Eiffeltoring
![](http://upload.wikimedia.org/wikipedia/commons/thumb/c/ce/Gustave_Eiffel.jpg/200px-Gustave_Eiffel.jpg)
![](http://upload.wikimedia.org/wikipedia/commons/thumb/7/79/Paris_06_Eiffelturm_4828.jpg/220px-Paris_06_Eiffelturm_4828.jpg)
![](http://upload.wikimedia.org/wikipedia/commons/thumb/b/bd/Sous_la_Tour_Eiffel_1.jpg/220px-Sous_la_Tour_Eiffel_1.jpg)
![](http://upload.wikimedia.org/wikipedia/commons/thumb/b/b0/Tour_Eiffel_-_20150801_15h30_%2810621%29.jpg/220px-Tour_Eiffel_-_20150801_15h30_%2810621%29.jpg)
![](http://upload.wikimedia.org/wikipedia/commons/thumb/5/59/Tourists_looking_at_Paris_from_the_Eiffel_Tower_%2834861306904%29.jpg/220px-Tourists_looking_at_Paris_from_the_Eiffel_Tower_%2834861306904%29.jpg)
![](http://upload.wikimedia.org/wikipedia/commons/thumb/0/0f/Second_floor_of_the_Eiffel_Tower_%2835506027651%29.jpg/220px-Second_floor_of_the_Eiffel_Tower_%2835506027651%29.jpg)
![](http://upload.wikimedia.org/wikipedia/commons/thumb/d/d6/Paris%2C_Eiffelturm%2C_Teleskop_--_2014_--_1272.jpg/220px-Paris%2C_Eiffelturm%2C_Teleskop_--_2014_--_1272.jpg)
Die Eiffeltoring (Frans: Tour Eiffel [la tuʀ ɛˈfɛl] ) is die bekendste baken van die Franse hoofstad Parys. Die toring, wat van yster gemaak is, is deur die Franse ingenieur Alexandre Gustave Eiffel (1832–1923) beplan en ná 'n boutyd van twee jaar, twee maande en vyf dae op 31 Maart 1889 voltooi en ter geleentheid van die Paryse Wêreldtentoonstelling en die eeufees van die Franse Rewolusie op 15 Mei 1889 ingewy.[1]
Oorspronklik is beplan om die toring binne 'n tydperk van twintig jaar ná sy voltooiing weer af te breek. Dit het egter nie net gaandeweg 'n Paryse baken en toeriste-aantreklikheid geword nie, maar ook belangrike ekonomiese en tegniese funksies vervul, onder meer as reusetelegraafpaal. Tans word radio- en digitale terrestriële televisieprogramme vanuit die toring uitgesaai.
Die toring is 300,5 meter hoog (met sy antenne 320,8 meter) en dien vandag as uitsigpunt en uitsaaitoring. Daar is hysbakke wat 'n voortreflike uitsig oor die stad bied, en in goeie weersomstandighede kan 'n mens sowat 70 kilometer ver sien. Waagmoediges kan met die 1 652 trappies op na die boonste platform stap. As Parys se hoogste struktuur oorheers die Eiffeltoring steeds die stadsbeeld en is met jaarliks sewe miljoen besoekers een van die mees besoekte monumente op aarde. Die toring is een van die bekendste ikone van moderne bou- en ingenieurskuns en word sedert 1964 as monument historique beskerm. In 1986 het die American Society of Civil Engineers die toring ingesluit in sy lys van historiese mylpale van ingenieursboukuns.[2]
Die toring huisves 'n poskantoor, 'n rolprentteater wat met sy films die geskiedenis van die Eiffeltoring behandel en, op die tweede verdieping, die bekende restaurant Jules Verne. Dit is so gewild dat besprekings weke vooraf gemaak moet word.
Net soos die Washington-gedenksteen in Washington, D.C. is die Eiffeltoring ook 'n obelisk, wat trouens net baie goed vermom is.
Verwysings
[wysig | wysig bron]- ↑ Tour Eiffel Paris: Origins and Construction of the Eiffel Tower. Besoek op 12 Maart 2019
- ↑ "ASCE Historic Landmark Program: Eiffel Tower. Besoek op 9 Maart 2019". Geargiveer vanaf die oorspronklike op 29 Junie 2018. Besoek op 10 Maart 2019.
Eksterne skakels
[wysig | wysig bron]Wikimedia Commons het meer media in die kategorie Eiffeltoring.
- (fr) Amptelike webwerf van die Eiffel-toring
- Onderhoud
- (en) Frankryk se trots en sy kleure Geargiveer 13 Augustus 2018 op Wayback Machine