Muldersvlei

Muldersvlei is 'n plaasgebied in die Boland wat bekend is om sy wynplase.

Ligging

Die streek lê rondom die koördinate 33° 51′ suid en 18° 48′ oos, en is ‘n 14 km van Stellenbosch, noordwes van Elsenburg, oos van Koelenhof, en word ongeveer begrens deur die Ou Paarlpad (R101), die Koelenhofpad (R304) en die Adam Tas-pad (R44). ‘n Takspoorlyn draai van die hooflyn van Kaapstad na die noorde hier by die Muldersvlei-spoorweghalte weg na Stellenbosch.

Bekende plase

Hoopenburg, De Meye, Westbridge, Eaglevlei en Muldersvlei is die bekendste wingerdplase. Langs die N1-nasionale pad is Eskom se Muldersvlei-substasie.

Geskiedenis

In 1714 is die plaas van ±50 ha toegeken aan Johannes (Jan) Mulder, die eerste landdros van Stellenbosch. Jan P. Giebeler was in 1742 die eienaar en hy was getroud met Anna M. Hop. Die plaas was toe bekend as Hoppenburg. Na Giebeler se dood trou sy met Martin Melck, en na laasgenoemde se dood in 1781 is sy skoonseun Jan David Beyer (sic) die eienaar. Op die oorspronklike plaas is twee ou huise. Jan se seun, C.F. Beyers (sic), bou die een in waarskynlik 1817, die ander huis dateer uit 1820. Die spoorlyn van Bellville na Muldersvlei is in 1876 in gebruik geneem.

Bibliografie

Fransen, Hans: A guide to the old buildings of the Cape. A survey of extant architecture from before c1910 in the area of Cape Town, Calvinia, Colesberg, Uitenhage. Kaapstad: Jonathan Ball, 2004. ISBN 1-86842-191-0