Hildesuse Gaertner
D Hildesuse Gaertner, au Gärtner,[1][2] (* 10. Februar 1923 z Fryburg; † 10. Februar 2016 ebe deert) isch e dytschi Schyyrännlaiferi un Bolitikeri gsii. Zwische 1949 un 1952 isch si siibefachi Dytschi Maischteri gsii.
Lääbe
[ändere | Quälltäxt bearbeite]D Gaertner stammt us aire vu dr erfolgryychschte Schyylaiferfamiilie vu Dytschland. Iri Kusyyne Christl Cranz giltet as aini vu dr erfolgryychschte Laiferne vu allne Zyte. Au ire Kusäng Rudolf Cranz het e Hufe nazionaali un internazionaali Erfolg gfyyrt. Frie isch d Gaertner in d Fueßstapfle vu ire Verwandte drätte un isch scho im Alter vu 14 Joor in di dytsch Schyynazionaalmannschaft ufgruckt. Anne 1938 isch si an dr Schyywältmaischterschaft im schwyzerische Engelbärg derby gsii. Iri spoortli Entwicklig isch derno dur dr Uusbruch vum Zweete Chrieg unterbroche woore. D Gaertner isch as Chankeschwester vum Dytsche Roote Chryz in dr Versoorgig vu dr verwundete Soldaate yygsetzt woore.
Noch em Änd vum Chrieg het si si uf ire Stuudium vu dr Filosofy, Natuurgschiicht, Geografy un Zytigswisseschaft an dr Universiteet Fryburg kunzäntriert, wu si anne 1949 zum Thema „Der Obst- und Gemüsebau der Stadt Freiburg und ihrer Umgebung“ promoviert wooren isch. Im nämlige Joor het si z Oberschtdorf im Slalom ire eerscht dytsche Maischtertitel gwunne. Segs anderi sin in dr drei Joor druf derzue chuu: 1950 isch si Dytschi Maischteri in dr Abfaart un in dr Kumbinazioon woore, 1951 un 1952 baidi Mool im Slalom un in dr Kumbinazioon. 1950 het d Gaertner dr Riiseslalom gwunne un am 12. Jänner 1951 d Abfaart[3] vu dr SDS-Ränne z Grindelwald (derzue am 12. Jänner Rang 3 in dr Kumbinazioon[4]).
No ire aktiive Laufbaan het d Gaertner e Karrieere as Repoorteri un Schurnalischti yygschlaa. Speeter het si aa Raisebriicht gschriibe iber Neiseeland un Auschtraalie. Fir di Freie Weeler het si anne 1962 erfolgryych bi dr Waal in Fryburger Gmairoot kandidiert un het däm bis 1975 aagheert. Noch ere fimfjeerige Paus isch si zue dr CDU gwagslet un isch wider gweelt woore. Anne 1989 isch si nimi widergweelt woore, isch aber 1991 as Nooruckeri wider in Gmairoot chuu. Anne 1994 het si ufgheert mit ire bolitischi Karrieere.
An irem 93. Gebuurtsdaag, am 10. Februar 2016, het si d Auge fir immer zuegmacht.
Weblink
[ändere | Quälltäxt bearbeite]- Nachruf. Die Freiburger Altstadträtin Hildesuse Gaertner ist gestorben, Badische Zeitung vum 12. Februar 2016
- Hildesuse Gaertner im Munzinger-Archiv
Fueßnote
[ändere | Quälltäxt bearbeite]- ↑ https://www.munzinger.de/search/portrait/Hildesuse+G%C3%A4rtner/1/51434.html
- ↑ OLYMPIA-REPORTAGE / Medien: Keine Phrasen über Stimmung. In: Der Spiegel. Nr. 6, 1952 (Online).
- ↑ «Österreichs Läuferinnen ohne Sieg». In: Arbeiter-Zeitung. Wien 13. Jänner 1951, S. 8 (arbeiter-zeitung.at – das offene Online-Archiv – Digitalisat).
- ↑ «Arlberger siegen auf dem Lauberhorn»; Untertitel: «Auch in Grindelwald ein österreichischer Erfolg». In: Arbeiter-Zeitung. Wien 14. Jänner 1951, S. 14 (arbeiter-zeitung.at – das offene Online-Archiv – Digitalisat).
|
Dä Artikel basiert uff ere fräie Übersetzig vu dere Version vum Artikel „Hildesuse_Gaertner“ vu de dütsche Wikipedia. E Liste vu de Autore un Versione isch do z finde. |