Borchel
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27356 | |
| Vörwahl: | 04268, 04286 | |
| Geograafsche Laag: | Koordinaten:53° 10′ N, 9° 22′ O53° 10′ N, 9° 22′ O | |
|
| ||
Borchel (hoochdüütsch Borchel) is en Dörp in de Gemeen Rodenborg in’n Landkreis Rodenborg, Neddersassen. De lüttjen Öörd Stellmoor un Borchelhoff höört ok mit bi Borchel bi.
Geografie
[ännern | Bornkood ännern]Dat Rebeed von Borchel is Moor. In’n Süden von Borchel liggt de Luhner Forst un un’n Süüdoosten de Weichel. Borchelhoff in’n Noorden liggt op en Geestinsel.
De Naveröörd sünd Langenhörn un Abbendörp in’n Noorden, Hetzweeg un Westerholt in’n Noordoosten, Rodenborg in’n Süüdoosten, Luhn in’n Süden, Boitzen un Höperhöben in’n Süüdwesten, Mulmshoorn in’n Westen un Heesdörp in’n Noordwesten.
Historie
[ännern | Bornkood ännern]De öllste Deel von Borchel is de Borchelhoff, de 1432 as Hoff uppe dem borchel toeerst in de Oorkunnen vörkummt. 1690 hett de Familie Clüver en Schaperee in’t Borcheler Holt grünnt. Dat hüdige Borchel is 1803 as Moorkolonie mit 40 Steden grünnt worrn. Düsse Kolonie is ok Borchelsmoor nöömt worrn. Dat is en Naklapp to de Moorkolonisatschoon ünner Jürgen Christian Findörp ween, de to disse Tied al doodbleven weer.
In de Franzosentied von 1810 bet 1814 hett de Oort to de Mairie Jeem in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to dat Amt Rodenborg tohöört. Na 1885 weer dat in’n Kreis Rodenborg. 1977 is dat Deel von’n ne’en grötteren Landkreis Rodenborg worrn.
De Oort is an’n 1. März 1974 Deel von de Gemeen Rodenborg worrn.
Inwahnertall
[ännern | Bornkood ännern]| Johr | Inwahners |
|---|---|
| 1812[1] | 109 |
| 1824[2] | 40 Füürsteden |
| 1848[3] | 253 Lüüd, 44 Hüüs |
| 1. Dezember 1910[4] | 337 |
| 1925[5] | 369 |
| 1933[5] | 323 |
| 1939[5] | 308 |
Börgermeesters/Oortsvörstehers
[ännern | Bornkood ännern]Börgermeesters:
- 1972-1974: Hans Worthmann
Oortsvörstehers:
- 1974-: Hans Worthmann
Religion
[ännern | Bornkood ännern]Borchel is evangeelsch-luthersch präägt un höört to dat Kaspel von de Opstahns-Kark in Rodenborg. Borchelhoff höört to dat Kaspel von de Margarethen-Kark in Jeem. De Moorkolonie Borchel sülvs hett 1815 beslaten, dat se lever to de Stadtkark in Rodenborg as to Jeem hören wüllt. As 1986 de Opstahns-Kark boot un se to’n 1. Oktober 1987 egenstännige Karkengemeen worrn is, is de Oort von de Stadtkark na de ne’e Kark wesselt.
För de Kathoolschen is de Corpus-Christi-Kark in Rodenborg tostännig.
De Karkhoff von Borchel liggt in Stellmoor.
Kultur
[ännern | Bornkood ännern]Dat Dörpgemeenschopshuus in Borchel is 1986 boot worrn.
Verenen
[ännern | Bornkood ännern]Borchel hett en Schüttenvereen, de an’n 22. August 1936 grünnt worrn is. De freewillige Füürwehr is an’n 1. September 1964 grünnt worrn, nadem dat vörher siet 1803 en Plichtfüürwehr geven harr.
Weertschop un Infrastruktur
[ännern | Bornkood ännern]An’n Oostrand von Borchel liggt de Golfclub Wümm.
Verkehr
[ännern | Bornkood ännern]De Hauptstraat von Borchel geiht to beide Sieden von de Kreisstraat 238 af, de in’n Noorden na Langenhörn un Abbendörp geiht. In’n Süden geiht de K 238 an de Bundsstraat 71 ran, de denn in’n Süüdoosten na Rodenborg geiht un in’n Noordwesten na Zeven. Lüttjere Straten gifft dat ans na Mulmshoorn un Westerholt.
De nächste Autobahn is de Autobahn 1. De Opfohrt 48 Elsdörp liggt so teihn Kilometer in’n Noorden von Borchel.
De nächste Bahnhoff is so bi söven Kilometer wied weg in’n Süüdoosten de Bahnhoff Rodenborg an de Bahnlien Bremen–Hamborg.
Scholen
[ännern | Bornkood ännern]Fröher harr Borchel en egen Volksschool. Vondaag gaht de Kinner in Rodenborg na School.
Literatur
[ännern | Bornkood ännern]- 150 Jahre Borchel. 1953
- Martin Folkerts: Borchel: ausgewählte Aufsätze aus der Dorfschule zur Entwicklung des Moordorfes (1926 - 1952). 2002
- Martin Folkerts: Gemeinde Borchel (Kreis Rotenburg): Protokolle von den Sitzungen der Gemeindegremien (1891-1974). 2006
Footnoten
[ännern | Bornkood ännern]- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 98: http://books.google.de/books?id=Q 5OAAAAcAAJ&pg=PA98
- ↑ C. H. Jansen: Statistisches Handbuch des Königreichs Hannover. 1824, Sied 74: http://books.google.de/books?id=tG0AAAAAcAAJ&pg=PA74
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 152: http://books.google.de/books?id=eOI-AAAAcAAJ&pg=PA152
- ↑ http://www.gemeindeverzeichnis.de/gem1900/gem1900.htm?hannover/rotenburg.htm
- ↑ a b c http://www.verwaltungsgeschichte.de/rotenburg.html
_COA.svg)
Borchel (mit Stellmoor un Borchelhoff) | Mulmshoorn | Rodenborg (mit Luhn un Grafel) | Ünnerst | Waaschen
