Царква Покрыва Багародзіцы (Дзьвінаса)

Помнік сакральнай архітэктуры
Царква Покрыва Багародзіцы
Пакроўская царква
Краіна	Беларусь
Вёска	Дзьвінаса
Каардынаты	54°34′04″ пн. ш. 27°40′51.3″ у. д.
Канфэсія	праваслаўе і Беларускі экзархат
Эпархія	Барысаўская япархія[d]
Дата заснаваньня	XIX ст.
Царква Покрыва Багародзіцы на мапе Беларусі Царква Покрыва Багародзіцы

Царква Покрыва Багародзіца — помнік архітэктуры XIX стагодзьдзя ў Дзьвінасе. Знаходзіцца на паўночнай ускраіне вёскі, на могілках. Пры пабудове была ў юрысдыкцыі Сьвятога Пасаду, цяпер — у валоданьні Маскоўскага патрыярхату. Твор традыцыйнай беларускай драўлянай архітэктуры з элемэнтамі стылю клясыцызму, мастацкае аблічча якога пацярпела ў выніку надбудовы купала-цыбуліны.

Гісторыя

Царкву ў Дзьвінасе збудавалі ў XIX ст. з дрэва. Па гвалтоўнай ліквідацыі Ўніяцкай царквы ў 1839 годзе расейскія ўлады адабралі будынак царквы ў Сьвятога Пасаду і перадалі ў валоданьне Ўрадавага сыноду Расейскай імпэрыі (Маскоўскага патрыярхату).

У 1955 годзе савецкія ўлады зачынілі царкву. У 1991—1992 гадох будынак адрамантавалі. У 2010-я гады ў выніку рэканструкцыі над вежай-званіцай паставілі пазалочаны купал-цыбуліну.

Архітэктура

Помнік традыцыйнай беларускай драўлянай архітэктуры з элемэнтамі стылю клясыцызму. Гэта прастакутны зруб (хваёвы брус) з 5-граннай апсыдай, накрыты двухсхільным дахам з вальмамі над алтарнай часткай. З боку галоўнага фасаду далучаецца прытвор пад двухсхільным дахам. Франтон даху завяршаецца 4-граннай шатровай званіцай.

Літаратура

• Кулагін А. Праваслаўныя храмы Беларусі: Энцыкл. даведнік. — Менск: Беларуская Энцыкляпэдыя, 2007.— 653 с.: іл. ISBN 978-985-11-0389-4.

Вонкавыя спасылкі

Царква Покрыва Багародзіцы (Дзьвінаса) — сховішча мультымэдыйных матэрыялаў