Bobo-Dioulasso
I Bobo-Dioulasso dia tanàna any tapany andrefana amin' i Borkina Fasô sady foibem-pitantanan' ny Faritanin' i Houet. Eo amin' ny lembalemba manakaiky ny sisin' ny lalamby mamakivaky an’ ilay firenena avy any Kôtidivoara mankany Nizera i Bobo-Dioulasso izay ivon-toeran’ ny raharaham-barotra ho an' ny vokatry ny fambolena avy amin' io faritra io (voanjo, voan' antsingeny (sesame), taretra, biby fiompy). Anisan’ ny vokatra lehibe indrindra any ny kofehy landihazo, ny vokatry ny taozavatra metaly, ny menaka zavamaniry, ny savony, ny sokay ary biriky.
Naorin’ ny Bôbô, vahoaka tatsaha, tamin' ny taonjato faha-11 ilay tanàna izay nivoatra nanomboka tamin' ny fahatongavan' ny Diola tamin' ny taonjato faha-15, ary vetivety dia lasa foibe ara-barotra lehibe, izay nivorian' ny mpivarotra isan-karazany samy hafa fiaviana. Taloha dia fantatra amin' ny anarana hoe Sya ity tanàna ity izay nifaninana tamin' ny foibe ara-barotra ao Kong (any avaratr' i Kôtidivoara ankehitriny) ilay tanàna izay niroborobo. Lasa teo ambany fifehezan’ ny Frantsay ilay tanàna tamin’ ny taona 1897. Novana anarana hoe Bobo-Dioulasso ("tanànan’ ny Bôbô sy ny Diola") izy io tamin’ ny faran’ ny taonjato faha-19.
I Bobo-Dioulasso dia manana môskea maromaro sy ivon-toeram-pikarohana maromaro, anisan' izany ny Centre d’Etudes Economiques et Sociales d’Afrique de l’Ouest ("Foiben' ny Fikarohana ara-Toekarena sy ara-Piarahammonin' i Afrika Andrefana") (1960) sy ny orinasa maro mifandray amin' ny fikarohana momba ny areti-mifindra (epidemiôlôjia), ny geôlôjia ary ny fambolena.