Anhinojo Folk
Anhinojo Folk son una banda música populal estremeña, entrépeti de cantaris tradicionalis comu los de las Coplas de la sementera o Las Sirvientas.
![](http://upload.wikimedia.org/wikipedia/commons/thumb/1/14/Anhinojo_Folk.jpg/300px-Anhinojo_Folk.jpg)
Nombri
[Edital | Editá'l códigu]El nombri vien de una antigua pronunciación del puebru de Los Hinojalis (Caçris), dandi son naturalis los biembrus el grupu.
El grupu
[Edital | Editá'l códigu]Formación i primerus conciertus
[Edital | Editá'l códigu]El grupu s’entanga el 15 Juñu de 1977 con el píu de envestigal i arrecuperal el patrimoñu musical oral estremeñu. De má que se pusun a graval en cintas cantaris de los nombraus comu 'Los Quatru lugaris', concidiendu cona vuelta de muchus de los imigrantis que ahuyerun añus atrás. Arrecuperarun cantaris de quintus, copras, romancis, arvolás, cancionis de ronda, de oficius, amás de las popularis en destintus eventus, comu los cantaris que se echavan enas matancias o mesmu pa San Sebastián.
Al sotru añu hazin el su primel conciertu pa las fiestas de San Sebastián, el 20 Eneru. En essi mesmu añu comparti escenariu con Víctor Manuel i Ana Belén en Alcántara i mas tardi en Talaván, junta Rosa León.
Atranquis
[Edital | Editá'l códigu]El grupu acontinó a dal conciertus i a tocal ata 1982, quandu prencipiarun a descael i angunus de los biembrus salierun i otrus entrarun. Gravarun una cinta que devulgarun entre los vezinus. No dexarun de tocal, enque a margullus, pos varius componentis no vivían en Los Hinojalis.
Primel trabaju discográficu
[Edital | Editá'l códigu]Sin abaldonal el trabaju i por mó de la briega del fundaol del grupu, por fin cedin graval un primel discu en 2007, entitulau Anhinojo canta a los cuatro lugares. Adispués, en el 2010 se componin del mó que están ogañu, con dos biembrus viviendu en Mairil. Colavoran en essi mesmu añu el discu recopilatoriu Folklore Tajo-Salor con otras agrupacionis comu El escaramujo de Garrovillas de Alconeta, Recordanzas de Monroy o El Pandero d’Arroyu la Lus[1].
Cantaris de Trasantiel
[Edital | Editá'l códigu]En Juñu de 2011 actúan en el I Encuentro del Extremeño y su Cultura en Botija, condiciendu con las V Jornadas de puertas abierta de Villasviejas del Tamuja. Aluspués, s'enlían a apreparal el que vá a sel el su segundu discu, Cantaris de trasantiel, una de las escassas pubricacionis culturalis con títulu en estremeñu. Acabarun de gravá-lu en Juliu de 2011[2]. En él s’enclúin cantaris comu Las Sirvientas, tradicional de Los Hinojalis i cantá en estremeñu. Amás son de asseñalal los sonis del rabel en Sones de rabel a lo pesao o la originalidá de Coplas de la sementera.
Estrumentación
[Edital | Editá'l códigu]Los estrumentus que tocan los de Anhinojo son los tradicionalis de la música estremeña. Gastan gaita estremeña i tamboril ena huerça las sus músicas. Amás gastan morterus, almirés i botellas. Comu acompañamientu gastan la úd i la quitarra i a las vezis el rabel. En portá del últimu discu aparecin un tamboril con un rabel junta la gaita i el morteru.
Biembrus
[Edital | Editá'l códigu]En ogañu los componentis de Anhinojo Folk son:
- Francisco Sánchez Bernal: gaita, tamboril, rabel, percussión tradicional.
- José María Díaz Moreno: vos, quitarra, percussión tradicional.
- Juani Garcia': vos, percussión tradicional.
- Remedios Pantrigo López: vos, percusisión tradicional.
- Benito Lancho Monje: vos, quitarra acústica i percussión tradicional.
Discografía
[Edital | Editá'l códigu]Discus pubricaus:
- Anhinojo canta a Los Cuatro Lugares, 2007.
- Cantaris de trasantiel, 2011.
Colavoracionis:
- Folklore Tajo-Salor, 2010.