T-34

Lo T-34 es un carri sovietic intrat en servici en 1940 au sen de l'Armada Roja. Èra un veïcul revolucionari per son epòca gràcias a un bòn equilibri entre sa poténcia de fuòc, la proteccion de son blindatge e sa mobilitat. En particular, dispausava d'un blindatge clinat que permetiá d'aumentar l'espessor de sa proteccion avans còntra leis obús. En revènge, la torrela èra inicialament tròp pichona e plusors versions foguèron desvolopadas avans d'arribar au modèl T34/85 que predominèt a partir de 1944. Durant aqueu procès, lo canon dau T-34 passèt de 76,2 a 85 mm.

84 070 exemplaris foguèron produchas de 1940 a 1958. Lo T-34 foguèt lo carri mejan pus fabricat e pus utilizat de la Segonda Guèrra Mondiala (1939-1945). Sa construccion rapida e son entretenh simple foguèron dos factors permetent d'explicar aqueu succès. Lo rèsta es liat a sei performàncias sus lo prat batalhier. D'efiech, èra capable de resistir ai tirs dei Panzer III e IV que formava lo còr dei divisions blindadas alemanda. La version T-34/85 èra tanben en mesura de destrurre un Panther a 800 m.

Après 1945, lo T-34 foguèt utilizat durant la Guèrra de Corèa (1950-1953). I enregistrèt de succès còntra lo carri leugier Chaffee e lo carri mejan Sherman. En revènge, poguèt pas rivalizar amb lo carri pesuc M26 Pershing. Lo T-34 participèt tanben ais intervencions sovietics dins lei país dau blòt de l'Èst durant leis ans 1950 e foguèt liurat a plusors armadas comunistas. En causa de la robustessa de sa mecanica, foguèt donc engatjat dins plusors conflictes de la fin dau sègle XX ò dau començament dau sègle XXI coma lei Guèrras de Iogoslavia, la Guèrra Civila Siriana ò la Guèrra Civila Iemenita.