Op de Hei

Dit artikel is gesjreve (of begós) in 't Tegels. Laes hie wie v'r mit de versjillende saorte Limburgs ómgaon.

---

Ligging van Op de Hei in de gemeinte Venlo

Op de Hei is 'n wièk van 't dörp Tegele in de Nederlands Limburgse gemeinte Venlo. De wièk is 465ha groeët en tèlt in 2016 3.825 luuj en 'n rilletief groeët deil van de bevólking (29%) is juug of adolescent (0-24 jaore). 60% velt ónger de beroepsbevólking. Op de Hei vörmt in óppervlek zikker de hèlf van Tegele. De wièk is óp te deile tösse in ein sjtök op de Hei (waonao de wièk verneump is), dös óp de hoeëgte-terras, en ein sjtök lieëger tösse 't dörp en de hoeëgte-terras. Drèk oeëstelik leejt ouch de gehuch Egypte. Die twieë deile zeen totaal versjèllend. 't Lieëger sjtök ónger de Hei waar 'n zómpig gebeed, wao de reveer de Maos mit 'ne bóch de sjteilrank sjaerde. Naeve de aaj Maoserm lage inkel belangrieke häöffer, wie d'n Haandert. Ouch heej bevind zich 't Kesjtiël Holtmühle, wao de bekinde Baron von Glasenapp wónde. Beej d'n Haandert woort in de jaore 1930 de wièk Hieëlig Hert Parochie geboewd.

Baove óp de hei waar lange tied 'n groeët aaneinsjletend heidegebeed die 'n gebeed besjleug van Kaldenkirchen euver de päöl, tót aan Venlo in 't naorde en Belvend in 't zuje. Rónk 1900 woorte heej graove dènne aangeplant veur de gesjläöte mienboew in de Miensjtreik. 't Guuf ouch nag koele, wao bis in de jaore dertig grind en klei woort aafgegrave. De klei heej sjtóng bekind um eure kwaliteit, en 't woort um die reie vaok gebroek veur de productie van baksjteine. Veur de groeve's mós Kesjtiël Wambach beej de grens mit 't Pruusj waal wieke. Pas drèk nao d'n Twieëde Waereldkrieëg woort óp de sjteilrank 't twieëde deil van de woeënwièk aangelag. Door de groeëtssjalige bósaanplant is dit ein van de greunste wièke van de gemeinte Venlo.

De aanlèg van de sjnelwaeg A73 en A74 westelik en naordelik van Op de Hei, zurgte aanvankelik veur ónrös ónger de wièkbewoeëners vanwaenge meugelike milieu- en euverlasperbleme. Ouch woort isolatie van de res van de gemeinte gevraes, en um die reie woorte hanktaekeninge daor actiegróppe verzameld. De sjnelwaeg woorte aevels geboewd: de A73 woort in 2008 ópgelaeverd en de A74 in 2012. Daor de A73 tösse de wièk en Tegele get te verdepe en mierder brögke te boewe vanoet de Hei nao Tegele en Venlo, woort det perbleem ópgelos.

Weblink

• https://www.buurtlink.nl/buurten/op-de-heide