Diplomat
En Diplomat is en Beupdragten vun en Regeerung. He vertritt sien Staat up dat Flach vun de Regeerung gegen annere Staten over oder gegen internatschonale Organisatschonen over na dat Völkerrecht. Dor kann he de Baas vun en diplomaatsche Misschoon bi ween oder ok een ween, de düsse Misschoon unnersteiht.
Status
[ännern | Bornkood ännern]Nich eerst siet dat Wiener Afkamen over diplomaatsch Mit’nanner vun 1961 hefft Diplomaten en Recht up Immunität. Dat weer al vun ole Tieden her Gewohnheitsrecht. Dat bedutt, de Diplomat draff, wenn he in en diplomaatsche Misschoon unnerwegens is, nich verfolgt un ok nich inspeert weern. Bovendem mutt he in den Staat, wo he unnerwegens sünd, keen Afgaven oder Stüern betahlen. Diplomaten kriegt vun ehr Heimatland en Vullmacht, datt se ehr Heimatland gegen annere Staten over vertreden dröövt un sunnerlich, dat se Verdräge na dat Völkerrecht uthanneln un unnerschrieven dröövt. Wenn en Diplomat en Diplomatenpass hett, bedutt dat noch nich, datt he Immunität geneten deit. In düssen Status kummt he eerst, wenn he in en Gastland ok akkrediteert is.
In en Krieg weert Diplomaten ut Grünnen vun de Sekerjeit normolerwiese aftrocken. Wenn dat to diplomaatschen Striet twuschen twee Länner kamen deit oder en Regeerung vertöörnt is over en annere, weert de Ambassadöre oder annere Diplomaten faken for korte oder längere Tied torüch ordert. Dor schall denn mit düütlich maakt weern, dat ehr Heimatstaat untofreden is over en politsche Fraag.