老撾

呢一篇文有老撾文字母。當冇適當嘅展示支援，你可能會見到問號、盒或者係其它符號而唔係老撾文字母（英文幫手）。

老撾（粵拼：lou5 wo1；老撾文：ປະເທດລາວ Paxaxon Lao），又叫做寮國（liu4 gwok3），全名老撾人民民主共和國lou5 wo1 jan4 man4 man4 zyu2 gung6 wo4 gwok3（臺灣譯做寮人民民主共和國liu4 jan4 man4 man4 zyu2 gung6 wo4 gwok3），係中南半島上面一個內陸國，面積23.68萬平方公里，毗連中華人民共和國、柬埔寨、越南、緬甸同泰國，2021年人口733萬8千。曾經係真臘王國一部份，而家響東南亞地區當中僅有兩個重行緊社會主義嘅國之一（另一個係越南）。

老撾入咗東南亞國家聯盟卅幾年，首都係永珍（中國大陸叫「萬象」），永珍有座友誼大橋跨過湄公河將渠同泰國相連。

政治

老撾唯一嘅合法政治實體係老撾人民革命黨，國家政策嘅決定，一般由政治局同中央委員會進行，最後再由國會通過。

目前老撾人民革命黨總書記兼國家主席係通倫·西蘇里（ທອງລຸນ ສີສຸລິດ），國家副主席係巴妮·雅陶都（ປານີ ຍາທໍ່ຕູ້）同本通·吉瑪尼（Bounthong Chitmany），政府總理係ສອນໄຊ ສີພັນດອນ，國會主席係Saysomphone Phomvihane。

老撾全國分為17省（khoueng）同1直轄市（kampheng nakhon）永珍。省下設「鄉」（muang）同「村」（ban）。

旗

老撾旗

老撾旗以紅、藍、白爲主色。藍色象徵富饒，紅色象徵革命，白色圓圈象徵團結同光明嘅未來，同時代表圓月，象徵皎潔明月高掛喺湄公河嘅上空。呢支旗原本係老撾愛國戰線嘅旗。

國歌

内文：老撾人民歌

老撾國歌係《老撾人民歌》（ເພງຊາດລາວ），1945年開始用。

治安

大部份老撾人都純樸熱情，但係隨住旅遊業慢慢發展，偷嘢、呃遊客同埋托高價錢嘅情況都越來越多。另外，長年嘅戰爭搞到老撾東部重有唔少地雷、炸彈等未爆炸武器。

種族

根據老撾政府嘅官方數字，老撾全國有49個民族，根據唔同嘅居住地區分為三大族系：住喺平原地區嘅老龍族、住喺丘陵高原地區嘅老聽族同埋住喺高山地區嘅老松族。呢三個民族嘅服飾都印咗喺1,000老撾基普嘅銀紙正面。目前老龍族係老撾最主要嘅族群，約佔老撾人口嘅一半。

宗教

老撾人以信南傳佛教為主，一小部份信基督教或者伊斯蘭教。

語言

老撾話係老龍族嘅語言，亦係老撾嘅官話。喺老撾上寮、中寮、下寮三個方言區入面，以中寮嘅萬象話爲標準。英文喺老撾唔算普及，剩係喺永珍、龍帕邦、四千島等旅遊業較發達嘅地區先至比較通行。喺北部接近中國邊境嘅城鎮，用普通話可能重容易有人應。

• 老撾
• 
• 
• 
• 
• 
• 
• 
• 

攷

• 〈国家概况 — 中华人民共和国外交部〉 (簡體中文)。中華人民共和國外交部。
• 周榕榕。《沒$都要去老撾》 (繁體中文)。萬里機構、萬里書店。ISBN 978-962-14-4677-0。

出面網頁

• "Tourism Laos".
• 〈国家概况 — 中华人民共和国外交部〉 (簡體中文)。中華人民共和國外交部。
• 〈寮人民民主共和國 Lao People's Democratic Republic - 亞太地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
• "Laos - United States Department of State" (英文). 美國國務院.
• 老撾喺中央情報局《世界概況》嘅資料 （英文）
• 〈ラオス人民民主共和国 ｜ 外務省〉 (日文)。日本外務省。
• "Laos - Department of Foreign Affairs and Trade" (英文). 澳洲外交貿易部.