釘十字架

  呢篇文講古代死刑。想搵其他意義嘅話，請睇十字架。

釘十字架（英文：Crucifixion）係一種古代死刑方式，將犯人監生釘上木柱，或者係一個十字嘅架上面暴曬，一直到變乾為止。

最出名以釘十字架去判人死刑，可以算係古羅馬同嗰頭地中海嘅地方，例如波斯。而喺公元前337年之前嘅古羅馬重係最多用釘十字架處決犯人嘅地方，古羅馬政府釘人上十字架嘅目的，係為咗要阻嚇啲人唔好做一啲威脅古羅馬政府嘅事，例如斯巴達克起義呢單奴隸革命入面，古羅馬政府就一口氣將起義嘅六千人釘晒上十字架，然後放喺羅馬大道兩邊示眾。

另一個出名嘅例子，就係基督教本新約聖經講，耶穌被釘十字架嘅故事，根據新約聖經嘅福音書講，耶穌畀人送去到羅馬帝國駐猶太總督彼拉多受審，之後判咗釘十字架，而且喺死咗之後第三日復活。因為咁樣，基督教教堂普遍將十字架放響教堂最頂，作為基督教嘅標誌。

正式嘅釘十字架

釘木柱

正式釘十字架唔一定係釘十字，佢嘅古拉丁文係「CRUX」，意思係指木棍或者係木頭，不過喺新約聖經入面嘅希臘文，就寫咗做「ΣΤΑΥΡΌΣ」同埋「ΞΎΛΟΝ」，再譯咗做英文之後，就變咗「CROSS」，即係十字，但實際上呢種死刑唔單單止釘十字架，重有釘木柱或者釘 X 字架或者 Y 字架。