Кышкар:Кызытсе сай статья
![](http://upload.wikimedia.org/wikipedia/commons/thumb/0/06/Pavel_Petrovich_Glezdenev.jpg/150px-Pavel_Petrovich_Glezdenev.jpg)
Пагул Ача (Павел Петрович Глезденёв) (1867 вӱдшор 9 (вӱдшор 21), Ӱпӧ губерний, Белебей уезд, Тымбагуш ял — 28 ага 1923, Илна ола) — марий серызе, йылмызе, кусарыше, туныктышо, сотемдарче, этнограф, журналист, мер да шанче пашаеҥ. Марий-влак коклаште кÿшыл шинчымашым икымше радамыште налше лиеш. Марий калыкын икымше журналистше да редактор-издательже. Марий йылме дене савыкталтше «Война увэр» икымше газетын редакторжо. Валериан Васильев дене пырля «Марла календарьым» негызлыше да икмыняр жап савыктыше.
Лӱмжӧ нерген
[кодым тӧрлаташ]Шочмо лӱмжӧ — Мендиаров Исламгарей.
Тынеш пурымо деч вара — Павел Петрович Глезденёв.
Семинарийыште тунеммыж деч вара миссионер пашаж годым калык тудым Пагул Ача (отец Павел) манын лӱмден. Тиде лӱмым Глезденёв южо журналист пашалаштыже алмашлӱм семын кучылтын.
Илыш корныжо
[кодым тӧрлаташ]Йоча да самырык пагыт
[кодым тӧрлаташ]Павел Петрович Глезденёв 1867 ий 21 вӱдшорышто (южо вере 22 вӱдшор шочмо кечылан палемдалтеш) Ӱпӧ губернийысе Белебей уезд, Тымбагуш ялеш (кызыт Шараҥ кундем) шочын. Шочмо годым Мендиаров Исламгарей Яковлевич лӱмым нумалын). Ачаже кресаньык лийын, но кок эргыжым туныктен лукташ йӧным муын. Вес эргыже, Леонид Яковлевич Мендиаров (1881—1948), шке жапышыштыже марий тӱвыра илышыште лÿмлӧ еҥ лийын. 1892 ийыште тынеш пурымо деч вара Исламгарей Мендияров Павел Петрович Глезденёвыш савырнен.