Skatting

Die hoeveelheid lekkergoed in hierdie houer kan nie presies bepaal word deur bloot daarna te kyk nie, maar wel deur middel van skatting. 'n Mens kan byvoorbeeld skat dat die hoeveelheid lekkergoed wat onsigbaar is, gelyk is aan die hoeveelheid sigbale en telbare lekkergoed.

’n Skatting is ’n goeie raaiskoot van die werklike waarde, nie die presiese waarde nie, en gewoonlik is ʼn mate van nadenke of berekening daarby betrokke.

Voorbeeld: Alex het geskat dat daar 100 tulpe in die akker is deur die rye te tel. Dit is nie ʼn presiese hoeveelheid nie, maar ruweg hoeveel hy dink daar in die akker is.

In Wiskunde kan skatting heel nuttig wees. Neem byvoorbeeld 10 x 2 = 20, wat heel maklik is om met die tweemaaltafel te bereken. Veronderstel nou dat iemand tien sjokolades moet koop. Elkeen se prys is R1,99 en die klant wil weet hoeveel geld hy gaan nodig hê, maar het nie ‘n sakrekenaar byderhand nie.

Deur skatting kan dit heel maklik uitgewerk word. Die prys van een stafie sjokolade is R1,99, ʼn getal wat baie naby aan R2,00 is. Dan moet 10 sjokolades 10 x 2 wees, wat gelyk is aan 20. Die klant het dus R20,00 nodig en sal nog bietjie kleingeld oorhou.

Bronne

• Vereniging vir Afrikaanse Wiskunde-onderwysers