亞種響19世紀俾獵人殺清光。
剩低嘅亞種 10 種住響薩哈拉沙漠以南嘅非洲。亞洲獅(P. l. persica)可能亦難逃滅絕嘅厄運。呢個亞種曾經一度跌到得返 20 隻,而家又恢復返到 300 隻。