美國曲架

美國曲架

美國曲架（American Cocker Spaniel，美曲）係曲架狗嘅一種。

起源

美國曲架原產於美國，佢嘅祖先係西班牙嘅獵鳥犬。大約十世紀初，由西班牙帶到英國，變成英國種，然後又帶去美國大量繁殖同改良，成為較細型嘅狗；叫做美國曲架狗。1946年公認為新狗種。至今仍然係美國最受歡迎同流行嘅狗種之一。

外貌特徵

• 身高：公 36-38 厘米；乸 34-36 厘米。
• 體重：10-13 千克。
• 頭：頭蓋圓，額段明顯，頰部唔闊。鼻端至額部嘅距離係頭蓋頂至鼻尖距離嘅一半。口闊而深，下頜方短而平，上唇蓋住下唇，牙齒粗壯，呈剪式咬合；鼻孔開張，鼻色黑。
• 耳：耳根位置低；耳長而下垂，佈滿長而密實嘅波浪形飾毛；耳仔質地柔軟，耳長達鼻。
• 眼：眼又大又圓，表情豐富；溫柔，眼深色。
• 頸：頸部肌肉豐滿，稍呈拱形。
• 身：身形短而堅實，結構緊湊，肩部傾斜度適度，胸深而寬闊，肋骨適當擴張，背脊至尾幾乎成一條直線而略為傾斜；臀部稍圓，肌肉豐滿。
• 四肢：四肢粗壯而短，肌肉發達。前肢直立，肘不外展；後臀肌肉豐滿，膝關節彎曲明顯，跗關節低下，腳寬大，多長飾毛，但唔影響活動。
• 尾：剪尾，留三分一；尾平翹，同尾根、背成一直線或稍高，興奮時搖擺。

特性

• 性情溫和，感情豐富，行事謹慎；性格開朗，活潑；精力充沛，熱情友好，機警敏捷，外觀可愛，服從性高，忠於主人。

缺陷

身高同體重超出標準好多；混色或雜色品種，主色未達 90% 以上；嘴長而尖細，眼細；色淺淡，耳細，胸狹窄，背脊拱起，四肢纖細，長尾都係缺陷。

用途

以前用喺打獵，而家多數係寵物，show dog，家犬睇門口。亦可以做狗醫生，緝毒犬。

揀狗要點

應該揀精力充沛、性情溫和、活潑開朗、機警。被毛應長而呈波浪形，豐厚密實，切忌短而稀疏；眼睛大而圓，眼神溫柔，眼色深色；耳應長而下垂至鼻，飾毛豐富，長而呈大波浪狀。體軀結構緊湊，肌肉豐滿而結實，胸厚，背部稍呈斜度，短尾；四肢粗短，強健有力，頭圓，吻寬深，下頜短而方平；指爪緊湊似貓爪，步伐好。

養狗要點

美國曲架活潑好動，應保持適當運動量，每日畀佢自由活動至少兩次。每日應定時定量餵佢，唔可以放任，防止佢過肥。呢隻狗毛長，最忌結成一嚿，所以每日都要梳毛，8-10 星期沖涼一次。傝耳狗易患耳病，要經常清潔耳道。眼亦應保持乾睜。趾甲易長，要定時剪，贅生趾（dew nail）要剪走。