Dagherotipie
La dagherotipie e je une tecniche fotografiche che e je stade inventade dal francês Louis Daguerre tal 1839. Lis fotografiis fatis in cheste maniere no son riprodusibilis, ven a stâi che a son singulis parcè che no si dopre nissune forme di negatîf o di stamp.
La lôr cualitât viers chei altris metodis de stesse epoche e jere superiôr e par chest e jere une tecniche che e a vût une grande difusion.
E vignive fate su une lastre di ram che parsore al vignive fissât arint cun un metodi eletrolitic e al vignive sensibilizât cun vapôrs di jodi.
La lûs de imagjine a veve di rifletisi su la lastre cussì preparade par un periodi di almancul dîs o cuindis minûts. Il disvilup al vignive fat cun vapôrs di mercuri e daspò si doprave une soluzion di iposolfit di sodium.
Par no che al si scurissi l'arint la imagjin e veve di jessi tignude sot veri e par chest si fasevin curnîs che di spes a jerin une vore lavoradis. Di fat la opare finâl che vignive tignude a cjase e jere une vie di mieç fra la opare di alt artesanât e la vere opare di art.
Par chestis carateristichis artistichis ancje al dì di vuê a son amadôrs atôr pal mont che a continuin a doprâ cheste tecniche.
