Иван Панькевич
| Иван Панькевич | |
|---|---|
| укр. Іван Артемович Панькевич | |
 Увидьте фото | |
| Познатый як | украинскый лингвиста Подкарпатской Руси |
| Горожанство | Австро-Угорьско, Чеськословеньско |
| Уроджѣня | октобра 6., 1887 |
| Цеперов, Галичина, Австро-Мадярщина | |
| Упокоеня | фебруара 25., 1958 (70 р.) |
| Прага, ЧССР | |
| Научна робота | |
| Сферы наук | лингвистика, литературознаня, фолклористика, етнография, умѣлствознаня, история |
| Ученый ступень | доктор филологии |
| Учене званя | професор |
| Alma mater | Львовска универзита |
| *** VIAF:37722038; GND:119230275; LCCN:nr90009566; FAST:270590; OL:OL2117185A; Ту можуть быти податкы з Wikidata, не контролованы авторами статѣ | |
Иван Панькевич, (укр. Іван Артемович Панькевич; *6. октобер 1887, Цеперов, Галичина, Австро-Мадярщина – †25. фебруар 1958, Прага, ЧССР — чехословацкый (подкарпаторускый) украинскый лингвиста, литературознатель, фолклориста, етнограф, умѣлствознатель, историк, педагог и сполоченскый дѣятель, организатор школной справы Подкарпатской Руси (1919–1939).[1][2]
Биография
[едітовати | едітовати жрідло]В роках 1907–1909 учив ся во Львовской универзитѣ, в року 1912 скончив Вѣденьску универзиту. Преподавав в роках 1912–1919 на Конзуларной академии (Вѣдень), в роках 1920–1939 — в гимназиях Ужгорода, з 1939 — професор Братиславской и Карловой универзиты (Прага). Еден зоз закладательох товаришств «Просвіта» і «Педагогічного товариства Підкарпатської Русі» в Ужгородѣ (1920), редактор «Наукового збірника товариства „Просвіта"» (1922–1928), журнала «Підкарпатська Русь» (1924–1936).[3]
По приходѣ «другых Мадярох» в марцу 1939 одышов раз до Братиславы, пак до Прагы, де став ся доцентом «Українського Вільного Університету» (1939–1945). В роках 1945–1952 преподавав украинскый язык и литературу на Карловой универзитѣ в Празѣ, сполупрацовав в украинизации Пряшовского края, зокрема написав приручку про учительох украинского языка во школах края («Короткі правила українського правопису для вжитку Пряшівщини», 1952), што была выдана анонимово. Але в часѣ кампании комунистичной влады ЧССР против «украинского буржуазного национализма» потерпѣв и Панькевич: быв пропущеный з роботы. Остаток живота перебыв в Празѣ, продовжуючи штудии русинскых диалектох.[1][2]
Чинность в школствѣ Подкарпатской Руси
[едітовати | едітовати жрідло]В року 1920 пражска влада поклала Панкевича референтом школной управы Подкарпатской Руси (1920-1924). Прага му звѣрила написати учебникы про школы края «на руськом народном языку». Панькевич як участник украинского народного руху сповнѣня той улогы выхосновав, жебы завести украинскый язык до школ Подкарпатской Руси и украинизовати школство края, але чинив тото, на роздѣл од радикалных националистох, осторожно. Складены ним учебникы («Граматика руського языка», 1922, 1927) были написаны раз не на чистом украинском литературном языкови, а на языковой мѣшанцѣ, близкой ку русинской бесѣдѣ (так звана «панькевичівка»).[2]
Основны принципы фонетично-етимологичной «панькевичівкы» были приняты в року 1920 на учительском зъѣздѣ Подкарпатской Руси и выкладены в граматицѣ «Граматика руського языка» (Мукачово, 1922). Они брали на увагу мѣстны традиции, зокрема, зостала графема Ѣ, решпектовали ся мѣстны фонологичны одликы (мы — ми, мыло — мило), а розличны рефлексы звука [о] в новозакрытом складѣ позначали ся графемов Ô (з так званым «дашком»). «Панькевичівка» проекзистовала до року 1945, а пак была вымѣнена на общеукраинскый правопис.[4]
Наперек тому, же Панькевич быв остро критикованый украинскыма радикалами, тот гамишный поступ му ся удав, и уже в учебниках 1930-х рокох (поз. третье выданя его «Граматики», 1936) он сам «вычистив» из них так званы «мѣстны диалектизмы» и завершив переход к украинскому литературному языку.[2]
Уважаючи на протесты, чехословацка влада выдала росказ на школный референдум, котрый одбыв ся в року 1937. Тот референдум указав, же за традичну етимологичну граматику были 73,3%, а за «панькевичівку» — 26,7%.
Жерела и одказы
[едітовати | едітовати жрідло]- Ivan Pop. Pan'kevych, Ivan Artemovych. in Paul Robert Magocsi, Ivan Pop. //Encyclopedia of Rusyn History and Culture (Revised and expanded ed.). Toronto Buffalo London: University of Toronto Press, 2005. pp. 370–371. doi:10.3138/9781442674431. ISBN 0-8020-3566-3.англ.
- Гриценко П. Ю.. Панькевич Іван Артемович;. Українська мова: енциклопедія (2-е вид., випр. і доп. ed.). К.: Видавництво «Українська енциклопедія» ім. М. П. Бажана, 2004. стр. 456. ISBN 966-7492-19-2. http://litopys.org.ua/ukrmova/um62.htm.укр.
- Иван Поп. Панькевич Иван Артемович. in Иван Поп. Энциклопедия Подкарпатской Руси. Ужгород: Изд-во В. Падяка, 2001. С. 292. ISBN 966-7838-23-4. http://history.org.ua/LiberUA/966-7838-23-4/966-7838-23-4.pdf.русс.