PS Barito Putera
| Ngaran langkap | Persatuan Sepak Bola Barito Putera | |||
|---|---|---|---|---|
| Galaran | Laskar Antasari Bakantan Hamuk | |||
| Badiri | 21 April 1988; 36 tahun hampau | |||
| Stadion | Satadiun 17 Mei (Kapasitas: 15.000) | |||
| Anggit | PT Putera Barito Berbakti | |||
| Manajer | Hasnuryadi Sulaiman | |||
| Pelatih | Rahmad Darmawan | |||
| Liga | Liga 1 | |||
| 2023-24 | Paringkat 10 | |||
| Tungkaran web | Tungkaran web rasmi pakumpulan | |||
| ||||
 Musim ngini | ||||
PS Barito Putera (singkatan matan: Persatuan Sepak Bola Barito Putera) adalah pakumpulan sipak bal Indunisia babasis di Kuta Banjarmasin, Kalimantan Salatan, nang bamain di Liga 1 tumatan musim 2013.
Barito Putera didiriakan wayah tahun 1988 wan bamarkas di Satadiun 17 Mai Banjarmasin.[1] Wayah satadiun nitu dirinopasi matan tahun 2019, Barito Putera samantara bamarkas di Satadiun Demang Lehman Martapura.
Pakumpulan sakuta Barito Putera adalah Peseban Banjarmasin nang baturai di Liga 3, wan pakumpulan kuta tatangga Martapura FC nang baturai di Liga 2. Tagal par 22 Pibruari 2021, Martapura FC ditukari urang (diakuisisi) wan diubah ngarannya jadi Dewa United FC.
Sajarah
[babak | babak asal-mulanya]Ihwal handak maulah klub sipak bal sudah tapikir ulih pangusaha Banua bangaran Haji Abdussamad Sulaiman HB tumatan tahun 70-an. Wayah nitu, di Banjarmasin ada parlumbaan sipak bal nang disambat Liga Tarkam (antarkampung).
Parlumbaan pinal mahadapakan tim Indrapura Muda malawan tim Karbau Lapas. Parlumbaan nitu dimanangakan tim Indrapura Muda, nang mawakili Kalurahan Teluk Tiram.
Limbah manuntun kamanangan nitu, Haji Abdussamad Sulaiman atawa Haji Leman marasmiakan klub sipak bal amatir nang bangaran Persenus (Persatuan Sepak Bola Nusantara).
Parasmian klub nitu baimbai lawan dikiyaunya pamain-pamain tarbaik di Banjarmasin. Mantan pamain timnas Kurnia Hasan jua dikiyau gasan jadi palatih.
Persenus mawakili Komda PSSI Kalselteng imbah mangalahakan Peseban Banjarmasin. Kamanangan nitu maulah Persenus tulakan ka Jakarta gasan maumpati turnamin Soeharto Cup tahun 1980. Soeharto Cup jadi parlumbaan nasiunal pamulaan nang diumpati Persenus, tagal tim tumatan Kalimantan ngini kalah di babak grup.
Asa kada puas malihat timnya kalah, Haji Leman lalu mandiri akan klub sipak bal prupisiunal bangaran PS Barito Putera, tanggal 21 April 1988.[2]
Ngaran Barito diambil tumatan ngaran sungai nang mahubungakan Kalimantan Salatan wan Kalimantan Tengah, yaitu Sungai Barito. Samantara ngaran Putera mawakili pamuda-pamuda nang ada di Kalimantan Salatan.
Wayah nitu, Haji Leman masih gagaringan wan mandiriakan PS Barito Putera di rumah sakit di Jakarta.[3]
PS Barito Putera suah marasa akan parsaingan di pintas Galatama wan Liga Indonesia (Ligina) 1.
Wayah Ligina 1, PS Barito Putera nang wayah nitu hanyar baumur anam tahun kawa tambus ka babak samipinal, tagal dikalahakan Persib Bandung.
Limbah nitu, PS Barito Putera sampat jadi tim midiukir wayah tahun 1999-2002. Imbahnya turun kasta ka Divisi 1 tahun 2003, turun pulang ka Divisi 2 tahun 2004.
Lawas kalawasan, PS Barito Putera bangkit di wayah kapalatihan Salahudin.
Salahudin mambawa PS Barito Putera naik ka Divisi 1 tahun 2008, imbahnya jadi paringkat kaanam wayah musim 2011-12. Lamun malihat paringkat, sabujurnya Laskar Antasari kada kawa umpat babak play-off wan barabut tikit prumusi. Tagal hukuman matan PSSI nang ditarima Persebaya Surabaya maulah Barito Putera utumatis naik ka paringkat lima wan bulih umpat babak playoff.
Imbahnya, PS Barito Putera manjadi juara wan prumusi imbah mangalahakan Persita Tangerang lawan skur 2-1 di Satadiun Manahan, Solo.[2]
PS Barito Putera prumusi ka Indonesia Super League (ISL) 2013, wayah ini disambat Liga 1.
Jujuhutan
[babak | babak asal-mulanya]- ^ "Klub | PS Barito Putera, Barito Putera, Barito Putera FC, Barito, Baju Bola, Jersey Bola, Jadwal Barito Putera, Merchandise Barito, Jersey Barito" (dalam bahasa Indonesia). Diakses tanggal 2024-06-18.
- ^ a b Helmi, Muhammad (11 Agustus 2022). "Sejarah Barito Putera, Ternyata Lahir dari Liga Tarkam". Radar Banjarmasin. Diakses tanggal 18 Juni 2024.
- ^ Haswar, Andi Muhammad (21 februari 2020). "Kisah Barito Putera yang Didirikan di Rumah Sakit". Kompas. Diakses tanggal 18 Juni 2024.