鄱陽湖之戰
外觀
鄱陽湖之戰
| |||||||
---|---|---|---|---|---|---|---|
江西變做明朝嗰一部分 | |||||||
| |||||||
參戰方 | |||||||
陳友諒嗰大漢兵士 | 朱元璋嗰部下 | ||||||
指揮官 | |||||||
陳友諒† | 朱元璋 | ||||||
兵力 | |||||||
650,000兵 | 200,000兵 | ||||||
傷亡 | |||||||
陳友諒同佢嗰大部軍隊 | 1,346兵陣亡, 11,347兵負傷 |
![](http://upload.wikimedia.org/wikipedia/commons/thumb/2/21/Hayohko.png/220px-Hayohko.png)
鄱陽湖之戰係14世紀到江西開戰嗰一次大規模嗰戰役。佢嗰一方係許時間嗰大漢皇帝陳友諒,另一方係末後嗰明太祖朱元璋。
元朝末年,大漢皇帝陳友諒佔到江西嗰地盤。1362年,佢嗰手下龍興路守將胡廷瑞投抗朱元璋,朱元璋仰上搦龍興璐改做洪都府,讓佢嗰侄子朱文正帶兵鎮守南昌城。第年4月,陳友諒發60萬兵攻奪南昌,接得分兵南攻,佔領吉安、臨江。7月,朱元璋帶得援兵到南昌,16號到嘍湖口。佢接得分兵鎮守涇江口、南湖嘴、武陽渡箇滴子地方,為得到時間封到陳友諒嗰退路。
箇時間嗰陳友諒兵多船大,話佢嗰巨艦陣仗綿亙幾十里,隻隻船都十喇丈許高。但佢嗰部下圍困南昌城有八十喇日嘍,士氣低落。話係朱元璋嗰兵艦都滴滴子大,部下也就20喇萬人。但係佢俚嗰士氣都蠻高昂嗰。
7月20號,兩隻人嗰軍隊到康郎山對特。陳友諒嗰猛將張定邊一下子就尋到朱元璋,戲得朱元璋嗰大將常遇春仰上騷到,一箭射中張定邊,咁佢俚才得脫險。
幾日後起大風,朱元璋仰上下令放火燒陳友諒嗰船。7隻火藥船拕Ꮊ滿蘆葦,順得東北風望陳友諒許裡開進。陳友諒嗰兵艦一刻時解不脫,故係連得一起,燒得精嗒光。末後陳友諒退到渚磯,朱元璋就到左蠡等佢。箇時間嗰陳友諒兵敗心死,故係佢身邊嗰人都開始投抗朱元璋,捉到嗰俘虜也全拕殺吥嘍。朱元璋就跟佢相反,捉到嗰俘虜都送還陳友諒,受傷嗰人哈搦佢藥,戰死嗰人也祭奠拜祀。
到8月督,陳友諒嗰兵草都喫圓嘍,故係佢就帶兵到南湖嘴,全力突破湖口。朱元璋都帶兵騷佢,一徑騷到涇江口。咁陳友諒嗰前後都係朱元璋嗰兵,夾擊之下佢拕流箭射中身亡。張定邊就護得陳友諒嗰崽陳理到武昌。末後陳理投抗朱元璋,咁大漢政權都完全覆滅,江西嗰全境都歸明朝嘍。