臺灣
![](http://upload.wikimedia.org/wikipedia/commons/thumb/5/5f/Disambig_gray.svg/25px-Disambig_gray.svg.png)
![](http://upload.wikimedia.org/wikipedia/commons/thumb/5/5f/Disambig_gray.svg/25px-Disambig_gray.svg.png)
![]() ![]() | |
---|---|
使用語言[1] | 國語 臺灣閩南話 臺灣客家話 臺灣原住民語 |
土地面積 | 35,980平方公里 (世界面積第 38 大嘅島) |
水域率 | 10.34% |
海岸線 | 1,566.3公里 |
人口 | 23,440,278人(2015年1月底) [2] |
行政 | ![]() |
行政規劃 | 臺南市、臺中市、新北市、桃園市、臺北市、高雄市、臺灣省(澎湖縣除外) |
最大城市 | 新北市 |
最高點 | 玉山(3,952米) |
主要港口 | 高雄港(世界第13名)[3] |
人口排名 | 46 名 |
人口密度 | 637.64 人/km² (世界第16名)[4] |
族群 | 漢族 南島語族(臺灣原住民) |
通貨 | 新臺幣(TWD)
|
時區 | UTC+8,無夏令時間 |
通行曆法 | 民國紀年、西元紀年、農曆[5] |
道路通行方向 | 靠右行 |
網域縮寫 | .tw |
長途電話代碼 | +886 |
臺灣(粵拼:toi4 waan1),別名寶島(bou2 dou2)[6]、鯤島(gwan1 dou2)、福爾摩沙(fuk1 ji5 mo1 saa1)係東亞一島,東臨太平洋、北朝東海,領土面積36,197平方公里。而家係中華民國政府嘅主要領土。
全島山勢險要、平原狹窄、地震頻頻,有唔少溫泉同死火山。高溫、多雨,春夏交接成日落梅雨,夏天有颱風,冬天最凍時得攝氏14度,年雨量2510毫米。受地形同氣候共同影響,臺灣有齊唔同嘅氣候區,自然景觀係就係多姿多采,但亦好多地震風災,自然災難成爲臺灣人生活一部份[7]。
2015年1月底臺灣大概有2,340萬人,以漢族為主,識講臺語嘅人佔七成以上,重有客家人、外省人同臺灣原住民。官方文字係正體中文,流通語言有國語、臺灣話、客家話同埋一啲南島語[8][9]。
產業主要有高科技、熱帶農產品、旅遊同影音文化,名列亞洲四小龍,按照購買力去計,臺灣平均生產總值有成31,834美元(2009年),全球排24位,喺亞洲區排喺星加坡(第4)、香港(第8)、日本(第23)之後;總產值就排19位,同澳洲差唔多[10]。
臺灣係大中華地區唯一實施全面民主普選嘅地方,自1990年代解嚴後,言論、集會、人身自由喺島上都得到充份保障,但由極權到民主嘅過渡期中,島內藍綠兩派政黨對立壁壘分明,政治環境經常受統獨問題、群族融合、國際認同問題以至黑金政治所擺佈。
名嘅由來
[編輯]臺灣個名,一説源自臺南原住民西拉雅族嘅「Taian」或者「Tayan」,指「外來者」[11];荷蘭殖民時期叫「Taioan」,音譯成「大員」、「臺員」、「大灣」或「臺窩灣」,原本只係講今日臺南安平地區一帶,清朝演變成成個島嘅名[12]。另一說指明代漢人由福建去臺灣海峽時,海峽有黑水溝之稱,水流兇險,有去無回,到埗後又因病疫而客死異鄉,於是將臺灣叫「埋冤」,後來因為大吉利是,按閩南話發音改成「臺灣」[13]。
臺灣又叫「福爾摩沙」,解做美麗島,相傳16世紀葡萄牙船隻路經臺灣時,水手高呼「Ilha(島)Formosa(美麗)!」,1950年代前曾經係歐洲國家對臺灣嘅主要稱呼[14]。
臺灣正式名係「臺灣」,同「台」相通,民間多數寫「台灣」[15],喺部分官方文件用「臺灣」[16]。
地理
[編輯]臺灣本島一帶有22個小島,臺灣海峽至澎湖群島又另外有90個島。臺灣本島約佔中華民國實際行政區域98%,最大城市係臺北市。臺灣嘅屬島,東有龜山島、綠島、蘭嶼,北有彭佳嶼、棉花嶼、花瓶嶼、基隆嶼,西南有小琉球,而釣魚臺就有主權爭議而地位未明。
至於臺灣海峽西側嘅馬祖、金門、烏坵,屬於中華民國福建省。而南中國海諸島好似東沙、南沙群島,就由高雄市管[17]。
地質
[編輯]![](http://upload.wikimedia.org/wikipedia/commons/thumb/d/d3/TaiPengKinMa_map.png/200px-TaiPengKinMa_map.png)
臺灣實情係由歐亞大陸板塊同菲律賓板塊相撞後擠出嚟嘅島。擠壓作用令臺灣島慢慢鼓起,形成島上好多山脈。花東縱谷將臺灣島一分為二,縱谷東邊嘅海岸山脈屬於菲律賓板塊,西邊嘅中央山脈、雪山山脈同玉山山脈就屬於歐亞板塊。玉山山脈形成後,再出現阿里山山脈。來自高山嘅雨水係咁沖刷,再造就山脈西側沖積平原嘅誕生。今時今日,板塊運動仍然持續,臺灣頻頻地震。
臺灣全島南北縱長約395公里,東西闊度最長約144公里,環島海岸線長約1139公里,含澎湖群島總長約1,520公里,面積約35,915平方公里,個島似條蕃薯。因為四面環海,孕育咗各種海岸地形。北部海岸多岬灣同岩岸,西部海岸多沙灘、沙丘、潟湖、泥質灘地,南部恆春半島係珊瑚礁海岸,東部屬於斷層海岸,坡度陡峻而多斷崖。河流細長而急,河床有岩石凸出,亦有平沙鋪地,瀑布、壺穴、奇石滿布臺灣溪流。
山脈多數呈北北東-南南西走向,主要有貫通南北嘅中央山脈,靠西有玉山山脈同阿里山山脈,北部有雪山山脈,重有東海岸嘅海岸山脈,合稱臺灣山脈。玉山主峰海拔3,952公尺,乃東亞第一高峰,有「新高山」之稱。
平原同盆地佔臺灣地形只有三分之一,雖然又細又散,但人煙稠密。主要盆地有北部臺北盆地,中部臺中盆地兼埔里盆地,同埋東部地區泰源盆地[18]等。嘉南平原位於南部嘉義、臺南同高雄,係臺灣最大平原。重有中部彰化平原,南部屏東平原,東北部蘭陽平原、東部花東縱谷等。
臺灣嘅雨量充沛,河川密布,但河川地勢陡峻,河床比降大,易有水災旱災,而且天然湖唔多,最大係日月潭,所以臺灣有唔少人工水庫,到2006年底已經起咗109座水庫,儲水271,425萬立方公尺,有效容量219,905萬立方公尺,以曾文水庫最大,總容量71,270萬立方公尺,有效容量59,550萬立方公尺。家陣重有幾座水庫傾緊要起。
氣候
[編輯]事關北回歸線穿過臺灣島中南部,臺灣南北分屬唔同嘅氣候區。北部乃亞熱帶季候風氣候,南部係熱帶季候風氣候。5月到9月係臺灣夏季,氣溫經常達27到35℃,7月平均氣溫更有成28℃。冬季時間短,加上臺灣四面環海,一旦中國北方寒流南下,亦有海洋暖流中和,1月平均氣溫15℃以上,但合歡山、玉山、雪山等山區,仍然有機會落雪。
臺灣平均年降雨量2515毫米,但因應季節、位置、海拔,雨量亦有變化。北部、東部全年有雨,基隆因降雨充沛而叫「雨港」,中南部雨季集中喺夏季。
同香港一樣,臺灣每逢6月至9月都係颱風季節,颱風喺太平洋形成後,經常先會登陸呂宋或者臺灣,再吹落香港,所以臺灣受颱風衝擊亦比香港大;2009年8月颱風襲臺觸發八八水災,高雄小林村被滅,造成近700人死。
生態
[編輯]臺灣嘅森林主要受海拔影響。海拔1500公尺以下係闊葉林,1500公尺以上就係針葉林,3500公尺以上高山地帶有灌木或者草原[19]。臺灣嘅海岸地區過去有大片紅樹林同沼澤,孕育好多潮間帶生活嘅動物,但今日只有臺南七股鄉溼地、臺北淡水河河口仍零星保留。最南端嘅恆春半島,仍有熱帶季風林同珊瑚礁。由於平地都俾人開發,體型龐大嘅野生動物只好匿入山區。
![](http://upload.wikimedia.org/wikipedia/commons/thumb/6/6e/Oncorhynchus_masou_formosanus.jpg/200px-Oncorhynchus_masou_formosanus.jpg)
棲息地破壞、外來物種入侵,亦影響原生動物,其中福壽螺、美國螯蝦、澳洲淡水龍蝦、吳郭魚呢四種外來物種抵臺後,無天敵制衡,搞到過度繁殖,導致臺灣原生田螺、螯蝦同鯽魚大減;17世紀時曾經滿山遍野嘅臺灣梅花鹿,亦因為鹿皮可以賣去日本,而幾乎絕種。1983年起,中華民國內政部營建署公告成立8座國家公園,自1986年起亦陸續公告咗19個自然保留區。
人口
[編輯]![](http://upload.wikimedia.org/wikipedia/commons/thumb/d/d9/Rukai_chief.jpg/170px-Rukai_chief.jpg)
臺灣人口約23,133,074人(2010年4月統計),分四大族群:原住民、台語人(閩南人)、客家人、外省人。土著原住民約佔人口2%[20],其他絕大多數係漢族。但漢族又分為「本省人」(85%)同「外省人」(13%)。
本省人係指台語人(75%)同客家人(15%),泛指1949年前遷臺嘅大陸移民。外省人係指1949年跟國民政府遷臺嘅新移民。雖然每逢選舉,群眾問題經常畀政客操控,但由於混居同通婚,除咗喺眷村,兩者已唔容易分辨。客家人主要分布喺北部桃園、新竹山區、苗栗;南部高雄、屏東;以及東部花蓮、臺東等地,台語人就周圍都有。臺灣亦有啲東南亞人口,有外勞、過埠新娘;由佢哋生嘅仔女,隱約形成一個新族群。
至於原住民,臺灣政府共承認14個族,其中泰雅族、阿美族、布農族、卑南族、排灣族、魯凱族、鄒族、賽夏族、達悟族(即雅美族)合稱傳統9族;近年太魯閣族、賽德克族由泰雅族劃分出嚟,而撒奇萊雅族就由阿美族劃出來;而邵族同噶瑪蘭族亦同平埔族分家。不過,民間仍有唔少原住民,要求承認獨立身分。
潛在世界遺產
[編輯]臺灣並無聯合國承認嘅世界遺產,皆因1972年聯合國教科文組織通過《保護世界文化與自然遺產公約》以嚟,臺灣受制於國際孤立,中華民國無法簽署世界遺產公約。自2000年起,臺灣行政院文化建設委員會着手評估臺灣世界遺產潛力點,分別喺2002年、2009年評選出17個潛力點,兼且巡迴講解同做推廣,當中包括:玉山國家公園、大屯火山群、太魯閣國家公園、馬告檜木國家公園、澎湖國家風景區、卑南遺址、都蘭山、金門、淡水紅毛城、金瓜石、舊山線、阿里山森林鐵路、蘭嶼、桃園臺地、樂生療養院、排灣族、澎湖石滬、烏山頭水庫、嘉南大圳等[21]。2010年國際文化資產日研討會發表烏山頭水庫及嘉南大圳成為臺灣人心目中最佳嘅世界遺產潛力點[22]。
歷史
[編輯]![](http://upload.wikimedia.org/wikipedia/commons/thumb/7/78/Beinan_Archaeological_Site.jpg/180px-Beinan_Archaeological_Site.jpg)
石器時代
[編輯]臺灣估計喺舊石器時代後期(50,000年前─10,000年前)開始有人住,島上發現到一啲新石器時代(始於公元前5,000年)南島語系民族嘅遺蹟[23]。《三國志》記載吳國曾經出兵登陸夷洲,《隋書》亦有隋煬帝打琉球國嘅記載,但到底琉球、夷州係咪講臺灣,考起唔少專家。
臺灣原住民分佈全島,特徵有紋身、口琴、卉服、織貝、腰機紡織、貫頭衣、親族外婚、父子連名、年齡分級、老人政治、鳥佔、獵首、靈魂崇拜、室內葬[24]。太平洋各島嘅民族無論語言同風俗,都同佢哋有啲似,有講法認為佢哋係由臺灣飄洋出去。
中古時期
[編輯]![](http://upload.wikimedia.org/wikipedia/commons/thumb/c/c6/%E5%8F%B0%E7%81%A3%E5%9C%B0%E5%9C%96.jpg/210px-%E5%8F%B0%E7%81%A3%E5%9C%B0%E5%9C%96.jpg)
南宋開始有漢人喺澎湖開墾;1171年宋乾道七年,正式駐軍澎湖,由閩南晉江縣去管。1225年趙括所著諸蕃志提到「泉有海島,曰澎湖,隸晉江縣」,將臺灣離島-澎湖正式劃入南宋版圖。
1281年蒙古意圖東渡日本,兜過臺灣時,順手奪取澎湖,為征日做準備,從此將呢一區劃畀福建泉州府,主官為澎湖寨巡檢。明朝依循舊例喺澎湖設官,直到1384年明朝海禁後廢除。直到近兩百年後,即1563年,諗到沿海治安,先至恢復澎湖巡檢司。
1622年荷蘭東印度公司佔領澎湖後,呢個官署曾短暫停頓,兩年後明朝福建巡撫南居益派兵進攻澎湖,驅逐荷蘭勢力,收復返澎湖列島。
至16世紀中期當地原住民創立大肚王國(Kingdom of Middag),由15至18個村社組成,領土範圍位於大肚溪上中下游流域。1644年荷蘭人入侵後,大肚王國投降,荷蘭東印度公司同番王締約兼且承認佢番王身分,但明鄭王朝時期遭受打壓,清雍正年間又因抗清而滅亡。
16世紀中期,臺灣沿海倭寇活躍,每次喺中國東南沿海食完大茶飯後,就匿入澎湖,然後再到臺灣,慢慢成為臺灣本省人一部分。歐洲探險者之中,葡萄牙嚟臺灣更早,用鴉片同原住民換啲嘢,無進一步殖民。
1624年,海盜顏思齊喺魍港(另一講法係笨港)設立十個寨[25],由鄭芝龍繼承,佢最初係東南一帶最把炮嘅海盜,1628年俾明朝招撫。同年閩南大旱,鄭芝龍提議饑民去臺灣開墾[26],但有學者認為呢項提議得個講字[27]。呢段時期,鄭芝龍變咗中國東南沿海商船嘅龍頭,控制中國大陸對臺貿易[28]。
荷西殖民
[編輯]![](http://upload.wikimedia.org/wikipedia/commons/thumb/1/13/FortZelandia_S.jpg/200px-FortZelandia_S.jpg)
1624年,原佔領澎湖嘅荷蘭人同明軍簽約,放棄澎湖,轉入臺南,荷蘭人首先喺北汕尾(今臺南四草)起咗間商館,1625年喺「一鯤鯓」(今臺南安平)建成「熱蘭遮城」,為增加米、糖產量,開始招募中國福建居民去開荒。1626年至1642年,西班牙亦短暫霸住臺灣北部[29],西班牙人喺雞籠(今基隆)同社寮島(今和平島)打造聖薩爾瓦多城,之後又佔領蛤仔難(今宜蘭),又喺滬尾(今淡水)起「聖多明哥城」(今紅毛城原址)。
![](http://upload.wikimedia.org/wikipedia/commons/thumb/0/0d/1640_Map_of_Formosa-Taiwan_by_Dutch_%E8%8D%B7%E8%98%AD%E4%BA%BA%E6%89%80%E7%B9%AA%E7%A6%8F%E7%88%BE%E6%91%A9%E6%B2%99-%E8%87%BA%E7%81%A3.jpg/200px-1640_Map_of_Formosa-Taiwan_by_Dutch_%E8%8D%B7%E8%98%AD%E4%BA%BA%E6%89%80%E7%B9%AA%E7%A6%8F%E7%88%BE%E6%91%A9%E6%B2%99-%E8%87%BA%E7%81%A3.jpg)
荷蘭人同西班牙人喺東亞勾心鬥角,荷蘭人喺日本話西班牙企圖顛覆日本政府,引起日本鎖國,只准同中國同荷蘭做生意。荷蘭人亦無諗過今日留一線,他朝好相見,1642年攻佔西班牙嘅雞籠地區,將佢哋驅逐。荷蘭殖民王國係臺灣第一個有系統統治嘅政權,對平埔族亦有少少教育同傳教事業,但佔領目的只係為咗同中國、日本、朝鮮同南洋做生意。
由於苛徵稅收,激嬲原住民,1635年起分別發動麻豆溪事件、蕭瓏事件兩大起義。1652年,鄭芝龍舊部郭懷一為首嘅漢族移民,亦包叉荷蘭人,但都俾荷蘭人鎮壓,荷蘭人又起普羅民遮城(今赤崁樓)加強防範。1661年南明延平郡王鄭成功去福建班馬,圍剿熱蘭遮城,同荷蘭人開片,一年後荷蘭人投降,結束對臺灣殖民。
明鄭時代
[編輯]自1662年擊退荷蘭人到1683年降清為止,鄭氏三代統治臺灣共23年。手執反清復明大旗嘅鄭成功,苦戰九個月,迫荷蘭臺灣長官揆一喺1662年2月1號簽紙投降,從臺灣躝屍趷路,鄭成功建立咗臺灣首個漢人政權。鄭氏喺今日臺南市一帶,建立赤崁東都明京,設一府二縣,另設澎湖安撫司。無耐鄭成功釘蓋,由佢個仔鄭經繼位,1664年改東都為東寧,有東寧王國之稱。
不列顛東印度公司曾經同鄭氏政權簽訂通商條約,當時英國叫佢做「臺灣王國」或「福爾摩沙王國」[30]。喺陳永華輔政下,建立完整中央政府體制,撫土民,通商販,興學校,進人才,定製度,境內大治;陳永華亦即小說家口中嘅陳鎮南,韋小寶嘅師父。
鄭經死後,臺灣鬧政變,由二仔鄭克塽繼位,1683年清軍水師施琅為報鄭成功殺佢老母閤家之仇,攻入澎湖、臺灣,鄭克塽投降。一部分南明遺臣流落異鄉,有部分去咗當時由高棉王國控制嘅胡志明市、美荻,變成所謂「明鄉人」,一部分留喺臺灣,成為本省人一部分。清廷官員曾經叫政府放棄臺灣,但施琅極力阻止,康熙於是將臺灣劃入大清帝國版圖,歸福建省管轄[31]。
清治時期
[編輯]![](http://upload.wikimedia.org/wikipedia/commons/thumb/1/16/Tainan_gold_city.jpg/200px-Tainan_gold_city.jpg)
清治時期由1683年起,直到甲午戰爭後將臺灣割畀日本,前後管咗212年。1684年4月,臺灣正式納入清朝版圖,但清朝並無積極經營建設,主要係叫人自己開荒。
最初將十幾萬荷鄭時期已住喺臺灣嘅漢人,強制遣返,之後又嚴格限制大陸人移去臺灣,唔得帶老婆仔女,當然你有張良計,我有過長梯,唔少人偷渡去[32]。但官吏苛征、又雞同鴨講,民變不斷,出名有1721年朱一貴事件、1786年林爽文事件、1862年戴潮春事件。
到18世紀乾隆後期出現好多開墾移民,以福建漳州同泉州人居多,但兩派人因爭地問題,引起泉漳械鬥,清朝撓晒頭、無晒符;呢種對立令經濟發展更加難,雖然後來唔少仕紳介入擺和頭酒,要大家和和氣氣,平息咗糾紛,但今日臺灣仍然存有族群分立嘅積習。
19世紀中葉後,面對列強壓力,臺灣自1860年起開放部分港口。第一次鴉片戰爭時,英艦幾次出現喺臺灣外海,試圖佔領北部基隆港同西岸梧棲港,但都佔唔到。
1874年,日本話臺灣南部原住民殺害琉球漁民,出兵恆春半島,引發「牡丹社事件」[33]。1874年5月27號,清廷馬上叫沈葆楨去臺灣,加強防衛,重革新臺灣行政;再由繼任人福建巡撫丁日昌繼承落去。1884年中法戰爭時,法國軍隊出兵澎湖群島同臺灣北部[34],令清朝更加認識臺灣喺海防嘅角色。
1884年清朝同法國因為越南問題開炮,派劉銘傳去臺灣擔旗,滬尾大捷中成功驅趕法軍。1885年,清朝設立臺灣省,由劉銘傳出任臺灣首任巡撫[35],整理軍備,同時整咗唔少基礎設施,由佢督臺期間,臺灣第一條鐵路開通,由基隆港開到新竹,亦鋪設臺灣同福建之間第一條跨海電纜,建立咗電報局、煤務局、鐵路局,令臺灣短短五年間成為中國先進省份[36]。但劉銘傳政府嘅唔廉潔,亦無考慮臺灣財政負擔能力,導致唔少民怨,1889年彰化就因為清田賦問題而爆發施九緞事件。
1894年12月,時值甲午戰爭,唐景崧接任臺灣巡撫,清廷戰爭,簽下馬關條約,將臺灣同澎湖割畀日本。臺灣人建立臺灣民主國(Republic of Formosa)反抗,唐景崧就任臨時大總統,劉永福做大將軍,但日軍登陸後,臺灣民主國兵敗如山倒,開始50年日治時代。
日治時代
[編輯]![](http://upload.wikimedia.org/wikipedia/commons/thumb/3/3c/Japan_with_inset_map_Formosa_and_Riu-Kiu_Islands_from_A_Literary_and_Historical_Atlas_of_Asia%2C_by_J.G._Bartholomew._J.M._Dent_and_Sons%2C_Ltd._1912.jpg/200px-Japan_with_inset_map_Formosa_and_Riu-Kiu_Islands_from_A_Literary_and_Historical_Atlas_of_Asia%2C_by_J.G._Bartholomew._J.M._Dent_and_Sons%2C_Ltd._1912.jpg)
![](http://upload.wikimedia.org/wikipedia/commons/thumb/c/cb/TaiwanShow1935-2.jpg/220px-TaiwanShow1935-2.jpg)
自1895年6月17號日本喺臺北城舉行「始政式」起,1945年10月25號中華民國接收臺灣為止,臺灣俾日本管咗50年。日治初期,唔少臺灣官紳反抗,但短命政權臺灣民主國節節敗退,臨時大總統唐景崧着草去廈門,之後三個月,民主國同日軍血戰,14,000名臺灣兵戰死,史稱「乙未戰爭」,同時亦係臺灣史上最大戰爭[37]。
初期日本實施軍人統治,以保甲制管臺,直到1898年任命陸軍將領兒玉源太郎中將做第四任總督,又派後藤新平擔任民政長官輔政,軟硬兼施,臺灣政局趨向穩定。1908年,鐵路縱貫臺灣,臺灣南北車程由以前幾日縮短到1日。1919年日本派田健治郎做臺灣首任文官總督,建造水、電、公路、運輸、醫療、教育事業。又推動「農業臺灣,工業日本」政策,叫臺灣人種蔗糖、稻米,兼且開採金銅煤礦、森林、鹽等自然資源。同時,日本重劃臺灣行政區域,進行「市區改正」工作,臺灣境貌開始東洋化。
![](http://upload.wikimedia.org/wikipedia/commons/thumb/0/05/Railway-Department-Office-Japanese-Taiwan-1920s.png/200px-Railway-Department-Office-Japanese-Taiwan-1920s.png)
日本又開始進行殖民教育,喺山區設番學校,平地設小學校同公學校,但因為小學校學費高,所以學生多數係日人子弟同臺灣富家子。雖然係噉,文治科學亦由呢個時期開始喺臺灣發展[38]。
不過,臺灣依然有反日情緒,以中、南部地方勢力最大,1915年更首次用宗教力量,引發西來庵事件,亦有以莫那魯道為首嘅霧社事件,最後都被鎮壓或勸降收場。自1920年代起,美國提出「民族自決」主張,臺灣讀書人要求自治,但後尾都因為左、右兩派分裂,加上殖民政府實行懷柔政策,反抗越來越少。
「始政四十週年紀念臺灣博覽會」標誌住臺灣日治時代嘅高峰,鐵路貫通、衛生改善、郵信發達、農產豐收、人口遞增,1930年嘉南大圳同烏山頭水庫建成,令臺南州地區有150,000甲嘅土地得到充足水量。呢個水利工程當時係亞洲最大。
![](http://upload.wikimedia.org/wikipedia/commons/thumb/6/6e/Taipei_bomb.jpg/180px-Taipei_bomb.jpg)
1937年二戰爆發,日本喺臺灣推行皇民化運動,叫臺灣人效忠大日本帝國,講日文,改日本姓,着日本衫,改信神道教,總之乜都日本,直到今日,臺灣前總統李登輝話自己係「日本人」,就源自呢個政策[39]。同時臺灣又喺1945年實行徵兵,投入中國及東南亞戰場,不過大戰已經去到尾聲,徵兵好快停咗。
1945年8月15日,日本天皇發表終戰詔書,宣佈無條件投降,二戰結束。中華民國政府兩個月後去臺灣舉行中國戰區受降典禮,開始中華民國治臺時期,直到今日。
中華民國
[編輯]1945年,第二次世界大戰結束,日本簽署《降伏文書》,中華民國國民政府代表何應欽接收降書,由陳儀出任「臺灣省行政長官公署」最高行政首長,正式開始對臺統治。
![](http://upload.wikimedia.org/wikipedia/commons/thumb/1/14/228_Incident_h.jpg/220px-228_Incident_h.jpg)
不過行政長官公署兼抵達臺灣嘅國軍形象麻麻,唔得民心,同臺灣人經常有拗撬,加上戰後經濟崩潰、惡性通貨膨脹、物價飛升,1947年初拉緝私煙小販時,引起警民衝突,卒之爆發影響深遠嘅二二八事件。國府當時指責參與者「陰謀叛亂」、「鼓動暴亂」、「臺灣獨立」、「陰謀叛國」,之後又展開清鄉行動,唔少百姓無辜入獄、處死、周圍有人間蒸發嘅個案。臺灣白色恐怖年代,呢件事一直係敏感話題,埋下本省人仇視外省人嘅情緒,亦為臺獨運動留底火種,直到1995年,當時嘅李登輝總統首次代表政府,正式向受難者同家屬道歉,但群族對立嘅情緒仍揮之不去。
![](http://upload.wikimedia.org/wikipedia/commons/thumb/8/80/%E5%8F%B0%E5%8C%97%E6%8D%B7%E9%81%8B%E5%8C%97%E6%8A%95%E7%AB%99_-_%E5%BE%A9%E8%88%88%E5%B4%97%E7%AB%99%E4%B9%8B%E9%96%93%E4%B8%80%E5%BA%A7%E8%94%A3%E4%B8%AD%E6%AD%A3%E9%8A%85%E5%83%8F.jpg/200px-%E5%8F%B0%E5%8C%97%E6%8D%B7%E9%81%8B%E5%8C%97%E6%8A%95%E7%AB%99_-_%E5%BE%A9%E8%88%88%E5%B4%97%E7%AB%99%E4%B9%8B%E9%96%93%E4%B8%80%E5%BA%A7%E8%94%A3%E4%B8%AD%E6%AD%A3%E9%8A%85%E5%83%8F.jpg)
1949年,國民政府敗走臺灣,無耐韓戰爆發,中朝美韓為首嘅軍隊大戰,美國艦隊同時進駐臺海,共軍攻臺嘅計劃受阻,1958年爆發金門八二三砲戰,共軍由最初日日打,演變成單打雙停(單日打砲,雙日唔打)。直到1978年底至正式宣告結束對峙局面[40]。
呢段時間,臺灣社會受兩種重要法領影響,一條係1948年5月10號實施嘅《動員戡亂時期臨時條款》;另一種係1949年5月20號實行嘅《戒嚴令》,當時蔣介石總統以穩定政權、防止中共滲透為由,展開長期戒嚴,大興報禁書禁,緝捕異見人士,其中警備總署更令唔少臺灣人心驚膽跳,怕入去後無命返出嚟。雖然1950年代實行地方自治,縣級以下民意代表、行政首長、省議會,理論上由公民直選產生,但前提係要聽晒政府話,黨外人士多數被排除出局。
![](http://upload.wikimedia.org/wikipedia/commons/thumb/f/f1/Map_of_Taiwan.jpg/200px-Map_of_Taiwan.jpg)
臺灣同時利用美援,推行經濟改革。當時臺灣省省主席陳誠推行「耕地三七五減租條例」、「公地放領」同埋「耕者有其田」,穩定農業。工業上,藉住土地改革,帶動工商業發展,工業以加工出口為主。1953年經濟已逐漸恢復到戰前水準,加上日治時期嘅基建、中國來臺資金、技術同美援下,臺灣經濟開始起飛。
1960年代,唔少工廠眼見工資上漲,搬出臺灣,臺灣經濟政策只好改成出口擴張。1966年,政府成立高雄加工出口區,係亞洲第一個加工出口區。1963年,工業佔臺灣國民經濟中嘅比重,已超過農業。直到第一次石油危機前,臺灣經濟保持雙位數增長。1968年,九年免費教育實施,同時亦利用學校推行三民主義思想。1969年9月16日,蔣中正喺陽明山撞車,身體狀況大不如前,臺灣政治開始下放畀佢個仔接手。
去到1970年代,臺灣面臨三大挑戰,包括國際孤立、能源危機,以及蔣中正逝世。1971年,中華民國政府被迫宣佈退出聯合國[41],陸續解除同多國嘅外交關係,1979年1月1號,美國同中華民國斷交,臺灣人自此有「亞細亞孤兒」嘅叫法。
同時,1973年全球爆發能源危機,嗰年11月,行政院院長蔣經國推動十大建設同十二大建設,穩住經濟發展。但1975年4月5號清明節午夜,蔣中正病因心臟病逝世,震撼朝野,事後由副總統嚴家淦繼任總統,直到1978年。1978年蔣經國當選第六、七任總統,成為臺灣走向民主政治嘅轉捩點。
喺政治環境大逆轉下,臺灣黨外人士開始私印政論雜誌,要求落實民主政治同言論自由。1979年12月,高雄市發生臺灣規模最大嘅民主抗爭活動美麗島事件,示威者被軍事審判,引起國際矚目,陳水扁、呂秀蓮、施明德等人亦喺事件中漸露頭角[42]。
1980年代,臺灣已成功由農業經濟轉型到輕重工業,國民生產總值超過6000美元,同香港、南韓、新加坡位列亞洲四小龍,股市一片興旺,政府又擴建新竹科學工業園區,鼓勵內外廠商投資集成電路、電腦產業,由臺灣生產嘅電腦主機板,產量已躍居到世界第一。
但經濟暢旺,並無令民主呼聲減弱,相反,哄動朝野嘅陳文成命案、江南案、十信案相繼發生,國民黨除咗喺島內涉嫌殺人,重派黑幫去美國暗殺筆名江南嘅異見人士。結果唔止臺灣黨外人士反抗更大,就連美國亦施壓,卒之1986年,政府默許民主進步黨成立;1987年7月14日蔣經國宣佈解除戒嚴令,隨後開放黨禁、報禁,容許民眾返大陸探親、展開國會改革。而喺江南案中疑似扮演重要角色嘅蔣經國二仔蔣孝武,從此無緣繼承大統;1988年蔣經國去世,由副總統李登輝繼任,蔣家王朝終於結束,臺灣正式邁向現代政治。
![](http://upload.wikimedia.org/wikipedia/commons/thumb/f/fc/Surface-to-Air_Missile_Coverage_over_the_Taiwan_Strait.png/300px-Surface-to-Air_Missile_Coverage_over_the_Taiwan_Strait.png)
1990年代,街頭抗爭已成為臺灣人家常便飯,較出名有519綠色行動、鹿港居民反杜邦設廠事件、五二〇農運、無殼蝸牛運動。李登輝喺1990年第一屆國民大會第七次會議當選總統選舉後,繼續推動民主化同本土化,任內曾六次修憲。
1990年大學生發起三月學運,李登輝認同學運,又宣佈修憲同改選國民大會,1991年5月1日宣佈結束「動員戡亂」,卒之結束「萬年國會」,重拍板喺1996年舉行華人史上首次全民總統大選。1995年又落實全民健康保險。
1995年中共越睇越對李登輝唔順眼,李登輝去美國康奈爾大學,發表「民之所欲,長在我心」演講,認為李登輝有臺獨傾向,又認為李登輝意圖影響中華民國首任總統選舉,中共於是喺臺海舉行演習,將飛彈射去基隆外海,當時臺灣人民恐慌,美國亦派出航空母艦到臺海。1996年3月23日,李登輝同連戰,以高票贏得中華民國第九任正副總統職位。
1998年,中華民國政府通過凍省政策,變相廢除「臺灣省」,雖然有助減少政府架床疊屋嘅架構,但凍省、廢省亦引發尖銳嘅統獨爭議[43]。一年後,李登輝提出特殊兩國論,宣稱中華人民共和國同中華民國係兩個對等「國家」,兩岸關係持續緊張。
![](http://upload.wikimedia.org/wikipedia/commons/thumb/7/79/Earthquake-_road_crack.jpg/220px-Earthquake-_road_crack.jpg)
1999年9月21號臺灣集集發生黎克特製7.3級地震,簡稱921地震。102秒嘅震動,造成2,415人死、30人失蹤、11,306人受傷、11萬間屋被毀,成為臺灣自和平時代以來,死傷最慘重嘅災難。
2000年3月18日,民進黨陳水扁、呂秀蓮,當選第十任正副總統,係華人共和史上,首次政黨和平更替,喺中港臺以至海內外都引起唔少關注。而由於民進黨嘅臺獨色彩,外界更加關注陳水扁上臺後,會唔會深化臺獨。2001年,廈門同金馬實施小三通,係兩岸自1949年以嚟,第一次小規模正式通商、通航和通郵;2001年,喺中共默許下,又以「臺澎金馬個別關稅領域」名義加入世界貿易組織。
不過,兩岸關係喺2002年又陷入谷底,陳水扁喺嗰年8月,公開話臺灣同中國大陸係「一邊一國」,引發中、臺、美三方爭議。
2003年,全球爆發SARS疫情,3月14日臺灣出現首宗病例,全臺恐慌,醫院封院、街坊封樓。2004年,陳水扁同呂秀蓮喺「字彈會轉彎」嘅槍擊事件下連任,引起社會好多爭論。雖然阿扁當選,但爆出多宗貪污醜聞,民望步步下跌,2006年9月9號,民進黨前主席施明德發起「百萬人民倒扁運動」,哄動臺灣。
2008年3月22號,執政八年嘅民進黨落臺,喺新一屆大選中由國民黨嘅馬英九、蕭萬長勝出,臺灣民主政治第二次政黨輪替。同時,陳水扁亦因貪污醜聞,閤家大細被捕,昔日被喻為「臺灣之子」,今日瑯璫入獄。
經濟
[編輯]![](http://upload.wikimedia.org/wikipedia/commons/thumb/0/00/101.portrait.altonthompson.jpg/200px-101.portrait.altonthompson.jpg)
臺灣經濟係一個由政府當局主管投資同埋逐漸減少嘅國外投資引導嘅動態資本主義經濟體,政府喺經濟體系內扮演嘅角色逐步縮細。實施市場經濟後,無論投資、消費或儲蓄等都可以自己揀,好多大型嘅國營銀行同企業逐步邁向私有化。過去30年內,平均年均經濟增長達到8%,而出口導向政策賺取嘅外匯為工業化提供資金保證。臺灣嘅外匯儲備係世界第4。根據中華民國行政院主計處嘅統計顯示,臺灣地區人均國民生產總值,由1961年嘅153美元增至2008年嘅18000美元。
臺灣人類發展指數喺世界國家中排名為25名,列為已開發國家。
臺灣有好多世界之最,好似臺北101(TAIPEI 101)(世界第二高建築物,僅次於中東哈利法塔)、高雄港(世界第十二大貨運港)、東帝士85大樓(世界第15高)同臺北市(世界前30國際都市)等。
經濟發展
[編輯]喺日治時期前期,臺灣喺日本經濟嘅地位係糧食生產基地,只有少數食物儲藏加工業同輕工業[44]。太平洋戰爭爆發後,臺灣因戰略地位被日本政府重新定位為南進基地,因此喺臺灣南部嘅高雄一帶發展軍事工業。國民政府遷臺後,將臺灣視為武力反攻大陸嘅基地,奉行軍事優先同穩定農業嘅經濟政策。自1960年代起,臺灣輕工業發展迅速,重工業就位居次要。政府為增加出口換取外匯,重設立加工出口區來增加外貿收入。
到咗蔣經國時代,為擺脫石油危機,政府致力推動十大建設,為臺灣石化業同重工業打下良好基礎,咁啱適逢越戰,美國向臺灣訂購大量物資,呢啲因素都促使臺灣經濟快速起飛。由於經濟發展成功,臺灣晉身亞洲四小龍行列,亦達到新興工業化國家水平。之後政府注意到重工業喺經濟中嘅地位,實行積極嘅產業政策,設立中國鋼鐵、臺灣國際造船同埋臺灣中油等大型國營企業,亦有美國華僑返臺灣設立電子廠,好似臺積電、聯華電子等都取得成功。
1980年代,政府擴建新竹科學工業園區,大力鼓勵內外廠商投資集成電路、電腦等高科技產業,以耗能少、污染低、附加價值高嘅技術密集型科技產業取代傳統產業,民間中小企業亦被電子產業嘅蓬勃發展所影響。臺灣嘅個人電腦主板產量位居世界第一,臺灣成為NIEs國家。並喺1995年2月國科會依行政院決議,設置南部科學工業園區。之後喺2002年由行政院核定成立中部科學工業園區,園區分佈喺臺灣中部嘅臺中縣市同雲林縣三個縣市。
為接續蔣經國「十年經濟建設計劃」,1990年代初期政府提出嘅國家建設六年計畫只維持咗近3年,但亦率先開啟臺灣財政赤字大門。
2000年中華民國總統大選由民主進步黨總統候選人陳水扁、副總統候選人呂秀蓮當選,政黨輪替所造成嘅政經效應導致隔年經濟首次出現1947年以來嘅負增長。另一方面,由於臺灣嘅電子工業多數係ODM,除咗宏碁已成為世界第二大電腦牌子、捷安特已成為世界知名高級單車牌子外,華碩(全球最大個人電腦主機板製造商)、友訊、趨勢科技、微星科技、長榮集團等未來仍有發展空間。中華民國政府至今(2024年)冇完全打開臺灣企業去中國大陸投資嘅限制。此外,民進黨政府提出新十大建設,希望加強基礎設施建設同新產業嘅養成。
經濟結構
[編輯]臺灣係全球第16大經濟體系,早年特色係中小型企業眾多,經濟結構已經由高科技產業取代原先嘅勞工密集工業,而且農業喺GDP中嘅比重由1952年嘅35%下降到2%。至今形成服務業同高科技產業合計比例過半嘅形勢,但亦面臨傳統產業快速外移(特別係中國大陸「磁吸效應」)嘅問題。
臺灣嘅電子工業對世界經濟舉足輕重,大多數電腦電子零部件都係臺灣造。對外貿易係臺灣嘅經濟命脈,日本同美國長久以來一直係臺灣前兩大貿易夥伴,但喺2005年後退居二三名,中國大陸成為臺灣進出口貿易第一大地區,2006年進出口貿易國/地區前十名為:中國大陸、日本、美國、香港、大韓民國、新加坡、德國、馬來西亞、沙地阿拉伯、澳洲。
另有部分轉向歐洲同東南亞市場,臺灣重係泰國、印度尼西亞、菲律賓、馬來西亞同埋越南的主要投資來源,此外,喺中國大陸有5萬幾個臺資企業,長期居留嘅臺商同家眷有30~40萬人。
政治
[編輯]行政
[編輯]臺灣本島係由統治臺灣嘅中華民國政府或中華民國行政院實質管轄,政府體制具有內閣制同總統制混合嘅性質。臺灣現今最高統治者係中華民國總統,任期4年,由中華民國自由地區(臺灣地區)符合資格公民選舉產生,係中華民國國家元首同三軍嘅最高統帥,對內負責政治上嘅最高責任,對外就代表國家行使權責,並對五院有協調爭議權,並且直接任命行政院長[45]。另外亦喺現有區域內實行地方自治,並可以由人民直接選舉產生總統同埋部分公職人員,並自1987年解除戒嚴令以及解除黨禁之後,政府唔限制人民團體成立政黨同埋個人政治主張,因此臺灣政黨林立[46][47]。最大嘅兩個政黨分別係泛藍陣營嘅國民黨,同埋泛綠陣營嘅民進黨。
臺灣省係中華民國省級行政機構,統轄臺灣大部分地區。自1990年代末期,中華民國政府採取省虛級化措施之後,臺灣省雖然依然存在,但原省政府所轄機關都會併入中央政府,因此行政作業實質上已經無省嘅存在。總統府、五院、大多數中央部會等中華民國中央政府機構都喺臺北市。
臺灣人民依憲法享有言論自由而且民主政治運動澎湃,各人可持有唔同政治主張。臺灣廣泛受到爭論嘅政治問題係臺海問題同埋統獨問題,因而令人民支持嘅政治立場大致可劃分為泛藍陣營、泛綠陣營,因為外交情勢及環境綜合考量,人民基本態度為盡量維持現狀為主[48]。
法律
[編輯]臺灣首部成文法喺17世紀嘅荷蘭統治時期實施,後經過以明律為綱嘅鄭氏王朝嚴刑峻罰、臺灣清治時期嘅大清律法、臺灣日治時期嘅六三法等特別法,至中華民國政府開始統治之後就以大陸法嘅中華民國法律為主軸。除了適用於臺澎金馬(即臺灣地區)嘅中華民國憲法同埋中華民國憲法增修條文外,重有法律同命令三個層級,其中,仍以中華民國憲法同佢嘅增修條文為基礎,所有規範都唔可以違背上面位階嘅規定。
曆法同埋節日
[編輯]各機關、官方文書中都採用民國紀元來紀年,通用曆法主要係國際慣用嘅公曆,民間亦通行農曆,並以民國紀年同西元紀年並行使用。
紀念日同節日依據《紀念日及節日實施辦法》並彈性實行「週休二日」。
國際交流
[編輯]中華民國政府同教廷以及聯合國23個會員國保持正式外交關係,以官方名義參與國際組織有18個,並致力於加入亞太經合組織(APEC)、世界貿易組織(WTO)、世界衛生組織(WHO)、聯合國(UN)等相關國際組織同國際接軌,並以援外或者人道救援方式進行國際間交流[49],或以體育、經濟、學術、藝文、國際救援活動參與國際社會[50]。並以非營利機構同志願服務團體等非政府組織(NGOs)融入國際社會。
由於中華民國政府喺1971年退出聯合國,同世界各主要國家政府相繼斷交,再加上俾中華人民共和國政府封殺,相對影響到臺灣嘅國際交流。同一時期,由於臺灣喺經濟發展上漸有成績,因此同國際交流趨向以經濟援助方式同一啲小型發展中國家進行交流,喺李登輝時代政府藉由務實外交強化同友邦以及無邦交國家嘅雙邊關係,民進黨上臺後,仍維持此經濟援助導向。除此,自1993年起,臺北政府一直致力重返聯合國,同時透過喺聯合國擁有會員國嘅外交邦交國,以「中華民國」或「臺灣」等名稱嘗試重返聯合國同佢啲周圍組織,不過因為臺北同北京之間一直存在爭議(即臺灣海峽兩岸問題),北京方面唔同意臺灣以國家身份參與國際組織,令臺灣同國際組織(包括聯合國、世衛)嘅交流極之難。然而,中華民國政府成功喺1991年以中華臺北名義加入亞太經合組織,並喺2002年以臺澎金馬獨立關稅領域名義正式加入世界貿易組織[51]。
2009年4月29號,中華民國政府受世界衛生組織邀請,以觀察員身份參加世界衞生大會(WHA)[52]。
根據2003年國際組織年鑑有2074個非政府組織參與國際性活動,但其中以個人名義居多,而且實際參與嘅組織主要係以人道救援領域居多,例如世界展望會、紅十字會、國際佛光會、臺灣亞洲基金會、喜瑪拉雅基金會、勵馨基金會、知風草文教協會、慈濟基金會等,投入國際性救援個案頗為可觀,例如臺灣路竹會長期遠赴非洲、南美洲義診,伊甸社會福利基金會輸送物資關懷邊遠地區,而臺灣醫界聯盟基金會等組織同政府長期合作推動臺灣參與世界衛生組織,但臺灣非政府組織除咗國際醫療、人道援助組織之外,大多仍然缺乏國際活動嘅經驗[53]。
體育方面有中華奧林匹克委員會而且係國際奧會承認嘅205個國家奧委會之一,主要任務籌組代表團參加奧運、亞運等國際賽會及活動。而喺1957年成立嘅中華民國大專院校體育總會推動大專院校進行國際間賽事,並喺1987年加入國際大學生體育聯盟(FISU)成為會員國。另外重有中華民國殘障體育運動總會積極參與社會活動及國際運動競賽,近年來參與國際賽事有2006年遠東及南太平洋殘疾人運動會,獲得18金29銀22銅;2007年世界輪椅運動會(IWAS),喺臺北舉行獲得34金26銀30銅;2008年北京殘疾人士奧運會,獲得1金1銅。
經濟方面,有中華民國國際經濟合作協會以結合企業界人士、團體同國外企業界人士、團體合作發展國際經濟交流,主要任務係舉辦或出席雙邊及多邊經濟合作會議,舉辦或協辦各國投資研討會或市場說明會,組團或派員出外訪問、簽署雙邊經貿合作協定或備忘錄。而重有臺灣亞太發展基金會(前身係亞洲基金會嘅臺灣分會)致力於促進美國同亞洲各國間嘅交流合作,推動各項發展援助計畫,並幫助亞太地區提昇政府治理同埋公共事務管理能力,推動改善經濟制度,並協助公民社會嘅發展,包括來臺參訪總統大選、來臺參訪九二一震災重建工作、來臺考察休閒農業發展、出國考察國外農業智慧財產權保護機制、去東帝汶考察內亂後重建工作並提供該國建議、推動臺灣印尼伊斯蘭交流互訪等工作。
文藝方面,有喺1995年創立嘅臺灣文化基金會推動臺灣文化同國際交流,主要係進行城市節慶活動交流同埋訪問,並以臺灣文化行銷城市,同時增進臺灣同國際嘅了解同埋交流。
宗教與文化
[編輯]宗教
[編輯]臺灣人民廣泛接納各種宗教信仰,而且政府同宗教之間政教分離,舉凡佛教、道教等宗教信仰都有一定追隨者。以信奉人口計,佛教同道教(包含民間信仰)係臺灣兩大宗教,大部分臺灣漢人同時信佛教同埋道教;原住民部落就普遍信基督宗教。
其他宗教雖然冇咁普遍,但都有唔少信眾,好似基督教、天主教、伊斯蘭教、一貫道。此外,新興宗教、氣功法門等廣義嘅宗教信仰,喺臺灣亦各有唔少信徒,成日有相當活躍嘅傳教活動。
臺灣民間信仰普遍拜祭媽祖、土地公、關公、城隍、孔子等神祇。如今,佛教、道教、儒教等宗教喺臺灣嘅區分已經非常曖昧,佢哋相互影響融合成為另一種多神教,喺寺廟入面,各種唔同宗教嘅神靈被共同祭祀係好常見;例如艋舺龍山寺主祀佛教觀音菩薩,亦兼祀道教嘅媽祖、關帝君、文昌君等。呢種融合佛道嘅民間宗教對社會生活影響相當大,而各地亦有各自盛行嘅神明祭典。
本土文化
[編輯]以河洛人為代表嘅河洛文化、客家人代表嘅客家文化同埋外省人帶來嘅新文化喺臺灣島上共處融合。同時,重有原住民所代表嘅南島文化[54]。除此之外,由於臺灣日治時期長達50年(1895年—1945年),加上歐美對臺灣嘅深刻影響,臺灣文化亦融合咗日本、歐美等地嘅文化特色。
![](http://upload.wikimedia.org/wikipedia/commons/thumb/b/b1/Starting.jpg/200px-Starting.jpg)
以傳統嘅農曆作為基礎嘅春節、端午節、中秋節等喺臺灣屬於國定紀念假日。亦有唔少深具臺灣特色嘅民俗慶典,好似每年一度嘅迎媽祖、元宵節著名嘅地方民俗活動苗栗火旁龍、鹽水蜂炮、王爺遶境儀式嘅東港燒王船、中元普渡時嘅頭城搶孤、三峽祖師廟神豬比賽等等。由於臺灣廟宇香火鼎盛,因此由大陸流傳而來嘅廟宇文化喺臺灣發揚光大,臺灣嘅城隍,媽祖,關帝君等祭典活動成為臺灣特殊文化,神祇陣頭結合武學同藝術嘅八家將、宋江陣、舞龍舞獅民俗表演變成臺灣特殊技藝文化,著名有明華園、霹靂布袋戲、九天民俗技藝團等,其中有啲表演團體已邁向國際舞臺[55]。喺神祇誕辰就不時出歌仔戲、布袋戲、戶外電影等,但近期有被電子花車或康樂隊取代趨勢。
傳統民眾幾盛行採信農民曆,並依所載吉辰良時作為房屋落成、新店開張,或婚喪喜慶等日常活動嘅準則,亦會依照生肖沖卦作為婚姻參考。由於民間盛行安太歲習俗,不少民眾喺過年期間會依農民曆所載沖犯太歲嘅生肖而到寺廟請求安太歲並安置光明燈,再由寺廟代為舉行祭祀活動,以趨吉避凶[56]。
原住民文化各族各有其特色,布農族文化為射耳祭(以箭射獸耳禱求獵穫豐收)同小米祭、皮衣製作技巧、多音部合唱;鄒族就係戰祭、收穫祭與揉皮技術;賽夏族每兩年舉辦一次矮靈祭;達悟族嘅飛魚祭;排灣族人嘅五年祭;魯凱族嘅陶壺及琉璃珠製作、雕刻藝術;卑南族就係海祭、男性嘅猴祭及女性嘅鋤草祭;阿美族嘅無半音五聲音階等等。
- 外來影響
臺灣除咗受到中華文化及南島文化影響之外,以日本文化對臺灣影響最大,從日治時期受到日本嘅溫泉、日本酒、雜燴、和室等影響,到家下卡拉OK、電視劇、漫畫、動畫、電視遊戲、Cosplay等,目前臺灣有兩個電視頻道專門播日本節目,影響可謂深遠。好多後生鍾意日本偶像明星、蒐集日本流行資訊,呢啲鍾意日本文化嘅青年人稱為哈日族[57]。依據2009年統計,有大概四成臺灣人對日本有好感[58]。
西方文化對臺灣影響都唔細。一方面係由於天主教與基督新教,喺臺灣地方文化中扮演默默紮根角色,好似改編臺語詩歌,偏遠地區地方教堂嘅貢獻等。此外,歐美教育喺臺灣教育界往往被引為典範,近年來臺灣教育改革就係基於歐美教育嘅精神而制定,臺灣嘅森林小學以及小留學生文化亦係深受歐美影響[59]。
臺灣意象
[編輯]中華民國行政院新聞局喺2006年年初舉辦「尋找臺灣意象」系列活動,係作為定位「臺灣國家」品牌嘅一個起點,希望透過全民參與凝聚共識,發掘臺灣好多美好而獨特嘅風貌。由民眾同網友以手機投票同埋網上投票選出足以代表臺灣嘅「臺灣意象」24名[60],共有529,676票。再以五大意象為主題舉辦臺灣意象徵圖活動[61]向民眾徵圖。
依票選名次分別係布袋戲、玉山、臺北101、臺灣美食、臺灣鮭魚、臺灣島嶼圖、阿里山、花蓮太魯閣、原住民圖騰、雲門舞集、總統府、日月潭、客家桐花、歌仔戲、廟會、野百合、高雄市愛河、蝴蝶蘭、晶圓、圓山飯店、鳳尾蝴蝶、臺灣獼猴、24小時嘅生活、元宵花燈。
民眾自行推薦嘅意象頭五名係卡拉OK、小綠人、慈濟、臺灣人嘅精神、淡水。
語言同埋文字
[編輯]臺灣寫楷書字,國語(華語)係共通語言,亦通行閩南話(臺灣人叫做臺語)同客家話;而臺灣又分幾種口音。外語之中,英文同日文最多人學,當地話亦吸收唔少英、日文嘅元素。臺灣原住民亦有唔同語言(南島語系)。
國語雖然係普通話嘅前身,但兩岸分治後,兩者有啲啲唔同。臺灣五湖四海嘅移民融合下,捲舌音、兒化韻逐漸消失,情況同港式廣東話開始唔分N、L音;GW、G音不分差唔多。聲調同樣唔一致,例如亞洲嘅「亞」字,臺灣讀第三聲,大陸讀第四聲;另一個顯著例子「垃圾」,大陸讀lājī,臺灣讀lèsè(勒涩)。臺灣國語亦結合一啲俚語好似「槓龜」(輸賭)、「夯」(流行)同「歐吉桑」(男長輩)、黑輪(關東煮)。有時同一件嘢,意思更唔相同,例如土豆,臺灣解花生,大陸解薯仔;而臺灣叫薯仔做「馬鈴薯」。
雖然差異係有啲,但大部分情況下,兩岸嘅人都傾到偈,好少話溝通唔到。
教育同埋文藝
[編輯]臺灣現行學制係國民小學6年制、國民中學3年制嘅義務教育,高級中學3年制(包括高級職業學校)、普通大學4年制,而師範、法律(得東吳大學係,其餘大學重係四年制)、部份大學建築系所、獸醫學系係5年制,牙醫系係6年制,醫學系係7年制。技職教育體制有五年制專科學校(五專)、兩年制專科學校(二專)、兩年制技術校院(二技)同埋四年制科技大學及技術學院(四技),大學可設置研究所,培育碩士及博士等研究人才。臺灣最出名大學係國立臺灣大學,以及包括:國立成功大學、國立中央大學、國立政治大學、國立清華大學、國立交通大學、國立臺灣師範大學、國立臺灣科技大學等亦係臺灣著名高等學府。
高級中等教育方面,可分為強調綜合理論同埋道德素養教育嘅高級中學同埋以技職教育、職場專業培養為方針嘅高級職業學校(都係三年制)[62]。
另在非正式教育機構重有2─6歲學前機構幼稚園,訓練學生加強某特定科目嘅補習班,家庭教育亦係教育嘅重要一環。社會教育方面,臺灣終身教育風氣盛行,各地都有專為成人教育設計嘅學院機構。技術教育方面,臺灣有隸屬行政院勞委會嘅職業訓練中心同埋民間各類語言或電腦等學習機構。由於網絡發達,因此唔少機構及坊間開辦網上教育,以建立網上學習環境,激發學習動機,進而帶動網上學習[63]。
藝術
[編輯]中華民國政府遷臺初期,大力推行「去日本化」,強力推行國語教育。戒嚴時期,政府以官方力量推動文化發展,推動中華文化復興運動,文化呈現反共、傳統、一元嘅特質。1987年,臺灣解嚴後,多元文化思想受國內外好多因素推波助瀾下逐漸興起。1996年,開始出現本土化或去中國化浪潮[64]。
臺灣地區目前有三間著名嘅藝術大學,分別係臺北藝術大學(關渡)、臺灣藝術大學(板橋)、臺南藝術大學。
音樂
[編輯]戰後初期,臺語歌曲一度流行,音樂界亦創作咗大量反共愛國歌曲。喺民間,由香港傳入嘅國語流行歌曲同埋美國音樂風行一時。1970年代,知識青年疾呼「唱自己的歌」,校園民歌因此風行。1970年代以後受日本演歌文化影響,那卡西同夜總會等騷場文化喺臺灣亦非常盛行,好似臺語歌后江蕙同黃乙玲等人就係出身騷場嘅代表人物。1980年代講究「字正腔圓」嘅國語老歌風行一時,代表人物係有亞洲歌后之稱嘅鄧麗君。受到西方搖滾樂嘅影響,喺民歌時期結束後,羅大佑等人將社會百態、政府等當時受到壓榨嘅百姓生活寫成歌曲,造成知識份子一時引起嘅共鳴。近幾年臺灣已經成為世界華語樂壇嘅中心,流行音樂界名人包括劉家昌、劉文正、費玉清、林志炫、許景淳、鳳飛飛、蔡琴、潘越雲、王傑、張雨生、伍佰、張惠妹、李宗盛、黃韻玲、周杰倫、蔡依林、蕭亞軒、五月天、S.H.E、羅志祥、陶喆、王力宏等歌手紅遍兩岸三地同新馬地區,成為華語樂壇嘅重要力量,因此吸引唔少來自亞洲各地嘅新秀去臺灣大放異彩,例如李玟、梁靜茹、光良、品冠、孫燕姿、蔡健雅、戴佩妮、林俊傑、曹格等人。古典音樂界名人包括張正傑(創意天王大提琴家)、范宇文(台灣第一美聲聲樂家)、朱苔麗(旅義名聲樂教育家)、馬水龍(國際知名作曲家)、朱宗慶、林昭亮(國際知名小提琴家)、曾宇謙(國際性青年小提琴家)、陳必先(鋼琴家)、葉麗娜(鋼琴家)、蘇顯達(小提琴家)、范姜毅(留德鋼琴教育家)、李哲藝(跨界創意編曲家豎琴家)、顏慈瑩(音樂仙子、鋼琴詩曲作家維若妮卡)、趙琴(廣播音樂作家)、陳冠宇(跨界鋼琴家)、林錦如(知名聲樂家)、谿客(美聲音樂詩人賴婷玲)、郭芝苑(作曲家)、呂超倫(大提琴家)、蕭泰然(作曲家)、林伯杰(音樂雜誌總編樂評人)、彭廣林(小提琴家、台北愛樂電台製作主持人)、陳雲紅(指揮家、合唱藝術推廣)、車炎江(男中音、樂評人、音樂學者)、石青如(作曲家)、賴英里(長笛跨界演奏家)。
文學
[編輯]中華民國政府遷臺初期,政府大力推行反共、懷鄉文學,著名反共文學作家有王藍(代表作《藍與黑》)、姜貴(代表作《旋風》)同埋司馬中原(代表作《狂風沙》)。同時,西方現代文學亦係當時臺灣文壇嘅重要力量,代表有白先勇、王文興,而現代主義文學代表作就有《臺北人》、《家變》等。1960中後期開始,一啲本土作家以《臺灣文藝》、《笠詩刊》為陣地,重拾鄉土素材,關注農民同埋勞工等低層階級嘅命運,作品隱含批判精神,終於喺1977年(民國六十六年)引發鄉土文學論戰。解嚴後,文學更加多元化。近幾年,伴隨網絡興起,網上文學成為新嘅風潮。
名人包括余光中、洛夫、席慕蓉、向陽、龍應台、鄭愁予、張曉風、劉墉、白先勇、簡媜、張曼娟、吳若權、蔣勳。
美術、戲劇同舞蹈
[編輯]臺灣美術喺1950年代,畫壇主流以大陸來臺嘅水墨畫家同埋日治時期嘅本土西畫家為主,繪畫技巧比較傳統。1960年代開始,新生代畫家引入西方抽象畫等風格,美術風格走向西化。1970年代鄉土意識抬頭後,繪畫題材再趨本土化。解嚴之後,美術界生態多元自由,風格亦日益前衛。
戲劇方面喺二戰之後,由於早期政府嘅大力推廣下,京劇等大陸劇種喺臺灣得到大力扶持;另一方面歌仔戲、布袋戲等本土劇種仍然係庶民大眾嘅重要娛樂方式。隨住電視嘅出現,布袋戲、歌仔戲開始講求聲光效果,而重新受到重視。而國劇同國語話劇就融入創新元素,經常以小劇場等形式表演,舞臺劇表演成為臺灣極具活力嘅藝術活動。
臺灣舞蹈方面,除咗充分表現臺灣文化意味嘅民俗舞蹈(好似八家將、新港舞步、陣頭),臺灣現代舞亦有小規模發展,尤其雲門舞集。
名人包括林懷民(舞蹈家)、魏海敏(京劇表演藝術家)、董陽孜(書法家)、梁丹丰(畫家)、吳兆南(相聲表演藝術)、賴聲川(舞台劇表演藝術)、樊光耀(相聲戲劇表演藝術)、廖瓊枝(戲劇歌仔戲)。
電影
[編輯]中華民國政府遷臺後,臺灣電影喺官營製片廠嘅經營下,拍攝大量國語劇情片,其中唔少都帶有反共色彩。同時,臺語片亦靜靜興起,題材以民間故事等為主。1960年代,健康寫實電影成為電影界嘅主流,代表作有《蚵女》、《養鴨人家》等。同時,香港製作嘅電影亦喺臺灣廣受歡迎,亦影響到臺灣本地嘅電影制作路線,文藝片、武俠片同埋功夫片成為一時主流,文藝片代表作有《彩雲飛》、《一簾幽夢》等。
1970年代,伴隨住外交困境,中影整咗大量愛國政宣影片,好似《英烈千秋》、《梅花》、《黃埔軍魂》等。1980年代起,《兒子的大玩偶》等影片開始咗「新電影」風潮。解嚴之後,後新浪潮電影興起,李安同蔡明亮成為呢個時期嘅代表導演。同時,伴隨住美國荷李活等洋片大舉進入,國片嘅環境同埋市場日益萎縮低迷。2008年,《海角七號》創下超過五億新臺幣嘅空前票房並贏得第45屆金馬獎六個獎,並帶動《囧男孩》、《九降風》、《一八九五》等臺灣自製電影票房,可以話係說為長期低迷嘅國片注入一支強心針。
媒體
[編輯]1962年,臺灣第一間電視臺臺灣電視公司成立。冇耐中國電視公司同埋中華電視公司陸續開播,臺灣電視業進入老三臺時代。但當時三臺都由政府機構同埋國民黨掌控,喺娛樂大眾嘅同時亦扮演政府嘅宣導工具。1969年,中視播出《晶晶》,係臺灣第一部電視劇。報禁喺民國七十七年(1988年)1月1號正式解除後,臺灣嘅新聞、廣播電視傳播媒體順勢蓬勃發展,令媒體自由化,民眾將媒體視為生活嘅一部份,絕大部份資訊更係由傳播工作者嘅傳達因而得知。同時楊麗花、葉青歌仔戲同布袋戲亦紛紛登上螢幕,傳統藝術唔再淨係以固有形式進行表演。1993年,政府開放成立有線電視臺,隨後喺1998年又開放首間民間經營嘅無線電視臺民視。而為普及多元文化同埋尊重弱勢群體,又陸續開播公視、客家電視臺同埋原住民電視臺。喺解嚴之前,臺灣影響最大嘅兩份報紙係《聯合報》同《中國時報》,1980年代後,《自由時報》興起,成為第三大報。近年,《蘋果日報》快速發展,報業格局再演變為四大報。廣播事業亦有發展,除咗傳統嘅中廣等之外,飛碟電臺、KissRadio等亦成為重要嘅廣播電臺。網絡快速興起,網絡文化亦成為臺灣文化嘅重要組成部分。
名人包括趙少康、李艷秋、盧秀芳、李四端、張雅琴、楚雲、秦夢眾、謝志偉、沈春華、胡婉玲。
交通
[編輯]鐵路
[編輯]![](http://upload.wikimedia.org/wikipedia/commons/thumb/0/00/Taiwan-HighSpeedRail-700T-testrun-2006-0624.jpg/200px-Taiwan-HighSpeedRail-700T-testrun-2006-0624.jpg)
臺灣早期嘅鐵路運輸,係以人力為動力嘅軌道輕便臺車,路線綿延全臺;目前臺灣主要鐵路經營管理係由國營企業臺灣鐵路管理局負責營運。臺鐵路線主要包括西部幹線、北迴鐵路、南迴鐵路、東部幹線。合計環島一周。主要列車型號包括負責長途客運嘅自強號、莒光號、復興號,以及負責城際通勤運輸嘅區間車等。
![](http://upload.wikimedia.org/wikipedia/commons/thumb/0/04/Taipei_station02.jpg/200px-Taipei_station02.jpg)
喺臺北都會區,捷運係主要嘅鐵路運輸。第一條捷運係1996年3月28號開嘅木柵線,至今已經形成雙十字路網。高雄捷運紅線喺2008年3月9號通車,高雄捷運橘線就喺2008年9月21號正式通車營運。
2007年2月1號,臺北至高雄嘅臺灣高鐵開始營運,係個規模龐大嘅民間興建營運後轉移模式(BOT)建設案。車體技術採用日本嘅新幹線系統,但軌道就用部分嘅歐洲系統,係日本新幹線系統第一次將技術輸出海外,亦係首次喺非日本區域商業營運。從全程只需90-120分鐘,形成臺灣西部南北一日生活圈。高鐵嘅出現強烈衝擊臺灣國內線航空業嘅經營。
喺臺灣糖業,林業同礦業嘅繁盛期,重有專門鐵路進行運輸。糖業鐵路喺1980年代後,因公路運輸興盛,大部分都已經停止營運。而林業鐵路重有阿里山森林鐵路,太平山森林鐵路以及烏來嘅臺車繼續運作。煤礦鐵路絕大多數因礦場荒廢而消失於荒野之中,部分因為起道路而消失,目前仍然繼續運作嘅煤礦鐵路係位於臺北縣平溪鄉嘅臺灣煤礦博物館。另外位於臺北縣金瓜石礦山喺採金時期亦有好多金礦鐵道,但1950年代後,由於採金成本日益提高,再加上礦脈枯竭,因此隨住礦坑關閉,金礦鐵道亦成為歷史,目前僅餘仍然運作嘅金礦鐵道係臺陽合金公司所屬嘅九號、十號坑金礦鐵道。
公路
[編輯]臺灣有縱貫西部走廊嘅中山高速公路、福爾摩沙高速公路,以及橫跨東、西部嘅蔣渭水高速公路等三條南北高速公路。而省道更遍佈全島,好多客運公司專門經營臺灣各大都市間嘅公路客運運輸,過去呢項工作係由公營嘅臺灣汽車客運公司負責。
至於長途運輸方面,1990年代開始,民營業者開始以低票價及豪華設備服務為號召,大量搶佔原本由臺汽一家獨佔嘅市場地位。為提升競爭力,2001年後,臺汽民營化,並改名國光汽車客運。目前臺灣嘅長途公路運輸以國光客運同埋統聯客運為市場龍頭。
空運
[編輯]臺灣有桃園國際機場、高雄國際機場兩個主要國際機場同埋臺北松山機場、臺中清泉崗機場兩個次要國際機場,多數大城同多數離島地區亦設有機場。臺灣本島嘅各大都市間、以及和各離島之間,都有常態班機往來,形成便利嘅航空網。臺灣最主要嘅航空公司係中華航空公司同埋長榮航空公司。除此之外,重有復興、立榮、華信、德安等航空公司。
海運
[編輯]![](http://upload.wikimedia.org/wikipedia/commons/thumb/c/c7/Superstar_Libra_at_Port_of_Keelung_20070712.jpg/200px-Superstar_Libra_at_Port_of_Keelung_20070712.jpg)
臺灣主要國際港口有高雄港、基隆港、臺中港、花蓮港同埋蘇澳港。另外重有1990年代開闢嘅臺北港、歷史悠久嘅安平港同2010年代嘅新竹港。高雄港係其中最大嘅港口,負責臺灣60%以上嘅貨物裝卸同埋75%以上嘅貨櫃裝卸[65]。
目前喺臺灣本島同澎湖、金門等離島之間,船依然係主要嘅交通工具。臺灣到澎湖列島之間嘅船有臺華輪(高雄港)、今日之星(臺南安平港)、滿天星客輪(嘉義縣布袋港)。每日都有航班。臺東富崗港到蘭嶼同埋綠島之間都有航班。臺灣本島到金門之間嘅航班係由高雄港出發嘅金門快輪。臺灣本島到馬祖之間,就有從基隆港出發嘅臺馬輪同埋合富快輪。另外可以喺金門直接搭船去中國廈門。
運動
[編輯]![](http://upload.wikimedia.org/wikipedia/commons/thumb/6/69/Taipei_Arena_outside_20051210_night.jpg/200px-Taipei_Arena_outside_20051210_night.jpg)
由於中華人民共和國喺國際場合上不斷施壓,至今中華民國政府多以「中華臺北」(Chinese Taipei)名義參加國際體育競賽,目前臺灣實力較具國際水準嘅項目包括棒球、壘球、跆拳道、撞球、乒乓波、羽毛球、網球、軟式網球、射箭、射擊等。2004年雅典奧運靠跆拳道選手陳詩欣、朱木炎奪得奧林匹克運動會參賽史上首兩面金牌。2006年成棒隊喺多哈亞運奪得第一面亞運金牌。2009年喺高雄市舉辦嘅世界運動會係臺灣首次主辦嘅國際性綜合運動會。(睇中華臺北國際大型運動會獎牌一覽)
棒球
[編輯]棒球可以話係臺灣最受歡迎運動,早喺日治時期就由日本引入臺灣。1968年臺東縣紅葉少棒隊擊敗到訪嘅日本少棒明星隊,隔年金龍少棒隊更奪得世界少棒大賽冠軍,開始臺灣三級棒球嘅黃金時代[66]。1990年,中華職棒正式成立,臺灣成為繼日本、韓國之後亞洲第三個擁有職業棒球聯盟嘅國家。之後一度因爆發簽賭打假波事件及臺灣大聯盟嘅成立,導致觀眾人數銳減,但喺2001年主辦世界盃棒球賽並奪得第三名後,臺灣棒球熱潮再現。經過幾年棒球熱潮後,中華職棒票房喺2006年球季呈現大幅衰退,一般認為同王建民掀起臺灣球迷收睇大聯盟嘅熱潮,進而體認到臺灣職棒競技水準同國外嘅差距,加上認為中華職棒對自身問題(好似成立二軍、球員待遇、安全防護機制等)唔可以反求諸己所致。而喺2008年,又爆發黑道介入中華職棒嘅簽賭案(黑米事件),導致米迪亞暴龍隊解散,加上中信鯨解散,2009年中華職棒嘅球季得番象獅牛熊四隊。
早喺日治時期就已經有臺灣棒球好手去日本打波,綽號「人間機關車」嘅吳昌征能投善打,喺1995年進入野球殿堂。1980至90年代,三位投手郭源治、郭泰源同莊勝雄因為喺日本職棒嘅優異表現,被合稱為「二郭一莊」;之後有呂明賜、郭李建夫、陳偉殷等球員陸續去日本打波。近年來就有好多球員去美國打拚,目前已有陳金鋒、曹錦輝、王建民、郭泓志、胡金龍同倪福德等人曾經登上美國職棒大聯盟舞臺。
註同埋參考
[編輯]- ↑ 〈臺灣客家話常用辭典,詞目:臺灣話、臺語〉。中華民國教育部國語推行委員會。原著喺2010-09-01歸檔。喺2009-09-10搵到。
凡流通於臺灣的客家語、原住民語、國語、閩南語或其他民族等的語言皆可稱為臺灣話
- ↑ 〈中華民國內政部統計資訊服務網〉。原著喺2008年3月28號歸檔。喺2010年8月11號搵到。
- ↑ 中國評論新聞網2010-02-10報導:高雄港首度輸天津 全球排名掉到13 互聯網檔案館嘅歸檔,歸檔日期2011年7月25號,.
- ↑ 英文維基頁-List of countries and dependencies by population density
- ↑ 法定曆法為公曆,唔用公元紀年,另設民國紀年。而農曆就係一般民間用。
- ↑ 寶島 - 教育部《重編國語辭典修訂本》2021
- ↑ 〈臺灣的水資源〉。原著喺2011年5月29號歸檔。喺2010年8月11號搵到。
- ↑ 〈臺灣客家話常用辭典,詞目:臺灣話、臺語〉。中華民國教育部國語推行委員會。原著喺2010-09-01歸檔。喺2009-09-10搵到。
凡流通於臺灣的客家語、原住民語、國語、閩南語或其他民族等的語言皆可稱為臺灣話
- ↑ 台灣的語言
- ↑ 經濟部技術處台灣產業發展願景與策略 互聯網檔案館嘅歸檔,歸檔日期2011年9月26號,.
- ↑ 〈學習加油站—臺灣名稱的由來〉。原著喺2011年6月9號歸檔。喺2010年8月11號搵到。
- ↑ 〈民視,臺灣筆記〉。原著喺2011年11月11號歸檔。喺2010年8月11號搵到。
- ↑ 維基文庫 連橫 臺灣通史 卷一 開闢紀
- ↑ 網路追追追/哪裡有「美麗」?Formosa的真相? 互聯網檔案館嘅歸檔,歸檔日期2008年12月6號,.與Formosa
- ↑ 從中時電子報 互聯網檔案館嘅歸檔,歸檔日期2007年1月27號,.同自由時報電子報等媒體可見,大多用台灣
- ↑ 行政院新聞局官方網站 互聯網檔案館嘅歸檔,歸檔日期2010年9月3號,.等大多用臺灣,亦見於各機關公文或查看身份證,但喺外交部官方網站 互聯網檔案館嘅歸檔,歸檔日期2007年9月8號,.同中華民國總統府 互聯網檔案館嘅歸檔,歸檔日期2004年2月7號,.就用台灣。
- ↑ 〈國立台灣師範大學環境教育研究所:台灣島嶼資料庫〉。原著喺2007年12月9號歸檔。喺2010年8月11號搵到。
- ↑ 睇嘎咾吧灣盆地或高原盆地
- ↑ 行政院農業委員會——台灣林相
- ↑ 〈原住民人口數統計資料〉。原著喺2007年9月27號歸檔。喺2010年8月11號搵到。
- ↑ 文建會文化白皮書第二篇第一章第七節—與世界遺產接軌 互聯網檔案館嘅歸檔,歸檔日期2006年5月24號,.,行政院文化建設委員會,2004年。
- ↑ 〈2010年國際文化資產日研討會〉。原著喺2012年8月2號歸檔。喺2010年8月11號搵到。
- ↑ 劉益昌(1996)
- ↑ 〈臺灣原住民介紹〉。原著喺2007年6月25號歸檔。喺2010年8月11號搵到。
- ↑ 連橫,《台灣通史》,卷二九列傳一
- ↑ 根據黃宗羲《賜姓始末》記載,「崇禎間,熊文燦撫閩,值大早,民飢,上下無策;文燦向芝龍謀之。芝龍曰:『公第聽某所為?』文燦曰:『諾』。乃招飢民數萬人,人給銀三兩,三人給牛一頭,用海舶載至台灣,令其開墾荒土為田。」然而學者方豪認為,「假定『數萬』饑民為三萬,需銀九萬兩;三人一牛,則須牛一萬頭,在大旱之後,地方無法籌此巨款,運輸亦感困難,大饑之時,飼料亦成問題。或許鄭芝龍有此建議,熊文燦亦深表贊成,而實際則僅運出一部份饑民而已。」見方豪,民八十三年,《臺灣早期史綱》,頁152-153。台北:台灣學生書局。
- ↑ Tonio Andrade原著,鄭維中譯,《福爾摩沙如何變成臺灣府》,頁225-226。
- ↑ 程紹綱譯註,《荷蘭人在福爾摩莎》,經聯出版,2000年,第80頁:「控制中國沿海,將我們在大員和中國沿海的人之間的聯繫切斷,我們的人如同被圍困在城堡中一樣。」
- ↑ 西班牙人殖民北台灣(1626~1642)
- ↑ 國立編譯館 1997,30;李筱峰 1995,157
- ↑ 鄭氏王朝的滅亡
- ↑ 〈漢人移墾台灣〉。原著喺2003年10月30號歸檔。喺2010年8月11號搵到。
- ↑ 牡丹社事件,1871-74
- ↑ http://www.taiwanus.net/history/3/80.htm 法軍侵臺
- ↑ 1887年成立臺灣省
- ↑ (劉銘傳與台灣的近代化),黃富三,《台灣史論叢》第一輯
- ↑ 《台灣通史》,連橫,眾文圖書公司,1994年。
- ↑ 《解讀二二八》,李筱峰,玉山社,1994年。
- ↑ 賴建國,1997,台灣主體意識發展與對兩岸關係之影響
- ↑ 〈戰地印記-八二三砲戰〉。原著喺2007年6月14號歸檔。喺2010年8月11號搵到。
- ↑ 〈中華民國退出聯合國的真相〉。原著喺2009年9月18號歸檔。喺2010年8月11號搵到。
- ↑ 《海外台獨運動四十年》,陳銘城,自立出版社,1992年11月
- ↑ 〈睇「臺灣省政府功能業務與組織調整暫行條例」〉。原著喺2013年5月19號歸檔。喺2010年8月11號搵到。
- ↑ 《台灣省通志—經濟志工業篇》,李汝和主修。1971年,台灣省文獻委員會
- ↑ 台灣智庫,中央政府體制的運作與難題:從比較研究的觀點分析[失咗效嘅鏈]
- ↑ 〈內政部民政司政治團體名冊〉。原著喺2007年8月16號歸檔。喺2010年8月11號搵到。
- ↑ 謝佳珍 (2009年5月16日)。〈人民團體4萬2348個 社會團體快速增加〉。中央通訊社。喺2009年5月19日搵到。
- ↑ 中華民國大陸委員會,2006年度台灣人民對統獨議題的看法[失咗效嘅鏈]
- ↑ 中華民國外交部 友邦提案參與案中文暫譯版(2006) 互聯網檔案館嘅歸檔,歸檔日期2011年6月8號,. 中華民國外交部 互聯網檔案館嘅歸檔,歸檔日期2010年7月29號,.
- ↑ 外交部NGO國際事務委員會 互聯網檔案館嘅歸檔,歸檔日期2009年5月3號,.與台灣志願服務國際交流協會 互聯網檔案館嘅歸檔,歸檔日期2010年4月16號,.
- ↑ 〈台灣WTO中心〉。原著喺2012年6月6號歸檔。喺2010年8月11號搵到。
- ↑ 沈澤瑋 (2009-04-30)。〈台湾首次正式受邀參加世界衞生大會〉。聯合早報網。喺2009-04-30搵到。
- ↑ 台灣非政府組織的現況分析
- ↑ 《臺灣土著文化藝術》,劉其偉,雄獅圖書股份有限公司
- ↑ 臺灣傳統戲劇表演團體一覽
- ↑ 〈農民曆與春牛圖〉。原著喺2009年3月3號歸檔。喺2010年8月11號搵到。
- ↑ 謝菁玉,《台灣的哈日與日語藉詞:社會面觀和詞彙影響》
- ↑ 日調查4成台灣人親日 互聯網檔案館嘅歸檔,歸檔日期2009年4月25號,.-聯合新聞網2009.4.22
- ↑ 〈台灣教改制度西化,高教學子獨立突破文憑迷思〉。原著喺2008年12月12號歸檔。喺2010年8月11號搵到。
- ↑ 〈存档副本〉。原著喺2017年1月22號歸檔。喺2010年8月11號搵到。
- ↑ 〈存档副本〉。原著喺2008年4月18號歸檔。喺2010年8月11號搵到。
- ↑ 孫仲山,《台灣技職教育發展及其社會經濟背景分析》
- ↑ 〈經濟部中小企業「中小企業網路學習計畫」〉。原著喺2007年10月26號歸檔。喺2010年8月11號搵到。
- ↑ 聯合報,1996年4月23日,《學者觀點》
- ↑ [Ettday:高市/16號碼頭新建流行音樂中心 高雄港工會反對釋出]
- ↑ 謝仕淵、謝佳芬,《台灣棒球一百年》,果實,2003年8月。